1 THÂTIHZYRONA 23 - Mara Bible RV (BSI)

Livai mo raizy

¹ Dâvi cha hroh pareih kaw ta, chhâ â palo nawpa daihti â hnia nahta, a saw­chapawpa Sawlawmaw cha Izarei bei ta tao ta.

² Dâvi ta Izarei chhituhpa zydua nata theihthaipazy nata Livai pathlazy awpakhy ta.

³ Livai pathla kô sythôh tawhta chô lâ maluh reipa châ ei ta, pitlohpa chapaw 38,000 ama châ.

⁴ Dâvi ta, “Livai pathla 24,000 zy cha Abeipa o sana liata hyutuhpazy châ aw ei ta, 6,000 Abeipa o liata hyutuhpazy nata ryureituhpazy châ aw ei ta,

⁵ 4,000 chhikao vaituhpazy châ aw ei ta, 4,000 zy cha reithaina hla sa nawpa ta pyungiapa chhaichhi ei taopazy hmâpa ta Abeipa lâta reithaina hla satuhpazy ama châ aw,” tah ta.

⁶ Chatawhcha Dâvi ta Livai sawchapawzy, Kesao nata Kôhâ nata Merâri zy cha a py py ta pachhaih ta.

⁷ Kesao sawchapawzy cha Lâdâ nata Simei ama châ.

⁸ Lâdâ sawchapawzy cha, pawhrâh chaipa Zehie châ ta, a pazipa ta Zethâ nata Zôela châ ei ta, pathôh ama châ.

⁹ Simei sawchapawzy cha Selômô, Hâzi nata Harânâ zy châ ei ta, pathôh ama châ. Âmo cha Lâdâ pathla pawhrâhpazy ama châ.

¹⁰ Simei sawchapawzy cha Zahâ, Zinâ, Zeu nata Beriah zy ama châ. Cha papalihzy cha Simei sawchapawzy ama châ.

¹¹ Zahâ cha pawhrâh chaipa châ ta, Zizah ta a pazi. Zeu nata Beriah deikua cha, sawchapaw hnei hluh veih ei. Chavâta chhôhkha miakhapa hawhta reipa ama châ.

¹² Kôhâ sawchapawzy cha Amrâ, Iza, Hebraw nata Uzie zy châ ei ta, papalih ama châ.

¹³ Amrâ sawchapawzy cha Arawna nata Mawsi ama châ. Arawna cha hmo pathaihpazy hria awpa ta pananopa châ ta, ano nata a pathlazy cha ropahâhpazy Abeipa hmiakô liata a rao tyh awpazy châ ei ta, Abeipa chakaopa ta, a moh ta byhnâ a aw tyh awpazy ama châ.

¹⁴ Khazohpa chyhsa Mawsi sawchapawzy chhao Livai chi hry liata pahlaopa ama châ.

¹⁵ Mawsi sawchapawzy cha Kesao nata Elieze ama châ.

¹⁶ Kesao­ sawchapawzy hry liata uhthei chaipa cha Sebua a châ.

¹⁷ Elieze sawchapaw uhtheipa cha Rehabiah a châ. Elieze cha sawchapaw hropa hnei leipa ta, Rehabiah deikua cha sawchapaw hluhpi a hnei.

¹⁸ Izah sawchapawzy hry liata pawhrâh chaipa cha Selômi a châ.

¹⁹ Hebraw sawchapawzy liata pawhrâh chaipa cha Zeriah châ ta, panona Amaria, pathôhna Zahâzie nata papalihna Zekamia zy ama châ.

²⁰ Uzie sawchapawzy hry liata pawhrâh chaipa cha Mikâ châ ta, panona Isiah a châ.

²¹ Merâri sawchapawzy cha Mâhli nata Musi ama châ. Mâhli sawchapawzy cha Eliaza nata Kisâ ama châ.

²² Eliaza cha sawchapaw hnei leipa ta, sawchanôzy deita hneipa ta thi ha ta. A sawchanôzy cha ama chiheihpa Kisâ sawchapawzy ta lapinô ta ama hnei.

²³ Musi sawchapawzy cha Mâhli, Ede nata Zeremô zy châ ei ta, pathôh ama châ.

²⁴ Âmo cha a chhôh chhôh ta pawhrâhpazy tawhta a laichadaipa Livai pathlazy châ ei ta, kô kih tawhta chô lâ, Abeipa o liata chakaona rai a hria thei awpazy ama châ.

²⁵ Dâvi ta, “Abeipa, Izarei Khazohpa ta a chyhsazy apahâna pie ta, Zerusale liata chhâzaw ta a pahrâ hapa vâta,

²⁶ Livai pathlazy ta achhyna byureih nata a chakaona raihria nawpa hmobaoh kheihawhpa hmahta amâ sy awpa byuh khao vei,” tah ta.

²⁷ Dâvi biepiepa hnôhchaipa hawhta, kô kih tawhta chô lâ Livai pathla maluh cha reipa a châ.

²⁸ Ama maophaohna cha Abeipa o chakaona raihria liata Arawna sawchapawzy bao awpa châ ta, tlyhmiazy nata chhôhpadâhpazy mohôh ei ta, hmo pathaihpa zydua pasi tyh ei ta, Khazohpa o liata chakaona rai hropazy ama hria tyh.

²⁹ Tlâhkhai liata viahchhâ chaluah awpa patohpatiana kyh liata zy, niepa hlâna viahdie patohpatiana kyh liata zy, viahchhâ thinô pahlao leipa châta viahchhâ papa patohpatiana kyh liata zy, viahchhâ pakâhpa hlâ awpa patohpatiana kyh liata zy, sathaw pahlaopa hmohlâpa patohpatiana kyh liata zy, a hluhna nata a laina panuana kyh zy liata chhao, Arawna pathlazy baotuhpa ama châ.

³⁰ My chareih ta a duah ei ta, Abeipa lâ alyna bie reipa ta ano reithai ei ta, zâlâ chhao cha hawhta ama tao tyh.

³¹ Pahânohzy, thla thiehpazy nata kyhchhi noh hropazy liata raopa hlânazy hlâ tita, baotuh awpa raopa zie lymâ hawhta, Abeipa hmiakô liata khâ amâ duah tyh.

³² Ahmaohna poh o nata su pathaihpa mohôhna kyh liata chhao maophaohna piepa châ ei ta, Abeipa o chakaona raihria liata Arawna sawchapawzy nata ama unawhzy ama bao tyh.