1 THÂTIHZYRONA 29 - Mara Bible RV (BSI)

Achhyna o sana châta hmopiepazy

¹ Chatawhcha Bei Dâvi ta zawpi ahmaohpakhypa zydua hnohta, “Ei sawchapawpa Sawlawmaw he, ano deita he Khazohpa ta â tlyhpa châ ta, châhrasala hawtipa a châ chypa vâta hmo pahno tu mâh vei. O rônahpa sa awpa cha chyhsapa châta châ leipa ta, Zehôvâh Khazohpa châta a châpa vâta rai lai ngaitapa châ ta.

² Chavâta ei tao theipa rakha liata cha, ei Khazohpa o châta ei pachhuahpanoh chhielie khai haw. Ngôh hmozy châta ngôh, tâkâ hmozy châta tâkâ, dawh hmozy châta dawh, thua hmozy châta thua, tho hmozy châta tho zy ei pachhuahpanoh khai haw. Chazy hleikhô ta, a pangia nawpa ta lôsôhpa cheihchapaipazy, thua rôh ngiapazy, alô rôh chi nanopazy, lôsôhpa to nata awlôteihpa zy chhao a hluhpi ei pachhuapanoh haw.

³ Cha dei châ vei, o pathaihpa châta ei pachhuapanohpazy hleikhô ta, keima ngôh nata tâkâ zy chhao ei pie pâ hra. Ei Khazohpa o he ei pachâ peimawh ngaitapa vâta, ei Khazohpa o châta ei piepa a châ.

⁴ Ôphi ngôh talent 3,000 nata tâkâ talent 7,000 cha o pâhchhôzy pahu nawpa ta pie na ta,

⁵ zôthaipazy ta ngôh nata tâkâ ta tao awpa hmo zydua ama tao nawpa châta keima sôh tawhta ei pie. Tanoh he ahy ma Abeipa châta ano kho tlai ta a pie hra aw?” tah ta.

⁶ Chatanachata chhôhkha pawhrâhpazy, Izarei chi hyutuhpazy, pheisaih sâh kha hyutuhpazy, pheisaih za kha hyutuhpazy nata abei raihria liata hyutuhpazy chhao ta âmo lôhthai ta pie chyu ei ta.

⁷ Khazohpa o sa nawpa ta ama piepa a tlohpakhypa cha ngôh talent 5,000 nata dari 10,000, tâkâ talent 10,000, dawh talent 18,000, thua talent 100,000 a châ.

⁸ Lôsôhpa a hneipazy chhao ta, Abeipa o sôh châta thyu ei ta, chazy cha Kesao pathla Zehie ta a mohôh.

⁹ Âmo khopasana tlai ta ama piepa a châpa vâta zawpizy cha amâ ly ngaita. Pathipalôh tlokhuh ta Khazohpa lâ âmo lôhthai ta ama piepa a châ. Bei Dâvi chhao â ly ngaita.

Dâvi thlahchhâna

¹⁰ Chavâta Dâvi cha zawpi zydua hmia­kô liata Abeipa reithai ta. “Hy Abeipa, miah pathlatuhpa Izarei Khazohpa y, chhâzaw nata tlyzaw ta reithaipa ta y mah y.

¹¹ Hy Abeipa y, rônahna zy, hmotaotheina zy, palyupalihna zy, pahniena zy, abeina zy na eih châ ta, avâzy nata alei liata a ypa zydua chhao na eih a châ. Hy Abeipa, khinarâh cha na eih châ ta, ato chô lâta a to luh châta cheihchalopa na châ.

¹² Hneirôna nata palyupalihnazy cha nâ tawhta a vypa châ ta, ato chô liata ryureituhpa na châ. Hmotaotheina nata thatlôna na ku liata y ta, chyhsa to parônahsa theina nata tha­tlôna pie theina chhao na ku liata a y.

¹³ Chavâta eima Khazohpa y, tahmâ alyna bie cha hlâ pi ta, na moh rônahpa eima reithai.

¹⁴ “Ahy ma châ na ta, ei chiheihzy chhao he ahyzy ma châ ei ta, he hawhta keimo kho tlai ta hmopiepazy eima vaw hlâ thei tly? Hmo to nâ tawhta eima hmôpa châ ta, na eih eima cha pie lilaw heihpa dei a châ.

¹⁵ Miah pathlatuhpazy hawhna khata, keimo cha na hmiakô liata khichhaipa nata khitlyhpa hawh dei châ pi ta, alei liata eima hro nohzy he nohpahlipa hawh dei châ ta, hnabeiseih awpa rai y vei.

