1 THÂTIHZYRONA 16 - Mara Bible RV (BSI)

Biehrai Byh poh o liata sopa a châ

¹ Khazohpa Byh cha a ngiakhei ei ta, a so nawpa ta Dâvi ta a paraipa poh o chhôh liata soh ei ta, raopa hlânazy nata aryhna hlânazy Khazohpa hmiakô liata hlâ ei ta.

² Dâvi ta raopa hlânazy nata aryhna hlânazy a hlâ khai nahta, Abeipa moh ta zawpizy cha byhnâ awpa ta.

³ Izarei saw zydua cha a chanô chapaw ta, viahchhâ tlâ kha, sa tlo kha nata kre thei pachawhpa sao kha chyu rai ta.

⁴ Dâvi ta Livai pathla thokhazy cha Abeipa Byh hmiakô liata chakao ta, Abeipa, Izarei Khazohpa lâ thlahchhâpa ta, alyna bie reih ta, reithai awpa ta rao ta.

⁵ Hyutuh chaipa cha Asâpha châ ta, a pazipazy cha Zekariah, Zeili, Semiramô, Zehie, Mâtithiah, Eliabâ, Benai, Ôbededô nata Zeili zy châ ei ta, âmo cha tlaipih nata totâ a tô thaipazy ama châ. Asâpha cha paotlâ tôtuhpa châ ta,

⁶ theihthaipa Benai nata Zahâzie cha Khazohpa Bieh­rai Byh hmiakô liata a daihtita ta chiahmie a tô tyh awpazy ama châ.

⁷ Chatanachata cha noh liata, Abeipa lâ alyna bie reina hla sa awpa ta, Dâvi ta Asâpha nata a unawhzy cha rao ta, he Dâvi hla phipa he Abeipa lâ ama hlâ.

Dâvi alyna bie reina hla

⁸ Abeipa lâ alyna bie hlâpa ta a moh pado u la, Phopizy hry liata a hmotaopazy pahnosa teh u!

⁹ Ano lâ hla sapa ta, Ano cha reithai u la; A hmotao noâhpa zydua phuah teh u!

¹⁰ A moh pathaihpa parônahsa u la, Abeipa a tluatuhpazy palôh cha, Thaphapa ta y mawh sy!

¹¹ Abeipa nata a thatlôna tlua u la, A hmia khâ tlua muh vy!

¹² A hmotao noâhpazy a thei thlâh ha u la, A hmonoâhpazy a theipa ta, A pachiana biezy a thei thlâh ha teh u.

¹³ Hy a chakaotuhpa Izarei pathla saih u, Hy â tlyhpa Zakaw sawzy saih u!

¹⁴ Ano cha Abeipa eima Khazohpa châ ta, A ryureina alei chô zydua liata a y.

¹⁵ A biehrai chhâzaw ta a thei thlâh ha u la, A biepiepa chhâ sâh hluhpi taihta a thei thlâh ha teh u.

¹⁶ Cha tlai cha Abarahâ hnohta a biehrai kha châ ta, Aisika hnohta a bietai châ hra ta,

¹⁷ Zakaw hnohta bieraopa ta pa-i ta, Izarei hnohta chhâzaw biehrai ta taopa ta,

¹⁸ “Kâna râh cha pie aw na ta, Cha cha na ryuto râh a châ aw,” a tah.

¹⁹ Maluh chyhta dei châ ei chi ta, Rei khi chhao a tloh leipa, Khichhaipa dei nama châ nona kha,

²⁰ Phopi miakha tawhta miakha lâta viavi ei chi ta, Khinarâh miakha tawhta miakha lâ nama viavi laih.

²¹ Ahy ta hmah ama tlybai awpa pasaih leipa ta, Âmo vâta beizy ra ta,

²² “Ei sathawthupazy hria leipa u la, Ei hrohsopazy pasasa khuh vy!” a tah.

²³ Leilô zydua saih u, Abeipa lâ hla sa u la, A pachhana bie noh chareih chho teh u.

