1 THÂTIHZYRONA 24 - Mara Bible RV (BSI)

Theihthaipazy raihria

¹ Arawna pathlazy cha he hawhta a py py ta pachhaihpa ama châ. Arawna sawchapawzy cha Nâdâ, Abihu, Eliaza nata Ithamâ zy châ ei ta,

² Nâdâ nata Abihu cha ama paw thi hlâta thi ha ei ta, saw hnei veih ei. Chavâta Eliaza nata Ithamâ ta theihthaipa rai cha ama hria.

³ Dâvi ta theihthaipazy cha ama maophaohna chyu hria awpa ta, a py py ta pachhaih ta, Eliaza pathla Zadô nata Ithamâ pathla Ahimele ta Dâvi cha ama bao.

⁴ Ithamâ pathlazy lia hlâta Eliaza pathlazy liata pawhrâhpazy ama hluh viapa vâta, Eliaza pathlazy cha a chhôh chhôh ta pachhaihpa ta, pawhrâhpa pahrawh hleicharu raopa châ ei ta, Ithamâ pathlazy tawhta pacharie raopa ama châ.

⁵ Eliaza pathlazy nata Ithamâ pathlazy liata hyutuhpazy cha, hyutuhpa pathaihpa nata Khazohpa hyutuhpazy ama châ khaipa vâta, ama chakaona rai hria awpazy cha, nuby a daopa ta, â lyupa ta pachhaihpa a châ.

⁶ Ama raihria awpa nata ama mohzy cha, Livai pathla chârohtuhpa Nethane sawchapawpa Semiah ta bei nata hyutuhpazy, theihthaipa Zadô, Abiathâ sawchapawpa Ahimele, theihthaipa chhôhkha pawhrâhpazy nata Livai pathla pawhrâhpazy mohmô liata ama moh roh ta, Eliaza nata Ithamâ châta chhôhkha miakha chyu a tlyhpa a châ.

⁷ Nuby miakhana cha Zehôiari chô liata tlu ta, mianona Zediah,

⁸ miathôhna Hâri, miapalihna Seôri,

⁹ miapangawhna Mâkia, miacharuna Mizami,

¹⁰ miasarina Hâkô, miachariena Abiza,

¹¹ miachakina Zesua, miahrawhna Sekaniah,

¹² hleikhana Eliasi, hleinona Zaki,

¹³ hleithôhna Hupâ, hleipalihna Zesebia,

¹⁴ hleipangawhna Bilkâ, hleicharuna Ime,

¹⁵ hleisarina Hezi, hleichariena Hâpize,

¹⁶ hleichakina Pethâhiah, miakihna Zeheke,

¹⁷ miakih nata miakhana Zaki, miakih nata mianona Kamu,

¹⁸ miakih nata miathôhna Delia nata miakih nata miapalihna Mâzai zy ama châ.

¹⁹ Âmo cha Abeipa, Izarei Khazohpa ta ama pathlatuhpa Arawna hnohta bie a piepa hawhta, ama nuby lymâ hawhta Abeipa o chhôh liata chakaona rai hria awpa ta raopa ama châ.

²⁰ Hezy he Livai pathla pawhrâh hropazy ama châ: Amrâ sawchapawzy hry tawhta Subia cha pawhrâhpa châ ta, Subia sawchapawzy hry tawhta Zediah cha pawhrâhpa a châ.

²¹ Rehabiah pho liata, Rehabiah sawchapawpa Isiah cha pawhrâh chaipa a châ.

²² Izah pho liata Selômô cha pawhrâh chaipa châ ta, Selômô sawchapawzy hry liata Zahâ cha pawhrâh chaipa a châ.

²³ Hebraw sawchapawzy hry liata Zeriah cha pawhrâh chaipa châ ta, panona Amaria, pathôhna Zahâzie nata papalihna Zekamia zy ama châ.

²⁴ Uzie sawchapawzy hry liata Mikâ cha pawhrâh chaipa châ ta, Mikâ sawchapawzy hry liata Sâmi cha pawhrâh chaipa a châ.

²⁵ Mikâ unawhpa cha Isiah châ ta, Isiah sawchapawzy hry liata pawhrâh chaipa cha Zekaria a châ.

²⁶ Merâri sawchapawzy cha Mâhli nata Musi ama châ. Zaziah sawchapawzy hry liata pawhrâh chaipa cha Benô a châ.

²⁷ Merâri pathla pawhrâh chaipazy cha Zaziah pho tawhta Benô, Sôhâ, Zaku nata Ibari zy châ ei ta,

²⁸ Mâhli pho tawhta Eliaza châ ta, ano cha sawchapaw hnei vei.

²⁹ Kisâ pho liata pawhrâh chaipa cha Kisâ sawchapawpa Zerame a châ.

³⁰ Musi sawchapawzy cha Mâhli, Ede nata Zerimô zy ama châ. Âmo cha a pho pho ta a laichadaipa ta Livai pathla pawhrâhpazy ama châ.

³¹ Âmo chhao cha ama unawhpa Arawna sawchapawzy hawhna khata, Bei Dâvi, Zadô, Ahimele, theihthaipazy nata Livai pathla chhôhkha pawhrâhpazy mohmô liata nuby a dao hra ei ta, chhôhkha pawhrâh chaipa nata a unawh seihnai viapazy chhao, â lyupa ta nuby amâ dao khai.