1 THYSALAWNIKA 3 - Mara Bible RV (BSI)

Thysalawnika lâ Timawthy tuana

¹ Eima tiama thei khao leipa vâta, Atheni khih liata miah ama siesai awpa a phapa ta pahno pi ta.

² Chatanachata Krista thâtihpha liata eima unawhpa nata Khazohpa eima chakaolâhpa Timawthy cha, namâ ngiapâna pa-i awpa nata tha cha patlô awpa ei ta eima vaw tuah.

³ Pasa taonazy vâna heta ahy hmah a chalyu khuh vy. He hawhta pasa tao awpa ta raopa eima châ tahpa nâmo chhao ta nama pahno.

⁴ Nama hnohta eima y nona kha, pasa a tao awpa eima châzie cha chho tyh pi ta, nama pahnopa hawhta, cha hawhna tlai chata a vaw tlôpa a châ.

⁵ Cha vâna chata, reipasaotuhpa reipasaona vâta hmah eima hriapasana kha hraoleipa châ pathlei lah tahpa chi na ta, ei tao thei khao leipa vâta, namâ ngiapâna duahmo pahno awpa ta chyhsa ei vaw tuahpa a châ.

Thysalawnika Awnanopa thâtih lychhihpa

⁶ Chatanachata tahmâ Timawthy cha vaw tlô ta, namâ ngiapâna nata kyhpachâna thâtih lychhihpa miah a vaw tlôkhei. Khâ miah a thei ei chi ta, cha hmô awpa eima byuh kawpa hawhta, nâmo chhao miah hmô awpa nama byuh kawna thâtihzy miah a chho.

⁷ Cha vâna chata, unawh saih u, eima nôpona nata pasataona zydua hry liata, namâ ngiapâna vâta thlahpalôhpa ta eima y haw.

⁸ Abeipa liata â ipa ta namâ duapa vâta, tahmâ cha eima hro a pahâh ha bâ.

⁹ Nâmo vâta eima Khazohpa hmiakô liata eimâ lyna zydua vâna heta, Khazohpa lâta alyna bie rei tiah lei eimâ bâh.

¹⁰ Nama hmia hmô heih ta, ngiapâna liata namâ phahlanazy cha pazao awpa ta, chhô nah zâ ta phahnai khoh ngaitapa ta thlah eima chhâ lymâ.

¹¹ Eima Paw Khazohpa nata eima Beipa Zisu ta nâmo lâ eimâ vy thei nawpa lâpi miah taopa mawh sy.

¹² Kyh eima cha pachâpa hawhna heta, nâmo chhao chyhsa to kyh nama pachâ thei nawpa nata nâmo nata nâmo kyh namâ pachâ raihrie thei nawpa ta, Abeipa ta nama kyhpachâna papôhsa sala, kyhpachâna liata cha pahneirôhsa mawh ei sy.

¹³ Chatanachata eima Beipa Zisu cha a mopathaihpa zydua chhaota â vy tita, pathipalôh pathaihna kyh liata seina hnei leipa châ awpa ta, eima Khazohpa nata Paw hmiakô liata a cha paduasa aw ei.