²⁴ Râhzy liata a rônahzie phuah u la, Phopi zydua hnohta a hmotao noâhpazy phuah teh u!

²⁵ Abeipa cha rônah ta, Thata reithai awpa châ ta, Khazoh zydua hlâta chi chai awpa a châ.

²⁶ Phopizy khazoh zydua cha nothlahpazy dei châ ei ta, Abeipa deikua cha avâzy a taotuhpa a châ.

²⁷ A hmiakô liata rônahna nata abeina y ta, A yna su liata thatlôna nata thaphana a y.

²⁸ Phopizy liata chi to saih u, Abeipa cha reithai u la, Abeipa cha rônahna nata thatlôna patosa teh u!

²⁹ Abeipa cha a moh rônahna patosa u la, Hmohlâpa cheipa ta a hmiakô liata a vy teh u! Rônahna nata pathaihna ta Abeipa cha a chhy u la,

³⁰ Leilô zydua saih u, A hmiakô liata a chalyu teh u; Khizaw he â ipa ta paduapa châ ta, A chalyu beih aw vei.

³¹ Avâzy ama thapha sala, Alei a ly mawh sy; Phopizy hry liata, “Abeipa ta ryu a reih!” Tah mawh ei sy!

³² Tilaipi a rôh sala, A chhôh liata a ypazy a rôh mawh ei sy; Lyurâhpa a thapha sala, A chhôh liata a ypa to ama thapha mawh sy!

³³ Abeipa cha alei pachia awpa ta a vy aw ta, Cha tita râhmâhpa thozy ta, A hmiakô liata thapha ta hla ama sa aw.

³⁴ Abeipa lâ alyna bie hlâ teh u; Ano cha pha ta, A kyhpachâna a tleih beih leipa a châ.

³⁵ “Hy eima pachhana Khazohpa y, Miah pachha la, Râh to tawhta miah pakhy la, Miah chatlai mah y; Chatanachata na moh pathaihpa lâ alyna bie reih aw pi ta, Na rônahna eima reithai aw.

³⁶ Abeipa Izarei Khazohpa cha, Chhâzaw nata tlyzaw ta reithaipa ta y mawh sy!” Chyhsa zydua ta, “Amen!” tah ei ta, Abeipa cha ama reithai.

Biehrai Byh hmiakô liata achhyna

³⁷ Chatanachata Abeipa Biehrai Byh hmiakô liata â ngiahna hawhta noh chareih chakaona rai hria awpa ta, Bei Dâvi ta Asâpha nata a unawhzy soh ta.

³⁸ Ôbededô nata a unawh sycharu nata pachariezy chhao soh ta. Zeduthu sawchapawpa Ôbededô nata Hôsâ cha chhikao vaituhpazy ama châ.

³⁹ Kibiô su sâhpa liata Abeipa byureih liata chakaona raihria awpa ta, theihthaipa Zadô nata a unawhpa theihthaipazy soh hra ta.

⁴⁰ Âmo cha Abeipa Ryhpa liata ropa, Abeipa ta Izarei sawzy bie a piepa zydua tao ta, my nata zâ ta raopa hlâna maisâh liata Abeipa lâ raopa hlâna a hlâ tyh awpazy ama châ.

⁴¹ A zawngiahna cha chhâzaw châta a châpa vâta, Abeipa lâ alyna bie a reih tyh awpa ta, Hemâ nata Zeduthu nata mohropa ama moh ta a tlyhpazy chhao, ama hnohta chakaosapa ama châ.

⁴² Hemâ nata Zeduthu cha pyungiapa châta chiahmiezy nata paotlâzy hnei ei ta, Khazohpa hla sa nawpa ta chhaichhizy ama hnei. Chhikao vaituhpazy châta Zeduthu sawchapawzy rao­pa ama châ.

⁴³ Chatawhcha zawpi zydua ama o chyu lâta a di ei ta, Dâvi chhao a chhôhkhazy byhnâ awpa awpa ta a o lâ â di ha hra.