1 THÂTIHZYRONA 4 - Mara Bible RV (BSI)

Zudâh pathlazy

¹ Zudâh sawchapawzy cha Pereza, Hezrô, Kâmi, Hurâ nata Sôbâ zy ama châ.

² Sôbâ sawchapawpa Reai ta Zahâ sa ta, Zahâ ta Ahumai nata Lâhâ a sa ei. Âmo cha Zôrâ phozy ama châ.

³ Etamâ sawchapaw­zy cha Zezari, Ismâ nata Idabâ zy châ ei ta, ama sietanô moh cha Hâzelepôni a châ.

⁴ Penia ta Kedaw sa ta, Eze ta Husah a sa. Âmo cha Bethlehe paw Ephrâthâ sawchapaw uhtheipa Hurâ pathlazy ama châ.

⁵ Tekô paw Asahu ta lapinô pano, Helâ nata Nârâ hnei ta.

⁶ Nârâ chô liata Ahuzamâ, Hepha, Temeni nata Hâhastâri zy sa ta. Âmo cha Nârâ pathlazy ama châ.

⁷ Helâ sawchapawzy cha Zerethâ, Izah nata Ethanâ zy ama châ.

⁸ Kôza ta Anu, Zôbebâ nata Hâru sawchapawpa Ahahe phozy pathla ta.

⁹ Zabia cha a unawhzy hlâta zachhih viapa châ ta, a nô ta, “Riethei pasa ngaitapa ta ei sapa a châ,” tah ta a moh Zabia a bi.

¹⁰ Zabia ta Izarei Khazohpa pado ta, a hnohta, “Byhnâ na piepa ta, ei râh he na pakawhpa la ei tah kaw dia! Ei chô liata na ku y sala, riethei pasana ei chô liata a tlô lei nawpa ta, nâ pasasa thei awpa tawhta na pabohsa mah y!” tah ta. Khazohpa ta a hiapa cha pie ta.

¹¹ Suhâ unawhpa Kheluh ta Mehi sa ta, Mehi ta Estaw sa ta.

¹² Estaw ta Berâpha, Pâsia nata Inahâ paw Tehinâ zy sa ta. Âmo cha Rekâ mo ama châ.

¹³ Kenâza sawchapawzy cha Ôthane nata Seriah châ ei ta, Ôthane sawchapawzy cha Hâthâh nata Menôthai ama châ.

¹⁴ Menôthai ta Ôpharâ sa ta, Seriah ta Keharâ mo pathlatuhpa Zôabâ sa ta. Âmo cha zôthaipa ama châpa vâta Keharâ mo tahpa a châ.

¹⁵ Zephune sawchapawpa Kâlebâ sawchapawzy cha Iru, Elâ nata Nâmi zy châ ei ta, Elâ sawchapawpa cha Kenâza a châ.

¹⁶ Zehalele sawchapawzy cha Ziphi, Ziphâ, Tiria nata Azre zy ama châ.

¹⁷ Ezrah sawchapawzy cha Zethe, Meredâ, Ephe nata Zalô zy ama châ. Meredâ ta Phiraoh sawchanô Bithiah hnei ta, Bithiah cha saw phaoh ta, Miria, Sâmai nata Estemô paw Isbâ zy a sa ei.

¹⁸ A lapinô Zudâh zuah ta Kedaw paw Zere, Sôkô paw Hebe nata Zanô paw Zekuthie zy sa ta.

¹⁹ Hôdiah ta Nâhamâ sietanô hnei ta, a sawchapawzy cha Kâmi mo pathlatuhpa Keilâh nata Mâkâ mo pathlatuhpa Estemô zy ama châ.

²⁰ Simô sawchapawzy cha Amanaw, Rinâ, Benhanâ nata Tilô zy ama châ. Isi sawcha­pawzy cha Zôhe nata Benzôhe ama châ.

²¹ Zudâh sawchapawpa Selâh sawchapawzy cha Lekâ paw Erâ, Mâresâ paw Lâdâh nata Bethabia liata poh rih dipa taotuhpazy ama châ.