¹⁶ Hy Abeipa eima Khazohpa y, na moh pathaihpa y nawpa o eima cha sapa awpa châta eima hmopiepa hluh ngaitapazy he, nâma ku tawhta eima hmôpazy châ ta, ato zydua he na eih sai a châ.

¹⁷ Ei Khazohpa y, nâ cha palôh mohpasia chi ta, adona liata nâ ly tahpa ei pahno. Palôh dopa phaopa ta, he hmozy he keima lôhthai tlai ta ei vaw hlâ. He liata a ypa na chyhsazy chhao heta âmo lôhthai tlai ta, a ly ngaitapa ta ama cha vaw hlâ tahpa ei hmô.

¹⁸ Hy Abeipa, miah pathlatuhpa Abarahâ, Aisika nata Izarei Khazohpa y, he hawhpa achhuahnazy nata pachânazy he na phopi palôh liata khâ paysa la, ama pathipalôhzy nâ lâ khâ paheisa mah y.

¹⁹ Ei sawchapawpa Sawlawmaw he, na biepiepazy, na ryhpa biezy nata na bieraopazy zyhpa ta, a zydua ta tao khai sala, o rônahpa cha a chhaichhi hmobaohzy ei chhuanoh hapa hawhta a sa thei nawpa ta, palôh phapakipa paphaosa mah y,” tah ta.

Sawlawmaw bei ta pa-ipa a châ

²⁰ Dâvi ta zawpi zydua hnohta, “Abeipa nama Khazohpa cha reithai teh u,” tah ta. Zawpi zydua ta Abeipa, ama pathlatuhpazy Khazohpa cha reithai ei ta, a bôh ei ta, Abeipa nata abei cha a naoh ei ta.

²¹ Abeipa lâ atheihnazy hlâ ei ta. A mylâ ta Abeipa lâ raopa hlânazy hlâ ei ta, viahchao tôhpa 1,000, mietaku tôhpa 1,000, mietakutaw 1,000, niepa hlânazy chhaota hlâ ei ta, Izarei saw zydua châta atheihna hluhpi ama hlâ.

²² Cha noh ta Abeipa hmiakô liata thapha ngaitapa ta niepa ta doh ei ta. Chatanachata Dâvi sawchapawpa Sawlawmaw cha bei ta ama pa-i chanei heih. Sawlawmaw cha Abeipa châta ryureituhpa châta sathawthu ei ta, Zadô cha theihthaipa châta sathaw ama thu.

²³ Chatana­chata Sawlawmaw cha a paw Dâvi su liata bei châ awpa ta Abeipa beidyuchhai liata a tyuh ta. Vânoh thata to ta, Izarei saw zydua ta a rei amâ ngiah lymâ.

²⁴ Hyutuhpa zydua, pasaipha zydua nata Bei Dâvi sawchapaw hropa zydua chhao ta, Bei Sawlawmaw ryureina ry liata ngâchhihpa ta y awpa ta bie amâ taih.

²⁵ Abeipa ta Sawlawmaw cha Izarei saw zydua mohmô liata thata parônahsa ta, Izarei râ liata ano hlâta a bei tuapa ahy hmahta ama to thei leipa, bei rônah ngaitapa châna a patosa.

Dâvi thina

²⁶ Zese sawchapawpa Dâvi cha Izarei saw zydua chô liata a bei ta.

²⁷ Izarei chô liata Dâvi â beina kô zydua cha kô sypalih a châ. Hebraw liata kô sari a bei ta, Zerusale liata kô sythôh nata kô thôh â bei.

²⁸ Bei Dâvi cha chyhsa hneirôhpa nata zachhihpa châ ta, kô hluhpi hroh ta, chhâ a palopa ta thi ha ta. A sawchapawpa Sawlawmaw ta ano su liata â bei.

²⁹ Bei Dâvi hmotaopazy cha âthaona tawhta achhâna taihta hrohsopa Samuela châbu liata zy, hrohsopa Nâthâ châbu liata zy, hrohsopa Kâdâ châbu liata zy ropa a châ.

³⁰ A ryureina thâtih zydua, a thatlôna thâtihzy, ano nata Izarei chô liata hmo a tlôpa thâtihzy nata khizaw hropa lâta khinarâhzy liata hmo a tlôpa thâtihzy chhao ropa a châ hra.