1 THÂTIHZYRONA 22 - Mara Bible RV (BSI)

Achhyna o sa awpa ta achhuanohna

¹ Dâvi ta, “He su liana heta Zehôvâh Khazohpa o y aw ta, he su liana heta Izarei châta raopa hlâna maisâh a y aw,” tah ta.

² Dâvi ta Izarei râh liata chihropa a ypazy awpakhy awpa ta biepie ta. Alô a khai thaipazy cha Khazohpa o sa nawpa châta alô khai awpa ta rao ta.

³ Dâvi ta dôhna chhikaozy khaipâ nawpa nata a patusanazy châta thua hluhpi a chhuanoh ta. Dawh hluhpi a chhuanoh hra ta, â hrina zie pathliah tiah awpa chhao châ vei.

⁴ Sidaw mo nata Tyre mo ta Dâvi cha sidy tho hluhpi vaw pie ei ta, chavâta Khazohpa o sa nawpa ta, sidy tho chhao rei tiah lei â chhuanoh.

⁵ Dâvi ta, “Ei sawchapawpa Sawlawmaw cha hawtipa châ ta, hmo yzie pahno tu mâh leipa ta, Abeipa châta o sa awpa hra cha, râh zydua liata a pathâhpa o laipa nata rônahpa a châ awpa châ tlôh ta. Chavâta Khazohpa o sa nawpa cha kei ta ei chhuanoh chhielie aw,” tah ta. Chatanachata Khazohpa o sa nawpa chhaichhi zydua cha Dâvi ta a thi hlâta â chhuanoh khai haw.

⁶ Chatawhcha Dâvi ta a sawchapawpa Sawlawmaw cha aw ta, Abeipa, Izarei Khazohpa o sa awpa ta biepie ta.

⁷ Dâvi ta a sawchapawpa Sawlawmaw hnohta, “Ei sawchapawpa y, Abeipa ei Khazohpa moh châta o sa awpa ei palôh liata y ta.

⁸ Châhrasala Abeipa bie ei hnohta vaw tlô ta, ‘Nâ la thisaih thata palo chi ta, adyuhna ru ngaitapazy a dyuhpa ta, ei hmiakô liata alei chô liata thisaih thata na palopa vâta, ei moh châta o sa aw va chi.

⁹ Pachâ teh, sawchapawpa sa aw chi ta, ano cha adyhna a khohpa a châ aw. A chheipâh râhzy liata a chariah zydua nata a dyryhpa ta paysa aw na ta, apahâna ei pie aw. A moh cha Sawlawmaw châ aw ta, ano daihti liata la, Izarei râh liata thlalôhna nata abohna ei paysa aw.

¹⁰ Ano ta ei moh châta o a sa aw. Ano cha ei sawchapawpa châ aw ta, kei a paw ei châ aw. Â beina beidyuchhai cha Izarei râh liata chhâzaw châta ei padua aw,’ tahpa ta na chho ha ta.

¹¹ “Chavâta ei sawchapawpa y, Abeipa na hnohta y mawh sy. Thlaochhipa ta y lymâ la, Abeipa ta na kyh a vaw rei chhielie hapa hawhta, hlaotloh kawpa ta Abeipa na Khazohpa o cha sa mah y.

¹² Abeipa ta Izarei chô liata biehneina a cha pie tita, Abeipa na Khazohpa ryhpa na zyh thei nawpa ta, Abeipa ta sona nata novâhna cha pie mawh sy.

¹³ Abeipa ta Mawsi hnohta Izarei châta bieraopa nata pachiana a piepazy kha na zyh khiahta cha, thlaochhipa ta na y lymâ aw. Thatlôpa nata riahphapa ta y mah y. Chi leipa la, ngiaroh khah y.

¹⁴ Riethei thata taopa ta, Abeipa o châta ngôh talent thy hrawh nata tâkâ talent thy za kha a chhuanoh ha na ta, dawh nata thua chhao â hrina zie kho pathliah tiah lei ta hluhpa ta ei chhuanoh haw. Tho nata lô chhao ei chhuanoh khai haw. Chazy cha na vaw baichha aw.

¹⁵ Raihriatuhpa hluhpi na hnei. Alô a patlaw thaipazy, alô a khai thaipazy, tho zôthaipazy nata zôthaipa chi nanopazy rei tiah lei na hnei.

¹⁶ Ngôh, tâkâ, dawh nata thua rai a hria thaipazy hluhpi na hnei hra. Thyu la, hria teh! Abeipa na hnohta y mawh sy!” tah ta.

¹⁷ Dâvi ta Izarei chhituhpa zydua cha a sawchapawpa Sawlawmaw bao awpa ta biepie ta, ama hnohta,

¹⁸ “Abeipa nama Khazohpa nama hnohta y vei ma? Su to liata apahâna cha pi ha veih ei ma? He râh liata a pahrâpazy cha Abeipa ta ei ku liata na pie ta, Abeipa nata a phopi hmiakô liata ama râh cha panawhpa ta a y haw.

¹⁹ Tahmâ nama pachâna nata nama palôh cha Abeipa nama Khazohpa padona lâta pahei u la, thyu u la, Zehôvâh Khazohpa supathaihpa cha sa muh vy. Chatanachata Abeipa Biehrai Byh nata Khazohpa hmobaoh pathaihpazy cha Abeipa moh châta sapa o liata a ngiakheipa a châ aw,” tah ta.