1 THÂTIHZYRONA 21 - Mara Bible RV (BSI)

Maluhpi reina ta potlana a tlôkhei

¹ Sâtâ ta Izarei a dyuh awpa ta thyu ta, Izarei maluhpi rei awpa ta Dâvi cha reipasao ta.

² Dâvi ta Zôabâ nata pheisaih hyutuhpazy hnohta, “Sie u la, Besebâ tawhta Dânâ taihta Izarei sawzy maluh reih u la, ama maluh zie ei pahno thei nawpa ta, na vaw chho heih muh vy,” tah ta.

³ Zôabâ ta, “Abeipa ta a phopi he a lie za hluhpi ta papôh mawh sy! Ei zibeipa abei y, râhsaw zydua he ei zibeipa chakaotuhpa sai châ veih ei ma? Khâpa vâta ma ei zibeipa heta he hmo he tao awpa a khoh tly? He hmo heta khazia Izarei chô liata thaileichâna a tlôkhei aw tly?” tah ta.

⁴ Châhrasala abei bie ta Zôabâ cha pahnie ha ta. Chatanachata Zôabâ cha pua ta, Izarei râh zydua a chahryh khai tawhta Zerusale lâ a vaw lie ta.

⁵ Zôabâ ta Izarei phopi maluh pahlyhpakhypa cha Dâvi chho ta. Izarei râh zydua liata, zaozi a chaba theipa chapaw 1,100,000 y ei ta, Zudâh râh liata 470,000 ama y.

⁶ Zôabâ cha bei biepiepa kyh liata a palôh a châ lei ngaitapa vâta, Livai chi nata Benzami chi deikua ama maluh rei pâ khao vei.

⁷ Cha hawhta Izarei maluhpi reipa cha Khazohpa a ly leipa ta, chavâta Khazohpa ta Izarei sawzy cha hrie ta.

⁸ Dâvi ta Khazohpa hnohta, “Ei hmotaopa vâna heta ei vaw molei ngaita kaw na. Châhrasala tahmâ ei châ haw na, châ chakaotuhpa paraona he rie a ngiahthai mah y. Hru kawpa ta hmo ei vaw tao haw,” tah ta.

⁹ Abeipa ta Dâvi hrohsopa Kâdâ hnohta,

¹⁰ “Vawh la, Dâvi hnohta, ‘Abeipa ta hetana heta a tah: A tlyh awpa hmo miathôh cha pie na ta, miakha a tlyh aw chi ta, cha cha ei cha taopa aw, a tah na,’ tahpa ta na kei chho aw,” tah ta.

¹¹ Kâdâ cha Dâvi lâ vawh ta, a hnohta, “Abeipa ta hetana heta a tah, ‘Na khopa a tlyh teh.

¹² Kô thôh chakâhna ma, thla thôh chhôh na chariahzy ta cha chadaipa ta ama zaozi ta ama cha pahleipadia awpa ma, noh thôh chhôh Abeipa zaozi ta potlana patlôsapa ta, Abeipa vâlyuhchâpa ta Izarei râh zydua a pahleipadia khai awpa ma?’ Tahmâ a tlyh teh, nâ vaw tuatuhpa hnohta kheihawhpa achhyna ma ei tlôkhei aw,” tah ta.

¹³ Dâvi ta Kâdâ hnohta, “Ei nô a po ngaita. Abeipa ku liata ei pao thlu aw, ano cha zawngiah thei ngaitapa châ tlôh ta. Chyhsapa ku liata la na papaosa khah y,” tah ta.

¹⁴ Chatanachata Abeipa ta Izarei chô liata potlana patlôsa ta, Izarei chyhsa 70,000 thi ei ta.

¹⁵ Zerusale pahleipadia awpa ta Khazohpa ta vâlyuhchâpa tuah ta, châhrasala pahleipadia awpa â chhuah hai nota, Abeipa ta hmô ta, chhiena patlôsa â chhuahpa cha a pathleih haw. Abeipa ta pahleipadiana rai a hria haipa vâlyuhchâpa hnohta, “Â daih haw, na ku hy khao khah y,” tah ta. Abeipa vâlyuhchâpa cha Zebu chyhsa Ôranâ sawhri kiapâh liata a duah ta.

