1 THÂTIHZYRONA 17 - Mara Bible RV (BSI)

Dâvi hnohta Khazohpa biehrai

¹ Dâvi cha a o liata a pahrâ tawhta, hrohsopa Nâthâ hnohta, “Moh tua, kei sidy tho o liata y na ta, Abeipa Bieh­rai Byh hmâchhâh poh o ry liata a y thlâh haw,” tah ta.

² Nâthâ ta Dâvi hnohta, “Na palôh liata a ypa zydua tao mah y, Khazohpa na hnohta a y mâh tâh,” tah ta.

³ Châhrasala cha zâ lilaw ta Nâthâ hnohta Khazohpa bie vaw tlô ta,

⁴ “Vawh la, nâ chakaotuhpa Dâvi kei chho teh, Abeipa ta hetana heta a tah: ‘Ei pahrâ nawpa o nâ sapa awpa cha nâma châ va chi.

⁵ Izi râh tawhta Izarei ei kaw chhi papua noh tawhta tanoh taihta, o liata pahrâ leipa na ta, poh o miakha tawhta miakha lâ a pasie na ta, achhyna byureih miakha tawhta miakha lâ ei pasie lymâ.

⁶ Izarei saw zydua hnohta ei pasie laihna su to liata, ei phopi chhihtha awpa ta bie ei piepa Izarei ryureituhpa ahy hnohta tlyma, “Khazia sidy tho ta o eina sapa veih ei chi?” tahpa ta kawh kha chhâ ei vaw reih beih ma?’

⁷ Chavâta tahmâ nâ chakaotuhpa Dâvi hnohta hetana heta kei chho teh, ‘Pheisaihzy Abeipa ta hetana heta a tah, ei phopi Izarei chô liata ryureituhpa châ awpa ta, sibiepa su tawhta nata mietakuzy na vaina tawhta cha la papua na ta,

⁸ na siena maih liata na hnohta y lymâ na ta, na chariah zydua na hmiakô tawhta ei chhawh pathlah ha ei. Alei chô liata chyhsa rônahpazy hawhta moh rônahpa ei cha taopa aw.

⁹ Ei phopi Izarei châta su rao aw na ta, cha liata loh aw ei na ta, âmo su eihpa liata pahrâ aw ei ta, patypamâpa ta y khao aw veih ei. Eikhano hawhna khata, thachahra a hmâhpazy ta âmo cha parao khao aw veih ei.

¹⁰ Ei phopi Izarei chô liata ryureituhpazy ei raona daihti hawhna khata châ khao aw vei. Na chariah zydua ei panawhsa khai aw ei. Cha dei châ vei, Abeipa ta chipathla a cha paduapa aw tahpa na hnohta ei phuah.

¹¹ Na nohzy a kipa ta, châ pathlatuhpazy hnohta na sie tita, châ thla awpa ta, na chipathla, na sawchapawzy hry tawhta pakha padua aw na ta, a khinarâh ei pa-i aw.

¹² Ano ta o na sapa aw ta, kei ta a beidyuchhai chhâzaw ta ei pa-i aw.

¹³ A paw châ aw na ta, ei sawchapawpa a châ aw. Nâma hlâta a bei tuapa tawhta ei zawngiahna ei la hapa hawhna khata, ano tawhta ei zawngiahna la aw va na.

¹⁴ Ei o liata nata ei khinarâh liata ano cha chhâzaw ta pa-i aw na ta, a beidyuchhai chhâzaw ta ei padua aw,’ tahpa ta,” tah ta.

¹⁵ Cha bie zydua nata cha aluahna hawh tlai ta Nâthâ ta Dâvi cha chho ta.

Dâvi thlahchhâna

¹⁶ Chatawhcha Bei Dâvi cha a ngia ta, Abeipa hmiakô liata a tyuh ta, a hnohta, “Hy Zehôvâh Khazohpa, ahy ma châ na ta, ei chhôhkha he khâpa châ ta ma, he taih heta einâ vaw chhi chi tly?

¹⁷ Hy Khazohpa y, cha chhao cha na mohmô liata la, hmo chyhpata dei a châ. Hy Zehôvâh Khazohpa y, châ chakaotuhpa pathlazy kyh kô hluhpi châta reih ha chi ta, chyhsa rônahpa hawhta eina pachâ chi!

¹⁸ Châ chakaotuhpa na palyupalihna kyh liata, Dâvi heta reih awpa khâpa a hnei khao? Châ chakaotuhpa he pahno pasia tlôh chi ta.

¹⁹ Châ chakaotuhpa vâta, Hy Abeipa y, cha hmo rônahpa zydua cha na palôh hawh tlai ta tao chi ta, cha hmo rônahpazy cha na palâhâh haw.

²⁰ Hy Abeipa y, eima nah theipa liata, nâ hawhpa he ahy hmah y leipa ei ta, nâ leipa ta Khazoh hropa y veih ei.

²¹ Na phopi Izarei hawhpa he alei chô liata khâpa phopi ma a y? Khazohpa ta ano phopi ta tao awpa ta, sie ta a kei chatlaipa phopi ahy ma a y? Izi râh tawhta na chatlaipa na phopi, ama hmiakô liata phopizy papuapa ta, na châta moh rônahpa nata noâhchhihpa hmozy châ awpa ta na taopa phopi hawhpa he ahy ma a y?

²² Chatanachata na phopi Izarei cha, chhâzaw ta nâma phopi châ awpa ta tao chi ta, nâma tlai cha, Hy Abeipa y, ama Khazohpa na vaw châ haw.

²³ Chavâta tahmâ he, Hy Abeipa y, châ chakaotuhpa nata a pathlazy kyh na reipa kha, chhâzaw châta pa-i la, na reipa hawh tlai ta tao mah y.

²⁴ Chatanachata ‘Pheisaihzy Abeipa cha Izarei Khazohpa châ ta, ano cha Izarei Khazohpa a châ,’ tahpa ta, na moh cha chhâzaw ta pa-ipa nata pachônôsapa ta y aw ta, châ chakaotuhpa Dâvi pathlazy cha na hmiakô liata paduapa ama châ aw.

²⁵ Hy ei Khazohpa, nâma tlai ta, châ chakaotuhpa hnohna heta a pathlazy na paduapa awpa kyh palâhâh ha chi ta, chavâta châ chakaotuhpa heta riahphapa ta na hmiakô liata thlah ei chhâ ngâhpa a châ.

²⁶ Hy Abeipa y, nâ cha Khazohpa châ chi ta, cha hmo phapa cha châ chakaotuhpa hnohta nâ taih haw.

²⁷ Chavâta tahmâ, châ chakaotuhpa pathlazy cha chhâzaw ta na hmiakô liata ama y thei nawpa ta, âmo cha byhnâ pie mah y. Hy Abeipa, nâma tlai ta byhnâ aw ha chi ta, chhâzaw byhnâ châ mawh sy,” tah ta.