1 THÂTIHZYRONA 25 - Mara Bible RV (BSI)

Pyungiapa pyzy

¹ Dâvi nata pheisaih hyutuhpazy ta Asâpha, Hemâ nata Zeduthu pathlazy cha totâzy, tlaipihzy, paotlâzy tô ta, hrohsona hlazy sa awpa ta panano ei ta. Hezy he pyungiapa chakaona rai a hriapazy ama châ:

² Asâpha sawchapawzy tawhta Zaku, Zawsi, Nethaniah nata Asrelâh zy raopa châ ei ta, âmo cha abei biepiepa hawhta hrohsona hla a satuhpa ama paw Asâpha ta a chhihtha ei.

³ Zeduthu pho tawhta pacharu raopa châ ei ta, chazy cha Zeduthu sawchapawpa Kedaliah, Zeri, Zesai, Simei, Hâsabiah nata Mâtithiah zy ama châ. Âmo cha totâ tôpa ta Abeipa lâta alyna bie a reihpa nata reithaina hla a sapa ama paw Zeduthu ta a chhihtha ei.

⁴ Hemâ pho tawhta Hemâ sawchapaw­pa Bukiah, Mâtaniah, Uzie, Sebua, Zerimô, Hânaniah, Hânani, Eliathâh, Kidâti, Rômatize, Zôbekasâ, Mâlôthi, Hôthi nata Mâhaziô zy raopa ama châ.

⁵ Ama zydua heta abei hrohsopa Hemâ sawchapawzy châ ei ta, Khazohpa ta Hemâ cha sawchapaw pahrawh hleipalih nata sawchanô pathôh pie ta, âmo cha a bietai hawhta Khazohpa a cheihchalo awpazy ama châ.

⁶ Ama zydua ta Khazohpa o liata chakaona rai châta paotlâzy, tlaipihzy totâzy tôpa ta, ama paw chhihthana ry liata Abeipa o liata pyungiapa lâchhâh chakaona rai hriatuhpazy ama châ. Asâpha, Zeduthu nata Hemâ zy cha abei biepiepa ry liata a ypa ama châ.

⁷ Ama maluh cha, Abeipa hla sa awpa ta pachupa, hlasathaipa ama unawhzy chhaota 288 ama châ.

⁸ Chatanachata a lai a chyh, pachutuhpa nata achupa, ama zydua ta â lyupa ta ama tao awpa nuby amâ dao lymâ.

⁹ Nuby miakhana cha Asâpha sawchapawpa Zawsi nata a unawhzy nata a sawchapawzy chô liata tlu ta, pahrawh hleino ama châ. Mianona cha Kedaliah nata a unawhzy nata a sawchapawzy chô liata tlu ta, pahrawh hleino ama châ.

¹⁰ Miathôhna cha Zaku nata a sawchapawzy nata a unawhzy chô liata tlu ta, pahrawh hleino ama châ.

¹¹ Miapalihna cha Izri nata a sawchapawzy nata a unawhzy chô liata tlu ta, pahrawh hleino ama châ.

¹² Miapangawhna cha Nethaniah nata a sawchapawzy nata a unawhzy chô liata tlu ta, pahrawh hleino ama châ.

¹³ Miacharuna cha Bukiah nata a sawchapawzy nata a unawhzy chô liata tlu ta, pahrawh hleino ama châ.

¹⁴ Miasarina cha Zesarelâh nata a sawchapawzy nata a unawhzy chô liata tlu ta, pahrawh hleino ama châ.

¹⁵ Miachariena cha Zesai nata a sawchapawzy nata a unawhzy chô liata tlu ta, pahrawh hleino ama châ.

¹⁶ Miachakina cha Mâtaniah nata a sawchapawzy nata a unawhzy chô liata tlu ta, pahrawh hleino ama châ.

¹⁷ Miahrawhna cha Simei nata a sawchapawzy nata a unawhzy chô liata tlu ta, pahrawh hleino ama châ.

¹⁸ Hleikhana cha Azare nata a sawchapawzy nata a unawhzy chô liata tlu ta, pahrawh hleino ama châ.

¹⁹ Hleinona cha Hâsabiah nata a sawchapawzy nata a unawhzy chô liata tlu ta, pahrawh hleino ama châ.

²⁰ Hleithôhna Subia nata a sawchapawzy nata a unawhzy chô liata tlu ta, pahrawh hleino ama châ.

²¹ Hleipalihna cha Mâtithiah nata a sawchapawzy nata a unawhzy chô liata tlu ta, pahrawh hleino ama châ.

²² Hleipangawhna cha Zeremô nata a sawchapawzy nata a unawhzy chô liata tlu ta, pahrawh hleino ama châ.

²³ Hleicharuna cha Hânaniah nata a sawchapawzy nata a unawhzy chô liata tlu ta, pahrawh hleino ama châ.

²⁴ Hleisarina cha Zôsbekâsâh nata a sawchapawzy nata a unawhzy chô liata tlu ta, pahrawh hleino ama châ.

²⁵ Hleichariena cha Hânani nata a sawchapawzy nata a unawhzy chô liata tlu ta, pahrawh hleino ama châ.

²⁶ Hleichakina cha Mâlôthi nata a sawchapawzy nata a unawhzy chô liata tlu ta, pahrawh hleino ama châ.

²⁷ Miakihna cha Eliathâh nata a sawchapawzy nata a unawhzy chô liata tlu ta, pahrawh hleino ama châ.

²⁸ Miakih nata miakhana cha Hôthi nata a sawchapawzy nata a unawhzy chô liata tlu ta, pahrawh hleino ama châ.

²⁹ Miakih nata mianona cha Kidâti nata a sawchapawzy nata a unawhzy chô liata tlu ta, pahrawh hleino a châ.

³⁰ Miakih nata miathôhna cha Mâhaziô nata a sawchapawzy nata a unawhzy chô liata tlu ta, pahrawh hleino ama châ.

³¹ Miakih nata miapalihna cha Rômatize nata a sawchapawzy nata a unawhzy chô liata tlu ta, pahrawh hleino ama châ.