1 THÂTIHZYRONA 9 - Mara Bible RV (BSI)

Babylaw tawhta a zâ liepazy thyutôna

¹ Chatanachata Izarei saw zydua thyutôna cha roh khaipa châ ta, chazy cha Abeizy Châbu liata ropa a châ. Zudâh cha a paraona vâta Babylaw lâ sei ta a chhipa châ ta.

² Ama ryuto râh khihpizy liata a pahrâ pakhua heihpa hmiatuapazy cha Izarei saw thokhazy, theihthaipazy, Livai chizy nata Achhyna o liata chakaotuhpazy châ ei ta.

³ Hezy he Zudâh, Benzami, Epharai nata Manase pathlazy hry tawhta Zerusale liata a pahrâpazy ama châ:

⁴ Amihu cha Uthai paw châ ta, Uthai cha Ômri paw a châ. Ômri cha Imri paw châ ta, Imri cha Bâni paw a châ. Âmo cha Zudâh sawchapawpa Pereza pathla­zy ama châ.

⁵ Silôni pathlazy cha, a sawchapaw uhtheipa Asiah nata a sawchapaw hropazy ama châ.

⁶ Zerâ pathlazy cha Zue nata ama heinawh 690 zy ama châ.

⁷ Benzami pathlazy cha, Salu paw Mesulâ, Mesulâ paw Hôdaviah nata Hôdaviah paw Hâsenuah zy ama châ.

⁸ Ibaniah cha Zerôhâ sawchapawpa châ ta, Elâ cha Uzizi saw­chapawpa châ ta, Uzizi cha Mikari saw­chapawpa a châ. Mesulâ cha Sephatiah sawchapawpa châ ta, Sephatiah cha Rue sawchapawpa châ ta, Rue cha Ibenizah sawchapawpa a châ.

⁹ A chhâ chhâ ta reipa ta, heinawh 956 ama châ. Ama zydua ta ama pathla alaichadaina liata a chhôh chhôh ta pawhrâhpazy ama châ.

¹⁰ Zerusale liata a pahrâ heihpa theihthaipazy cha Zediah, Zehôiari, Zaki nata

¹¹ Hikia sawcha­pawpa Azariah zy ama châ. Hikia cha Mesulâ sawchapawpa châ ta, Mesulâ cha Zadô sawchapawpa a châ. Zadô cha Meraiô sawchapawpa châ ta, Meraiô cha Khazohpa o liata hyutuhpa Ahitu sawchapawpa a châ.

¹² Adiah paw cha Zerôhâ châ ta, Zehôrâ cha Pâsu sawchapawpa châ ta, Pâsu cha Mâkia sawchapawpa a châ. Mâsai cha Adie sawchapawpa châ ta, Adie cha Zazerâh sawchapawpa châ ta, Zazerâh cha Mesulâ sawchapawpa a châ. Mesulâ cha Mesilemi sawchapawpa châ ta, Mesilemi cha Ime saw­chapawpa a châ.

¹³ Ama heinawhzy rei pâpa ta, ama pho pawhrâhpa 1,760 y ei ta, Khazohpa o liata chakaona raihria liata a saomâ kawpazy ama châ.

¹⁴ Hezy he Livai pathla Zerusale liata a pahrâ heihpazy ama châ: Hâsuba sawchapawpa cha Semiah châ ta, Hâsuba cha Azrikâ sawchapawpa a châ. Azrikâ cha Hâsabiah sawchapawpa châ ta, âmo cha Merâri pathlazy ama châ.

¹⁵ Livai pathla hropazy cha Bâbakâ, Heresa, Kalâ nata Mâtaniah zy châ ei ta, Mâtaniah cha Mikhâ sawchapawpa a châ. Mikhâ cha Zikari sawchapawpa châ ta, Zikari cha Asâpha sawchapawpa a châ.

¹⁶ Ôbadia cha Semiah sawchapawpa châ ta, Semiah cha Kalâ sawchapawpa châ ta, Kalâ cha Zeduthu sawchapawpa a châ. Berekiah cha Âsâ saw­chapawpa châ ta, Âsâ cha Netôpha mo khihzy liata pahrâpa Elkânâ sawchapawpa châ ta, âmo chhao Livai pathla ama châ hra.

¹⁷ Chhikao vaituhpazy cha Sâluh, Aku, Talmaw, Ahimâ nata ama heinawhzy châ ei ta, Sâluh cha hyutuhpa a châ.

¹⁸ Kha hlâta cha Livai mo riehmozy liata chhikao vaituhpa châ ei ta, nochhi lâta abei chhikao vaituhpazy ama châ.

¹⁹ Sâluh cha Kôre sawchapawpa châ ta, Kôre cha Ebiasâ sawchapawpa châ ta, Ebiasâ cha Kôrâ sawchapawpa a châ. Ebiasâ nata Kôrâ pathla a heinawhzy cha chakaona raihria kyh liata maophaohtuhpa ama châ. Âmo pathlatuhpazy cha Abeipa riehmo mohôhtuhpazy châ ei ta, chhikao vaituhpazy ama vaw châ tyhpa hawhta, âmo chhao poh o chhikao vaituhpazy ama châ hra.

