1 THÂTIHZYRONA 19 - Mara Bible RV (BSI)

Aramia mo nata Amawna mo pahniena

¹ Cha khai tawhta, Amawna bei Nahâsâ cha thi ta, a sawchapawpa ta ano su liata a bei ta.

² Dâvi ta, “Nahâsâ sawchapawpa Hânu cha, a paw ta ei chô liata phana a palâsa tyhpa hawhta, kei chhao ta chô liata phana ei palâsa hra aw,” tah ta. Chatanachata a paw thina kyh liata thlapalôh awpa ta, Dâvi ta Hânu lâ lyuhchâpazy tuah ta. Dâvi chakaotuhpazy cha Hânu thlapalôh awpa ta Amawna râh kei tlô ei ta.

³ Châhrasala Amawna pawhrâhpazy ta Hânu hnohta, “Dâvi heta na paw a zapa vâta thlapalôhtuhpazy nâ lâ a vaw tuapa a châ tahpa na pangiasa ma? Râh thâtih patluah ta, râh mohparu ta parao awpa ta, a chakaotuhpazy a vaw tuapa châ vei ma?” tah ei ta.

⁴ Hânu ta Dâvi chakaotuhpazy cha patu ta, ama kâhhmizy ngyu ta, ama viahkaozy â khophie liata, ama chaosa dady ta tai ta, âmo cha pakuasa ha ta.

⁵ Chakaotuhpazy hmo a tyhpa cha Dâvi chho ei ta. Chakaotuhpazy cha ama noza kaw ta, chavâta Dâvi ta âmo dy awpa ta chyhsazy tuah ta. Abei ta, “Nama kâhhmi a seih hlâlei Zerikô liata y chy u la, cha khai tawhta a vy lah vâ ei chi,” tah ta.

⁶ Amawna mo ta Dâvi châta roh chhiepa ama châ haw tahpa amâ pahno nahta, Hânu nata Amawna mo ta talailih nata arâ pheisaihzy a hlâ nawpa ta Mesôpôtamia, Aramiamâkâ nata Zôbâ râhzy lâ tâkâ talent 1,000 paphao ei ta.

⁷ Mâkâ bei nata a pheisaihzy nata talailih 32,000 a hlâh ei ta. Pheisaihzy cha Medebâ kiapâh liata riehmo paryh ei ta. Amawna mo cha ama khihpizy tawhta puapakhy ei ta, a dyuh awpa ta sie ei ta.

⁸ Cha thâtih cha Dâvi ta a thei nahta, Zôabâ nata pheisaih riahphapa zydua tuah ta.

⁹ Amawna mo cha vaw pua ei ta, a dyuh awpa ta khihpi chhikao liata a paziah ei ta. Adyuhna lâ a sie hrapa ama beizy cha âmo dei ta lyurâhpa liata y ei ta.

Amawna mo nata Aramia mo pahniepa a châ

¹⁰ Zôabâ ta a hmia a hnôh ta amâ vaw dyuhpa a hmô nahta, Izarei pheisaih pha chaipazy a tlyh ta, Aramia mo a dyuh awpa ta âmo cha paziah ta.

¹¹ A pheisaih hropazy cha a unawhpa Abisai ku liata soh ta, Amawna mo a dyuh awpa ta paziah ta.

¹² Zôabâ ta, “Ei châta Aramia mo ama tha a tlô tu khiahta cha, na vaw bao aw chi ta, Amawna mo na châta ama tha a tlô tu khiahta cha, ei cha vaw bao aw.

¹³ Riahphapa ta y u la, eima phopi nata eima Khazohpa khihpizy châta eima thatlônazy hmâh suh vy. Abeipa ta pha a tahpa hawhta tao mawh sy,” tah ta.

¹⁴ Zôabâ nata a pheisaihzy cha Aramia mo a dyuh awpa ta a kei hnia ei ta, Aramia mo cha Zôabâ hmiakô liata a râpai ha ei ta.

¹⁵ Aramia mo amâ râpai hapa Amawna mo ta ama hmô nahta, âmo chhao cha Zôabâ unawhpa Abisai hmiakô liata a râpai ei ta, khihpi liata amâ ngia haw. Chatawhcha Zôabâ cha Zerusale lâ a lie ha ta.

¹⁶ Aramia mo cha Izarei ta a pahnie hapa ei ama pahno nahta, Ufrâti chavah haosâ lâta a ypa Aramia mo aw awpa ta lyuhchâpazy tuah ei ta. Aramia mo cha Hadâdeze pheisaih hyutuhpa Sopha chhihthana ry liata a vy ei ta.

¹⁷ Cha thâtih cha Dâvi chho ei ta, Izarei pheisaih zydua awpakhy ta. Zawdâh chaka ei ta, Aramia mo yna kei tlô ei ta, a dyuh awpa ta a paziah ei ta. Dâvi ta Aramia mo a dyuh awpa ta a pheisaihzy a paziah khai nahta, ano chhaota Aramia mo cha a dyuh ei ta.

¹⁸ Aramia mo cha Izarei sawzy hmiakô liata a râpai ha ei ta. Dâvi ta Aramia mo arâ pheisaih 7,000 nata alei pheisaih 40,000 zy thie ta, pheisaih hyutuhpa Sopha chhao a thie haw.

¹⁹ Hadâdeze chakaotuhpazy ta Izarei sawzy hmiakô liata pahniepa ta ama ypa ama hmô nahta, Dâvi nata aryhna tao ei ta, Dâvi ryureina ry liata y ha ei ta. Aramia mo ta Amawna mo cha pachha khoh khao veih ei.