¹⁶ Dâvi cha mohmia pasaih ta, alei nata avâ likawh liata â duah thlâh hapa Abeipa vâlyuhchâpa hmô ta. A ku liata zaozi â chabapa cha Zerusale chô liata pazawh ta. Dâvi nata machâzy cha latho poh a bupa ta alei liata â khu lâta pao ei ta.

¹⁷ Dâvi ta Khazohpa hnohta, “Phopi maluh reih awpa ta bie a piepa kha keima châ va na ma? A moleipa nata paraona lai ngaitapa a taotuhpa cha keima tlai he ei châ. He mietakuzy heta khâpa hmo ma ama parao tly? Hy Abeipa ei Khazohpa y, kei nata ei chhôhkha chô liata na ku tlao pathla la, potlana he na phopi chô liata rie chareisa khao khah y,” tah ta.

Dâvi ta maisâh a tao

¹⁸ Chatawhcha Abeipa vâlyuhchâpa ta Kâdâ hnohta, Dâvi cha khy sala, Zebu chyhsa Ôranâ sawhri liata Abeipa châta maisâh tao awpa ta Dâvi hnohta chho awpa ta biepie ta.

¹⁹ Kâdâ ta Abeipa moh ta a reipa bie hawhta Dâvi cha khy ta.

²⁰ Ôranâ cha bâli sâh tly ngâ ta. A kei heih ta, vâlyuhchâpa kei hmô ta, a hnohta a ypa a sawchapaw papalihpazy cha a nyu ei ta.

²¹ Dâvi ta Ôranâ kô a kei tlô nahta, Ôranâ cha a vaw heih ta, Dâvi cha hmô ta, sawhri tawhta pua ta, a hmia alei lâ a bôhpa ta Dâvi cha a naoh ta.

²² Dâvi ta Ôranâ hnohta, “Potlana hri he zawpi tawhta a pai thei nawpa ta, he sawhrihmo he Abeipa châta maisâh ei tao nawpa ta na pie teh; a mâ dopa ei cha pie aw,” tah ta.

²³ Ôranâ ta Dâvi hnohta, “Hnei mah y, ei zibeipa abei ta pha na tahpa hawhta tao mah y. Moh tua, raopa hlânazy châta viahchao tôhpazy cha pie pâ na ta, niepa hlâna châta sawhri chhaichhi thozy nata âtâ sâhzy ei cha pie pâ. A zydua ta ei cha pie khai,” tah ta.

²⁴ Châhrasala Bei Dâvi ta Ôranâ hnohta, “Châ vei, a mâ dopa ei cha pie aw. Na eih cha Abeipa châta a saipa ta la leipa aw na ta, ei hryuhna rai y leipa ta raopa hlânazy hlâ aw va na,” tah ta.

²⁵ Chatanachata Dâvi ta sawhrihmo chaleina châta ngôh sekel 600 khopathliah ta, Ôranâ cha pie ta.

²⁶ Dâvi ta cha liata Abeipa châta maisâh tao ta, raopa hlânazy nata aryhna hlânazy hlâ ta. Abeipa pado ta, Abeipa ta avâ tawhta mei ta a zâ chhy ta, raopa hlâna chô liata mei za tla ta.

²⁷ Chatawhcha Abeipa ta vâlyuhchâpa cha biepie ta, a zaozi cha a paih liata khô ha ta.

²⁸ Dâvi ta Zebu chyhsa Ôranâ sawhrihmo liata Abeipa ta â vaw chhypa a hmô nahta, cha liata atheihna hlâ ta.

²⁹ Cha nona cha, Mawsi ta râhchawhpa liata Abeipa achhyna byureih nata raopa hlâna maisâh a taopazy kha Kibiô khihpi su sâhpa liata y thlâh ha chy ta.

³⁰ Châhrasala Dâvi cha Abeipa vâlyuhchâpa zaozi a chipa vâta, Khazohpa a saohiah awpa ta, cha su lâ cha sie ngâh vei.