1 THÂTIHZYRONA 20 - Mara Bible RV (BSI)

Dâvi ta Râbâ a la

¹ Beizy hrâ ama sie tyhna châhvâ daihti liata, Zôabâ cha pheisaih hluhpi a chhipa ta hrâsiena lâ pua ta. Amawna râh parao ta, sie ta Râbâ khihpi dôh ta. Dâvi deikua cha Zerusale liata y ta. Zôabâ ta Râbâ khihpi cha a dyuh ta, pahnie ta.

² Dâvi ta ama bei beilakho cha a luh tawhta la ta, ngôh talent miakha â hripa ta pahno ta. Lôsôhpazy chhao a chhôh liata y ta, cha cha Dâvi luh liata pakho ei ta. Khihpi hraona sôh hluhpi chhao vaw phaoh ta.

³ Râbâ khihsawzy cha puakhei ta, thoânazy, leipaliena thua pazaopazy nata ahreizy hmâpa ta raihriatuhpazy ta âmo cha hmâh ta. Cha hawhna chata Dâvi ta Amawna khihpi zydua cha tao ta. Cha khai tawhta Dâvi nata pheisaih zydua cha Zerusale lâ a lie ha ei ta.

Philistinâ mopahreihpazy adyuhna

⁴ Cha khai tawhta Philistinâ mo nata adyuhna Keze khihpi liata y ta. Husâ chyhsa Sibekai ta Sipai thie ta. Sipai cha mopahreihpazy pathla hry liatapa a châ. Chatanachata Philistinâ mo cha panawhpa ta y ha ei ta.

⁵ Philistinâ mo nata adyuhna y heih ta. Zairâ sawchapawpa Ehânâ ta Kiti chyhsa Kôliathâ unawhpa Lâmi thie ta. Lâmi asei bih cha thaisana batlâh tlu ta a laipa a châ.

⁶ Kâthâ liata adyuhna y heih ta. Cha khihpi liata chyhsa mopahreih ngaitapa, a ku chavei chachâh ta kuparo miacharu hnei ta, a phei chavei chachâh ta pheiparo miacharu a hneipa, a zydua ta kuparo nata pheiparo mia kih nata miapalih a hneipa y ta. Ano chhao cha mopahreihpazy pathla châ ta.

⁷ Cha chyhsa chata Izarei sawzy cha pahao ta, Dâvi unawhpa Simia sawchapawpa Zawnathâ ta a thie haw.

⁸ Âmo cha Kâthâ liata mopahreih­pazy pathla châ ei ta, Dâvi nata a chyhsazy ku liata a thipazy ama châ.