²² Zôki, Kôzebâ mo, Zôasâ nata Môabâ nata Zasubilahe liata ryureituhpa Sârâpha zy chhao Selâh sawchapawzy ama châ hra. Cha kyh cha hlâno châropazy tawhta hmôpa a châ.

²³ Âmo cha Netai nata Kederâ liata a pahrâpa beihvituhpazy châ ei ta, bei châta rai hria awpa ta, cha liata a pahrâpazy ama châ.

Simeôna pathlazy

²⁴ Simeôna sawchapawzy cha Nemua, Zami, Zari, Zerâ nata Sawla zy ama châ.

²⁵ Sawla sawchapaw­pa cha Sâluh châ ta, Sâluh sawchapawpa cha Mibasâ châ ta, Mibasâ sawchapawpa cha Mismâ a châ.

²⁶ Mismâ sawchapawpa cha Hâmua châ ta, Hâmua sawchapawpa cha Zaku châ ta, Zaku sawchapawpa cha Simei a châ.

²⁷ Simei ta sawchapaw pahrawh hleicharu nata sawchanô pacharu hnei ta, a unawhzy deikua saw sa hluh veih ei. Ama pho chhao Zudâh mo hawhta pôh thei veih ei.

²⁸ Bâsebâ, Môladâ, Hâzasua,

²⁹ Bilhâh, Ezemâ, Tôlâ,

³⁰ Bethua, Hômâ, Zikalâ,

³¹ Bemâkabô, Hâzasusi, Bethabiri nata Saraimi khihpizy liata ama pahrâ. Chazy cha Dâvi â bei hlâta ama khihpizy a châ.

³² Khichapeih miapangawh hnei ei ta, chazy cha Etamâ, Ainâ, Rimô, Tôkhe nata Asanâ zy châ ta,

³³ khihpizy chadôpa ta Bâlâ taihta khichapeih zydua chhao amâ hlao. Chazy cha ama pahrâna suzy châ ta, ama thyutôna rona châbu chhao amâ vao.

³⁴ Mesôbâ, Zamale, Amazia sawchapawpa Zôsâh,

³⁵ Zôela nata Zôsibiah sawchapawpa Zehu zy chhao Simeôna pathlazy ama châ. Zôsibiah paw cha Seriah châ ta, Seriah paw cha Asie a châ.

³⁶ Eliônai, Zakôbâ, Zesôhai, Asiah, Adie, Zesimie, Benai nata

³⁷ Siphi sawchapawpa Ziza zy chhao Simeôna pathlazy ama châ. Siphi paw cha Alaw châ ta, Alaw paw cha Zediah châ ta, Zediah paw cha Simri châ ta, Simri paw cha Semiah a châ.

³⁸ He liata ama moh paziahpazy he ama pho hyutuhpazy châ ei ta, ama pathlazy thata ama pôh.

³⁹ Ama sahrohzy châta sibiepa yna suzy tlua laihpa ta, saikao nochhi lâta Kedaw angiana taihta sie ei ta.

⁴⁰ Cha liata sahroh lao pabâsa nawpa sibiepa hluhna nata phana su hmô ei ta, a râh chhao kawh ngaita ta, dâhthloh ta, thlalôh a chhih kawpa râh a châ. Cha liata a vaw pahra tuapazy cha Hamâ pathlazy ama châ.

⁴¹ Zudâh pathla moh ropazy he Zudâh bei Hezekia â bei daihti liata a ngiapa châ ei ta, Hamâ mo poh ozy parao ei ta, cha liata a ypa Muni mo chhao ama pahleipadia khai haw. Pahleipadia khaipa ama châpa cha tanoh taihta hmô thei awpa ta a y. Sahroh châta sibiepa a ypa vâta, Muni mo su liata Simeôna mo ama pahrâ haw.

⁴² Simeôna pathlazy hry tawhta chyhsa za pangawh cha, Isi sawchapawpa Pelatiah, Niariah, Rephiah nata Uzie zy chhihthana ry liata Seirâ Tlâh lâ sie ei ta.

⁴³ Amale mo a râpaipa laibâhpazy pahnie ei ta, tanoh taihta cha liata ama pahrâ haw.