1 THYSALAWNIKA 1 - Mara Bible RV (BSI)Anaohna 1 Pawla nata Silvanâ nata Timawthy ta Paw Khazohpa nata Abeipa Zisu Krista liata Thysalawnika Awnanopa eima châ naoh. Ngiachhiena nata thlalôhna nama hnohta y mawh sy. Thysalawnika mo ngiapâna nata mopâ tlâh châna 2 Eima thlahchhânazy liata nama moh reipa ta, nama zydua châta Khazohpa hnohta alyna bie khâ eima reih tyh. 3 Ngiapâna vâta nama hmotaozie zy, kyhpachâna vâta nama hriapasazie zy, eima Beipa Zisu Krista liata hnabeiseihpa vâta nama tiamazie zy kha, eima Khazohpa nata Paw hmiakô liata khâ eimâ thei tyh. 4 Unawh kyhpachâ ngaitapa saih u, Khazohpa ta a châ tlyh ei tahpa eima pahno. 5 Thâtihpha nama hnohta eima vaw tlôkheipa kha, bie dei ta vaw tlôkhei leipa pi ta, hmotaotheina nata Thlahpa Pathaihpa nata ngiapâna a i ngaitapa chhaota eima vaw tlôkheipa a châ. Nama hry liata eima y nona kha, nâmo vâta kheihta ma eima y tahpa nama pahno. 6 Rietheina hluhpi taona chôta, Thlahpa Pathaihpa liata a lypa ta bie a pyh ei chi ta, keimo nata Abeipa hâ a latuhpazy nama vaw châ haw. 7 Mâsidônia nata Akai râh liata ngiapâtuhpa zydua châta a mopâ awpa nama vaw châ. 8 Abeipa bie cha nâmo tawhta Mâsidônia nata Akai râhzy liata a pathâhpa dei châ leipa ta, Khazohpa namâ ngiapâna kyh cha su to liata pathâh ta, chavâta keimo ta khâpa hmah eima rei awpa byuh khao vei. 9 Eima cha vaw tly nota miah namâ lyzie nata Khazohpa hrohpa nata dopa chakao awpa ta nothlahpazy tawhta Khazohpa lâ namâ heih hapa kyh miah chho ei ta, 10 vârâh tawhta a Sawchapawpa avyheihna a hâtuhpazy nama châzie miah ama chho. Ano cha Khazohpa ta athihpa hry tawhta a pathyupa Zisu kha châ ta, hiehâhna vaw tlô awpa tawhta miah a pachhatuhpa a châ. |