1 THYSALAWNIKA 2 - Mara Bible RV (BSI)

Thysalawnika liata Pawla chakaona

¹ Unawh saih u, eima cha vaw tlypa kha hraoleipa a châ leizie nâmo tlai ta nama pahno.

² Nama pahnopa hawhta, Philipi khih liata riethei taopa ta nata maoh paphyuhsapa ta eima ypa chhao khata, eima Khazohpa ta riahphana miah pie ta, pakhâpadiena hluhpi hry liata nama hnohta Khazohpa thâtihpha eima cha vaw chho.

³ Eima châ hawna kha haiphiana bie tlyma, palôh pathaih leipa tawhta bie a puapa tlyma châ leipa ta, dôvei eima châ chhuahpa châ hra vei.

⁴ Thâtihpha pavaosa tlâhpa ta Khazohpa ta miah a raopa hawh tlai ta, chyhsa palysa a chhuah leipa ta, eima pathipalôh a pasiatuhpa Khazohpa palysa a chhuahpa ta, bie eima chho tyh.

⁵ Nama pahnopa hawhta, reithai pakheina biezy reih beih leipa pi ta, karâyna khu nawpa biezy reih beih hra ma pi. Khazohpa cha miah pahnokheituhpa a châ.

⁶ Krista lyuhchâpa eima châna tawhta palyupalihna a hnaw theipa châ hra sih la, nâmo tawhta tlyma, mohropazy tawhta tlyma, chyhsapa palyupalihna tlua beih ma pi.

⁷ Nô ta a sawzy a mohôhpa hawhta, nama hry liata nônaipa ta tlao eima y tyh.

⁸ Eima pasôpa nata kho ngaitapa nama vaw châ hapa vâta, Khazohpa thâtihpha dei châ leipa ta, eima hrona chhao taih cha pie awpa ta eimâ mâ thlâh hapa kha.

⁹ Unawh saih u, eima hriapasazie nata eima rietheizie zy kha namâ thei aw. Khazohpa thâtihpha eima cha chho nona kha, ahy phaohri hmah eima châ lei nawpa ta, chhô nah zâ ta eima hria tyh.

¹⁰ Nâmo cha ngiapâtuhpazy chô liata pathaihpa nata siapa nata seina hnei leipa ta eima y tyhzie miah pahnokheituhpazy nama châ. Khazohpa chhao ta miah a pahnokhei.

¹¹ Paw ta a sawzy chô liata a taopa hawhta, nama chô liata eima taopa kha nama pahno.

¹² A khinarâh nata a rônahna lâta nâmo châ awtuhpa Khazohpa chyhsa tlâh nama châ thei nawpa ta, cha pasyu pi ta, nama tha cha patlô pi ta, bie eima cha pie.

¹³ Keimo tawhta nama theipa Khazohpa bie namâ pyh nona kha, chyhsapa bie a pyhpa hawhta a pyh leipa ei chi ta, a châna dopa, Khazohpa bie hawhta namâ pyhpa vâta, Khazohpa hnohta alyna bie khâ eima reih tyh. Cha Khazohpa bie cha nâmo, ngiapâtuhpazy chô liata a hriapa cha a châ.

¹⁴ Unawh saih u, nâmo chhao, Zudia râh liata a ypa Krista Zisu liata Khazohpa Awnanopazy hawhta nama châ ha hih. Zuzy ku liata âmo pasa ama taopa hawhta, nâmo chhao nama râh chyhsazy ku liata pasa nama tao hra.

¹⁵ Cha Zuzy cha Abeipa Zisu nata hrohsopazy a thietuhpa châ ei ta, keimo chhao miah papua ei ta, Khazohpa palysa leipa ei ta, chyhsa zydua chakhiatuhpa ama châ.

¹⁶ Zenitaizy pachha ama châ thei nawpa ta ama hnohta bie chho awpa miah pakhâ ei ta, chatanachata ama moleina panuana ama pabie lymâ. Achhâna liata cha Khazohpa hiehâhna ama chô liata a vaw tlô haw.

Thysalawnika mo vâna

¹⁷ Unawh saih u, bohpi leipa chhôh nâmo nata a chhaihpa ta y pi ta, palôh liata châ leipa ta, pôhpa ta eimâ chhaih chypa a châpa chhao ta, cha vâ ngaita pi ta, nama hmia hmô awpa eimâ chhuah via rili.

¹⁸ Nâmo lâ a vy awpa khoh kaw pi ta, kei, Pawla tlai chhao he a chhuah tyh na ta, châhrasala Sâtâ ta miah a pakhâ ha tyh.

¹⁹ Eima Beipa Zisu â vy tita a hmiakô liata eima hnabeiseihna, eimâ lyna nata eima rônahna lakho a châ awpazy cha khâpa ma a châ aw? Nâmo châ veih ei chi ma?

²⁰ Nâmo he eima rônahna nata eimâ lyna awpa cha nama châ.