1 THÂTIHZYRONA 28 - Mara Bible RV (BSI)

Izarei sawzy hnohta Dâvi bietapa

¹ Dâvi ta Izarei hyutuhpa zydua, chi hyutuhpazy, bei chakaotuhpa py hyutuhpazy, pheisaih sâh kha hyutuhpazy, pheisaih za kha hyutuhpazy, bei nata a sawchapawzy hmohneipa nata sahroh mohôhtuhpa zydua, pasaiphazy nata a dyuh thaipa pheisaih zydua Zerusale liata awpakhy ta.

² Bei Dâvi cha a kaw duah ta, ama hnohta, “Ei unawhzy nata ei chiheihzy saih u, ei bie nathlie teh u. Abeipa Biehrai Byh a pahâ nawpa nata eima Khazohpa phei tlyna châta o sapa awpa ei palôh liata y ta, sana awpa chhao ei pachhuahpanoh haw.

³ Châhrasala Khazohpa ta ei hnohta, ‘Nâ la adyuhpa chyhsa, thisaih a palopa na châpa vâta, ei moh châta o sa aw va chi,’ na tah ha ta.

⁴ Chatahrasala Abeipa Izarei Khazohpa ta, kei he Izarei bei ta chhâzaw ta y awpa ta, ei paw chhôhkha zydua hry tawhta nâ tlyh ta. Zudâh cha chhituhpa châta a tlyh ta, Zudâh chi tawhta ei paw chhôhkha a tlyh ta, ei paw sawchapawzy hry tawhta kei cha Izarei zydua chô liata bei châ awpa ta a ly kawpa ta nâ tlyh ta.

⁵ Abeipa ta sawchapaw hluhpi na pie ta, ei sawchapawpa Sawlawmaw cha Abeipa khinarâh beidyuchhai liata a tyuh ta, Izarei chô liata ryureih awpa ta a tlyh ta.

⁶ Abeipa ta ei hnohta, ‘Ei o nata ei tlyhmiazy cha na sawchapawpa Sawlawmaw ta a padua aw. Ano cha ei sawchapaw châta a tlyh na ta, kei a paw ei châ aw.

⁷ Ei biepiepazy nata ei pachianazy pachyu kawpa ta a zyh lymâ khiahta cha, tanoh ta a duahmo hawhna heta, chhâzaw châta a khinarâh ei pa-i aw,’ tah ta.

⁸ Chavâta tahmâ Abeipa phopi Izarei saw zydua mohmô liata nata eima Khazohpa theina liana heta, Abeipa nama Khazohpa biepiepa zydua he zyh ta, pachâ awpa ta ei cha pasyu ei. Chatanachata he râh phapa he hnei aw ei chi ta, châ vaw pazi awpa nama pathlazy ta chhâzaw ta ama hnei awpa ryuto râh châta nama paryu pachhuah lymâ aw.

Sawlawmaw hnohta Dâvi bietapa

⁹ “Nâ, Sawlawmaw, ei sawchapawpa y, na paw Khazohpa he pahno la, pathipalôh tlokhuh ta nata tao khona palôh hneipa ta ano cha chakao mah y. Abeipa cha palôh zydua mohtuhpa châ ta, achhuahna nata pachâna zydua pahnotuhpa a châ. Ano cha na tlua khiahta cha, hmô awh chi ta, nâ heihsai khiah deikua cha, chhâzaw ta a cha thy aw.

¹⁰ A chado kaw mah y. Supathaihpa châta o sa awpa ta, Abeipa ta a cha rao. Thatlôpa ta y la, hria mah y,” tah ta.

¹¹ Chatanachata Dâvi ta a sawchapawpa Sawlawmaw cha Achhyna o aikah, a ozy, sôh sopakhynazy, o chô chhôhpadâhpazy, o chhôh chhôhpadâhpazy nata zawngiahna dyuchhai chhôhpadâhpa sa nawpa ta a pachhuapanohziezy pie ta.

¹² Abeipa o dôhpachhôh tlyhmia, tlyhmia a chadôpa chhôhpadâhpa zydua, Khazohpa o sôh sopakhynazy nata hmohlâpa pathaihpa sopakhynazy châta a pachhuapanohnazy chhao pie ta.

¹³ Dâvi ta Sawlawmaw cha theihthaipazy nata Livai pathlazy a py py ta pachhaihzie nata Abeipa o liata chakaona rai zydua hria nawpazie chho ta. Abeipa o liata chakaona rai hria nawpa hmobaoh kyh zydua chhao chho ta.

¹⁴ Chakaona chi nanopazy châta ngôh hmobaoh taona liata ngôh hmâ awpa zie zy, tâkâ hmobaoh taona liata tâkâ hmâ awpa zie zy,

¹⁵ ngôh meiôh patyunazy nata meiôhzy taona châta ngôh hmâ awpa zie zy, meiôh patyuna miakha nata meiôh miakha châta ngôh hmâ awpa zie zy, tâkâ meiôh patyuna miakha nata a meiôhzy châta tâkâ hmâ awpa zie zy cha, chakaona châta meiôh patyuna tao nawpa ta hmâ byuhpa zie lymâ hawhta a chho khai.

¹⁶ Viahchhâ chaluahpa tlâhkhai miakha châta ngôh hmâ awpa zie nata tâkâ tlâhkhaizy châta tâkâ hmâ awpa zie zy;

¹⁷ sa thaonazy, rahôzy nata nyuzy tao nawpa ta ngôh suapa hmâ awpa zie zy; ngôh biebuhzy tao nawpa ta biebuh miakha liata ngôh hmâ awpa zie zy, tâkâ biebuhzy tao nawpa ta biebuh miakha liata tâkâ hmâ awpa zie nata

¹⁸ ngôh suapa ta taopa ropahâhpa raona maisâh châta ngôh hmâ awpa zie zy chho ta. Ngôh cherubi talailih, ama mathlaw pakaipa ta Abeipa Biehrai Byh a khupa tao nawpa châta â chhuanohnazy chhao a chho hra.

¹⁹ Dâvi ta, “He zydua he, Abeipa ta ano ku tlai ta a ropa na pie ta, â chhuahna nata a taozie awpa zydua eina pahnosapa a châ,” tah ta.

²⁰ Chatawhcha Dâvi ta a sawchapawpa Sawlawmaw hnohta, “Thatlôpa nata riahphapa ta y la, hria mah y. Chi leipa la, a ngiaroh khah y, Zehôvâh Khazohpa, ei Khazohpa tlai cha na hnohta a y mâh tâh. Abeipa o raihria zydua patlô khaipa a châ hlâlei, cha siesai leipa aw ta, cha pathlua aw vei.

²¹ Pachâ teh, Kha­zohpa o liata chakaona raihria zydua hria awpa ta theihthaipa nata Livai pyzy y ei ta, rai zydua liata palôh tlâh kawpa ta cha bao awpa ta, kao to liata a saomâpazy na hnohta ama y. Hyutuhpazy nata zawpi zydua chhao, na biehneina ry liata tlokhuh ama y khai aw,” tah ta.