1 THÂTIHZYRONA 5 - Mara Bible RV (BSI)

Rubena pathlazy

¹ Hezy he Izarei sawchapaw uhtheipa Rubena pathlazy ama châ. Rubena cha sawchapaw uhtheipa châ ta, châhrasala a paw rakhô a papuapaleipa vâta, sawchapaw uhthei châna tovyuh cha Izarei sawchapawpa Zawsi sawchapawzy hnohta piepa châ ha ta, chavâta pathlatuhpazy alaichadaina liata chhao, sawchapaw uhtheipa hawhta a laichadaipa châ khao vei.

² Zudâh cha a unawhzy hry liata thatlô chaipa châ ta, ryureituhpa chhao ano tawhta pua ta, châhrasala sawchapaw uhtheipa tovyuh deikua cha Zawsi eih a châ.

³ Izarei sawchapaw uhtheipa Rubena sawchapawzy cha Hanô, Pâluh, Hezrô nata Kâmi zy ama châ.

⁴ Zôela sawchapawpa cha Semiah châ ta, Semiah sawchapawpa cha Kawkâ châ ta, Kawkâ sawchapawpa cha Simei châ ta,

⁵ Simei sawchapawpa cha Mikâ châ ta, Mikâ sawchapawpa cha Reai châ ta, Reai sawchapawpa cha Bâlâ châ ta,

⁶ Bâlâ sawchapawpa cha, Asuria bei Tikalâpilesa ta sei ta â chhipa Berâh kha châ ta, Rubena pathlazy hyutuhpa a châ.

⁷ Ama chhâzy thyutôna ro nota, a pho pho ta a laichadaipa ta, Rubena pathla hyutuhpazy cha, Zeili, Zekaria nata

⁸ Azazi sawchapawpa Belâ zy ama châ. Azazi paw cha Semâ châ ta, Semâ paw cha Zôela châ ta, ano cha Arôerâ tawhta Nebô nata Bâlâmeô taihta a pahrâpa a châ.

⁹ Kilia râh liata ama sahroh thata a pôhpa vâta, nochhi lâta râhchawhpa angiana tawhta Ufrâti chavah notla baih lâ taihta ama pahrâ.

¹⁰ Sawla â bei daihti liata Hâkari mo a dyuh ei ta, ama pahnie haw. Chatanachata Kilia nochhi lâ râh zydua liata ama poh ozy liata ama pahrâ haw.

Kâdâ pathlazy

¹¹ Kâdâ pathlazy cha Rubena pathlazy kiapâh Bâsanâ râh liata Sâlekâ taihta pahrâ ei ta.

¹² Ama hyutuhpa cha Zôela châ ta, a pazipazy cha Saphâ, Zanai nata Bâsanâ râh liata Saphâta zy ama châ.

¹³ A chhôh chhôh ta a laichadaipa ta ama unawh hropazy cha Mikaila, Mesulâ, Sebâ, Zôrai, Zakâ, Zia nata Ebe zy châ ei ta, pasari ama châ.

¹⁴ Hezy he Huri sawchapawpa Abihai pathlazy ama châ. Huri cha Zarôh sawchapawpa châ ta, Zarôh cha Kilia sawchapawpa châ ta, Kilia cha Mikaila sawchapawpa châ ta, Mikaila cha Zesisai sawchapawpa châ ta, Zesisai cha Zâhdô sawchapawpa châ ta, Zâhdô cha Buzi sawchapawpa a châ.

¹⁵ Kuni sawchapawpa Abadie sawchapawpa Ahi cha ama phozy hyutuhpa a châ.

¹⁶ Kilia liata pahrâ ei ta, Bâsanâ râh nata a khichapeihzy liata chhao pahrâ ei ta, si panyupa yna Saraw râh zydua liata ama râhri taihta ama pahrâ.

¹⁷ Cha zydua cha Zudâh bei Zôthâ â bei nota nata Izarei bei Zerôbaw â bei nota thyutôna alaichadaina châbu liata ro khaipa a châ.

Chi no nata khophie thâtih

¹⁸ Rubena chi, Kâdâ chi nata Manase chi khophiezy ta vyhphao nata zaozi a chaba theipa nata li a ka theipa pasaiphazy hnei ei ta, adyuhzie a thaipa nata adyuhna lâ a sie thei awpa pheisaih 44,760 ama hnei.

¹⁹ Hâkari mo, Zetu mo, Nâphi mo nata Nôdâ mozy siehnao ei ta.

²⁰ Adyuhna liata Khazohpa lâ thlahchhâ ei ta, ano ama ngâpa vâta, a para ngaitapa ta ama hiana cha Khazohpa ta chyh-ei ta, Hâkari mo nata ama hnohta a ypa zydua cha ama ku liata a pie ha ei.

²¹ Ama sahrohzy, râraoseihpa 50,000, mietaku 250,000 nata alâ 2,000 siekhei ei ta, chyhsa chhao ahrohpa ta 100,000 ama siekhei haw.

²² Adyuhna cha Khazohpa eih a châpa vâta, Rubena chi, Kâdâ chi nata Manase chi khophiezy ta Hâkari mo nata ama hnohta a ypa hluhpi cha thiepa ta papao ei ta, Izarei sawzy seichâna lâ siekheipa ta ama yna daihti taihta Hâkari mo râh liana cha ama pahrâ haw.

Manase chi khophie

²³ Nochhi lâta a pahrâpa Manase chi khophiezy cha hluh kaw ei ta, Bâsanâ tawhta Bâlâhamaw, Seni nata Hâmaw Tlâh taihta ama pôh lymâ.

²⁴ Ama chi pawhrâhpazy cha Ephe, Isi, Elie, Azarie, Zeremiah, Hôdaviah nata Zadie zy ama châ. Âmo cha pasaipha nata chyhsa mohpathâhpazy châ ei ta, ama chi pawhrâhpazy ama châ.

²⁵ Châhrasala âmo pathlatuhpazy Khazohpa chô liata ngâchhih leipa ei ta, Khazohpa ta ama hmiakô liata a pahleipadiapa, cha râh phopizy khazohzy liata ama sihryh haw.

²⁶ Chavâta Izarei Khazohpa ta Asuria bei Puli palôh nata Asuria bei Tikalâpilesa palôh pathyu ta, Rubena chi, Kâdâ chi nata Manase chi khophie zy cha sei ta a chhi ta, Hâlâ, Hâbaw nata Hârâ khihpizy nata Kôzani chavah liata âmo cha soh ta, tanoh taihta cha liata ama y.