1 THÂTIHZYRONA 26 - Mara Bible RV (BSI)

Chhikao vaituhpa pyzy

¹ Hezy he chhikao vaituhpa ta raopazy ama châ: Kôrâ pathla tawhta Asâpha sawchapawzy hry liata Kôre sawchapawpa Meselemiah raopa a châ.

² Meselemiah ta sawchapawzy hnei ta. A sawchapaw uhtheipa cha Zekaria châ ta, panona Zedia, pathôhna Zebadiah, papalihna Zathânie,

³ papangawhna Elâmi, pacharuna Zehôhanâ nata pasarina Eliehônai zy ama châ.

⁴ Ôbededô cha Khazohpa ta byhnâ pie ta, sawchapawzy sa ta, a sawchapaw uhtheipa cha Semiah châ ta, panona Zehôzabâ, pathôhna Zôah, papalihna Sâkhâ, papangawhna Nethane,

⁵ pacharuna Amie, pasarina Iskâra nata pachariena Pulethai zy ama châ.

⁶ A sawchapawpa Semiah chhao sawchapawzy hnei ta, âmo cha ama pho pawhrâhpazy châ ei ta, chyhsa thatlôpazy ama châ.

⁷ Semiah sawchapawzy cha Ôthani, Repha, Ôbedâ nata Elzabâ zy châ ei ta, ama unawhpa Elihu nata Semakiah zy cha chyhsa thatlôpazy ama châ.

⁸ Ama zydua ta Ôbededô pathlazy châ ei ta, âmo nata ama sawchapawzy nata ama unawhzy cha chakaona rai a hria theipa chyhsa thatlôpazy ama châ. Ôbededô pathlazy cha ama zydua ta maluh sycharu nata pano ama châ.

⁹ Meselemiah ta sawchapaw nata unawh pahrawh hleicharie hnei ta, âmo cha chyhsa thatlôpazy ama châ.

¹⁰ Merâri pathlazy hry liata Hôsâ chhao sawchapawzy hnei ta, Simri cha pawhrâh chaipa a châ. Ano cha sawchapaw uhtheipa a châ lei tarawpa ta, a paw ta pawhrâh chaipa ta a rao.

¹¹ Hôsâ sawchapaw panona cha Hikia châ ta, pathôhna Tebaliah châ ta, papalihna cha Zekaria a châ. Hôsâ sawchapawzy nata a unawhzy cha ama zydua ta pahrawh hleithôh ama châ.

¹² Chhikao vaituhpa pyzy cha, ama unawhzy taozie hawhta, ama pawhrâhpazy moh zipa ta, Abeipa o liata chakaona raihria châta maophaohna raipa ama châ.

¹³ A lai a chyh â lyu khaipa ta, ama chhikao vai awpa chyu cha a chhôh chhôh ta nuby a dao ei ta.

¹⁴ Nochhi chhikao a vaih awpa nuby cha Selemiah chô liata tlu ta. A sawchapawpa Zekariah, ryhraotuhpa so ngaitapa châta chhao, nuby a daopa châ ta, ano vai awpa cha maw chhikao a châ.

¹⁵ Ôbededô vai awpa cha chho chhikao châ ta, a sawchapawzy cha hmo sopakhyna o vaih awpa ta maophaohna piepa ama châ.

¹⁶ Notla chhikao a vaih awpa nuby cha Supi nata Hôsâ chô liata tlu ta, lâpi chakhâpa liata Salekhe chhikao a vaih awpazy ama châ.

¹⁷ Nochhi chhikao cha noh chareih ta pacharu ta vaih ei ta, maw chhikao cha noh chareih papalih ta vaih ei ta, chho chhikao chhao noh chareih papalih ta vaih hra ei ta, hmo sopakhyna o vaituhpa châta pano lymâ ta raopa ama châ.

¹⁸ Notla lâta dôhpachhôh tlyhmia vaituhpa châta lâpi liata papalih sopa châ ta, dôhpachhôh tlyhmia liata pano sopa a châ.

¹⁹ Âmo cha Kôrâ nata Merâri pathlazy tawhta chhikao vaituhpa py pachhaihpazy ama châ.

Sôh avaotuhpa nata hyutuhpa hropazy

²⁰ Livai pathla Ahiza cha Khazohpa sôh sopakhyna o nata hmo pathaihpa sopakhyna o vaituhpa a châ.

²¹ Kesao sawchapawzy cha Lâdâ pathlazy châ ei ta, Lâdâ pathla Kesao pho pawhrâhpa cha Zehieli a châ.

²² Zehieli sawchapawzy cha Zethâ nata a unawhpa Zôela châ ei ta, âmo cha Abeipa o liata sôh sopakhynazy a vaotuhpa ama châ.

²³ Amrâ pathla tawhta Izah pathlazy, Hebraw pathlazy nata Uzie pathlazy chhao Abeipa sôh mohôhtuhpazy ama châ hra.

²⁴ Mawsi sawchapawpa Kesao sawchapawpa Sebua cha sôh sopakhyna avaotuhpa hyutuh chaipa a châ.

²⁵ A unawhzy cha Elieze sawchapawpa Rehabiah, Rehabiah saw­chapawpa Zesai, Zesai sawchapawpa Zôrâ, Zôrâ sawchapawpa Zikari nata Zikari sawchapawpa Selômô zy ama châ.

²⁶ Selômô nata a unawhzy cha Bei Dâvi, pho pawhrâhpazy, pheisaih sâh kha hyutuhpazy, pheisaih za kha hyutuhpazy nata pheisaih hyutuh chaipazy ta ama hlâpa, hmohlâpa pathaihpa sopakhyna zydua avaotuhpa ama châ.

²⁷ Âmo cha adyuhna liata hraona sôh hmôpa, Abeipa o mohôhna nata taopathina châta ama hlâpa a vaotuhpazy ama châ.

²⁸ Hrohsopa Samuela, Kisâ sawchapawpa Sawla, Nerâ sawchapawpa Abane nata Zeru sawchapawpa Zôabâ zy ta ama hlâpa hmo pathaihpazy a vaotuhpa châ ei ta, hmohlâpa pathaihpa zydua cha Selômô nata a unawhzy mohôhna ry liata sopa a châ.

²⁹ Izah pathlazy tawhta Khenaniah nata a sawchapawzy cha, Achhyna o raihriazy piepa châ leipa ei ta, Izarei râh chakaona rai hria awpa ta hyutuhpa nata ryureituhpazy ta raopa ama châ.

³⁰ Hebraw pathlazy tawhta Hâsabiah nata a unawhzy, chyhsa thatlôpa 1,700 zy cha, Zawdâh notla lâta Abeipa raihria zydua nata abei chakaona raihria kyh liata Izarei sawzy a vaotuhpa ama châ.

³¹ Hebraw pathla chhâzy a laichadaina liata, Zeriza cha Hebraw pathlazy hry liata pawhrâh chaipa a châ. Dâvi abeina kô sypalihna kô ta Hebraw pathlazy cha tluapa châ ei ta, Kilia râh liata Zaze khihpi liata Hebraw pathla thatlô riahphapazy hmôpa ama châ.

³² Bei Dâvi ta Zeriza nata a unawh 2,700 zy cha hyutuhpazy ta rao ta. Âmo cha chyhsa thatlôpa nata ama pho pawhrâhpazy châ ei ta, Khazohpa nata a zaopa hmo to nata abei raihria kyh zy liata Rubena chi, Kâdâ chi nata Manase chi khophie hyutuhpa châta raopazy ama châ.