1 THÂTIHZYRONA 18 - Mara Bible RV (BSI)

Dâvi ta râh a pakawh

¹ Cha hnôh lâta Dâvi ta Philistinâ mo a dyuh ta, pahnie ta, Kâthâ khihpi nata a khichapeihzy cha Philistinâ mo tawhta la ta.

² Môabâ mo pahnie ta, chatanachata Môabâ mo cha Dâvi chakaotuhpa ta y ei ta, ano lâ râhpaw ama pie tyh.

³ Dâvi cha Ufrâti chavah kaozy liata a biehneina padua awpa ta a siena liata, Zôbâ bei Hadâdeze cha Hâmathi khihpi taihta a dyuh ta, pahnie ta.

⁴ Hadâdeze talailih 1,000, arâ pheisaih 7,000 nata alei pheisaih 20,000 patu ta. Talailih a daophipa arâ zydua cha ama chazaw chhawh khai ta, talailih 100 a daophi awpa deita a pahlôh.

⁵ Dâmaskâ liata Aramia mo ta Zôbâ bei Hadâdeze pachha awpa ta a vy ei ta, Dâvi ta Aramia pheisaih 22,000 thie ta.

⁶ Dâvi ta Dâmaskâ liata Aramia mo hry liata pheisaih suzy soh ta, chatanachata Aramia mo cha Dâvi chakaotuhpa ta y ei ta, ano lâ râhpaw ama pie lymâ. Abeipa ta Dâvi cha a siena maih liata pahniena pie lymâ ta.

⁷ Dâvi ta Hadâdeze chakaotuhpazy ta ama siekheipa ngôh vyhphaozy la ta, Zerusale lâ phaoh ta.

⁸ Dâvi ta Hadâdeze khihpi Tibâ nata Kunâ zy tawhta dawh hluhpi la ta. Chazy cha hmâpa ta Sawlawmaw ta dawh tipâh, dawh tôhzy nata dawh hmobaohzy tao ta.

⁹ Dâvi ta Zôbâ bei Hadâdeze pheisaih zydua a pahnie khai hapa thâtih Hâmathi bei Tou ta a thei nahta,

¹⁰ Dâvi ta Hadâdeze cha a dyuh ta a pahnie hapa vâta, a naoh awpa nata a lykhei awpa ta, a sawchapawpa Hadôrâ cha ano lâ tuah ta. Hadâdeze nata Tou cha khâ a dyuh tyhpa châ ei ta. Tou ta ngôh, tâkâ nata dawh hmobaoh to Dâvi lâ paphao ta.

¹¹ Chazy cha Dâvi ta râh a pahniepa zydua, Edômâ mo, Môabâ mo, Amawna mo, Philistinâ mo nata Amale mozy tawhta tâkâ nata ngôh a lapazy chhaota Abeipa lâ hlâ ta.

¹² Zeru sawchapawpa Abisai ta Alôh Saikao liata Edômâ pheisaih 18,000 thie ta.

¹³ Edômâ râh liata pheisaihzy soh ta, chatanachata Edômâ mo zydua cha Dâvi chakaotuhpazy ta y ha ei ta. Abeipa ta Dâvi cha a siena maih liata pahniena pie lymâ ta.

Dâvi chakaotuhpazy

¹⁴ Chatanachata Dâvi cha Izarei saw zydua chô liata ryureih ta, a phopi zydua châta adona nata akhongâhna ta ryureih ta.

¹⁵ Zeru sawchapawpa Zôabâ cha pheisaih hyutuh chaipa châ ta, Ahilu sawchapawpa Zehôsaphâ cha thâtih rohtuhpa a châ.

¹⁶ Ahitu sawchapawpa Zadô nata Abiathâ sawchapawpa Ahimele zy cha theihthaipazy châ ei ta, Sâvasâ cha chârohtuhpa a châ.

¹⁷ Zehôdâ sawchapawpa Benai cha Khere mo nata Pele mo hyutuhpa châ ta, Dâvi sawchapawzy cha bei chakaona rai liata hyutuh chaipazy ama châ.