²⁰ Kha hlâta cha Eliaza sawchapawpa Phinehâ cha ama hyutuhpa châ tyh ta, a hnohta Abeipa a y tyhpa a châ.

²¹ Meselemia sawchapaw­pa Zekaria cha ahmaohna poh o chhikao vaituhpa a châ.

²² Chhikao vaituhpa châta raopazy cha, ama zydua ta 212 ama châ. Ama thyutôna a laichadainazie hawhta, ama khih chyu liata ama moh ropa a châ. Âmo cha Dâvi nata hrohsopa Samuela ta ama maophaohna rai chyu liata ama padua.

²³ Âmo nata ama sawzy cha Abeipa o chhikao vaina kyh liata maophaohtuhpa châ ei ta, achhyna byureih chhikaozy cha mohôhpa ta ama vaih tyh.

²⁴ Chhikao vaituhpazy cha nochhi, notla, maw nata chho, kao palih liata ama y tyh.

²⁵ Ama khihzy liata ama heinawhzy ta noh sari padai ta a thla tyh ei ta, ama rai ama bao tyh.

²⁶ Chhikao vaituhpa hyutuh chaipa papalihzy cha Livai pathlazy châ ei ta, Khazohpa o chhôhpadâhpazy nata sôh sona mohôhna kyh liata maophaohnazy piepa ama châ.

²⁷ Achhyna o mohôhna nata my chareih ta pahyna cha âmo maophaohna a châpa vâta, Khazohpa o chadôpa ta amâ riepâ tyh.

²⁸ Thokha cha chakaona chhaichhi mohôhtuhpazy châ ei ta, amâ ngiakhei chy nata ama puakhei chy ta ama paki tyh.

²⁹ Ahropazy cha hmobaoh hropazy nata beiphiah pathaihpazy mohôh awpa nata viahdie dipa, kresawhti, sathaw, ropahâhpa nata ia-ôzy mohôh awpa ta raopa ama châ.

³⁰ Theihthaipa sawchapawpa thokhazy ta ia-ô pahlao awpazy ama pachhuapanoh tyh.

³¹ Kôrâ pho Sâluh sawchapaw uhtheipa Livai chi Mâtithiah cha viahchhâ phiapa taona liata maophaohtuhpa a châ.

³² Ama heinawh Kôhâ pathla thokha cha, viahchhâ chaluahpa taona liata maophaohtuhpazy châ ei ta, Pahânoh maihta amâ chhuanoh tyh.

³³ Livai pathla pawhrâhpa hlasathaipazy cha Achhyna o chhôhpadâhpazy liata y ei ta, chhô nah zâ ta hria awpa maophaohna ama hneipa vâta, rai hropazy tawhta pahuapa ama châ.

³⁴ Âmo cha Livai pathla pawhrâhpa, ama chhâ chyu liata hyutuhpazy châ ei ta, Zerusale liata a pahrâpazy ama châ.

Sawla thyutôna

³⁵ Kibiô mo pathlatuhpa Zeili cha Kibiô khihpi liata pahrâ ta, a lapinô moh cha Mâkâ a châ.

³⁶ A sawchapaw uhtheipa cha Abadaw châ ta, a pazipazy cha Zuri, Kisâ, Bâlâ, Nerâ, Nâdâ,

³⁷ Kedaw, Ahiô, Zekaria nata Mikalô zy ama châ.

³⁸ Mikalô cha Simia paw châ ta, âmo cha Zerusale liata ama heinawhzy kiapâh liata ama heinawhzy chhaota ama pahrâ.

³⁹ Nerâ ta Kisâ sa ta, Kisâ ta Sawla sa ta, Sawla ta Zawnathâ, Malkhisua, Abinadâ nata Esbâlâ zy sa ta.

⁴⁰ Zawnathâ sawchapawpa cha Meribâlâ châ ta, Meribâlâ ta Mikâ sa ta.

⁴¹ Mikâ sawchapawzy cha Pithaw, Mele, Târia nata Ahâza zy ama châ.

⁴² Ahâza ta Zarâh sa ta, Zarâh ta Aleme, Azamâve nata Zimri zy sa ta. Zimri ta Môza sa ta.

⁴³ Môza ta Binia sa ta, Binia sawchapawpa cha Rephiah châ ta, Rephiah sawchapawpa cha Eliasâ châ ta, Eliasâ sawchapawpa cha Aze a châ.

⁴⁴ Aze ta sawchapaw pacharu hnei ta, ama mohzy cha Azrikâ, Bôkeru, Ismela, Siariah, Ôbadia nata Hâna zy a châ. Chazy cha Aze sawchapawzy ama châ.