1 THÂTIHZYRONA 15 - Mara Bible RV (BSI)

Biehrai Byh Zerusale tlôkheipa a châ

¹ Dâvi ta Dâvi khihpi liata ano châta ozy sa ta. Khazohpa Byh y nawpa su a chhuanoh ta, poh o raipa ta.

² Dâvi ta, “Khazohpa Byh he Livai pathla dei leipa ta cha, ahy ta hmah amâ sy awpa châ vei. Âmo cha Khazohpa Byh chhâzaw ta a sytuhpa nata ano chakaotuhpa châta Abeipa ta a rao ei,” tah ta.

³ Dâvi ta Abeipa Byh cha kei la ta, a so nawpa su â chhuanohpa liata so awpa ta, Zerusale liata Izarei saw zydua cha awpakhy ta.

⁴ Dâvi ta Arawna pathlazy nata Livai pathlazy tawhta a awpakhypazy cha,

⁵ Kôhâ pathla tawhta pawhrâh chaipa Urie nata a unawhzy 120;

⁶ Merâri pathla tawhta pawhrâh chai­pa Asiah nata a unawhzy 220;

⁷ Kesao pathla tawhta pawhrâh chaipa Zôela nata a unawhzy 130;

⁸ Elizaphâ pathla tawhta pawhrâh chaipa Semiah nata a unawhzy 200;

⁹ Hebraw pathla tawhta pawhrâh chaipa Elie nata a unawhzy 80;

¹⁰ Uzie pathla tawhta pawhrâh chaipa Aminadâ nata a unawhzy 112 ama châ.

¹¹ Chatawhcha Dâvi ta theihthaipa Zadô nata theihthaipa Abiathâ nata Livai pathla Urie, Asiah, Zôela, Semiah, Elie nata Aminadâ zy aw ta,

¹² ama hnohta, “Nâmo cha Livai chi pawhrâh chaipazy nama châ. Abeipa, Izarei Khazohpa Byh cha a su ei chhuanohpa lâ namâ vaw sy thei nawpa ta, nâmo nata nama unawhzy a pathai teh u.

¹³ A hmiatuapa liana khata, bieraopa hawhta ano pado leipa pi ta, nâmo ta Byh namâ sy leipa vâna khata, Abeipa eima Khazohpa cha eima chô liata a hie a hâhpa a châ,” tah ta.

¹⁴ Chatanachata Abeipa, Izarei Khazohpa Byh a sy awpa ta theihthaipazy nata Livai pathlazy cha a pathai ei ta.

¹⁵ Abeipa ta Mawsi hnohta bie a piepa hawhta, Livai pathlazy ta Khazohpa Byh cha a lâ ta ama ngiatlâh ta a sy ei ta.

¹⁶ Dâvi ta Livai pathla pawhrâhpazy cha ama unawhzy hry tawhta hlasathaipazy a tlyh ta, pyungiapa chhaichhi tlaipihzy, totâzy nata paotlâzy a paro ngaitapa ta patôsa ta, thaphana hla a paro ngaitapa ta pasasa awpa ta biepie ta.

¹⁷ Chatanachata Livai pathlazy ta Zôela sawchapawpa Hemâ, a unawhzy hry tawhta Berekiah sawchapawpa Asâpha, ama unawhpa Merâri pathla tawhta Kusai sawchapawpa Ethâ,

¹⁸ chhâ nona liata ama unawhzy tawhta Zekariah, Zazie, Semiramô, Zehie, Uni, Eliabâ, Benai, Mâsei, Mâtithiah, Eliphelehu, Mikaniah nata chhikao vaituhpa Ôbededô nata Zeili zy a tlyh ei ta.

¹⁹ Hlasathaipa Hemâ, Asâpha nata Ethâ zy cha dawh paotlâ tô awpa ta raopa ama châ.

²⁰ Zekariah, Azie, Semiramô, Zehie, Uni, Eliabâ, Mâsei nata Benai zy cha Alamô siezie hawhta tlaipih tô awpa ta raopa ama châ.

²¹ Mâtithiah, Eliphelehu, Mikaniah, Ôbededô, Zeili nata Azaziah zy cha, Semini siezie hawhta totâ tô awpa ta raopazy ama châ.

²² Khenaniah cha pyungiapa a thaipa châ ta, pyungiapa kyh liata Livai pathla chhituhpa a châ. Ano ta pyungiapa chakaona rai a chhihtha lymâ.

²³ Berekiah nata Elkânâ zy cha Byh châta chhikao vaituhpazy ama châ.

²⁴ Theihthaipa sahlao, Sebaniah, Zehôsaphâ, Nethane, Amasai, Zekariah, Benai nata Elieze zy cha Kha­zohpa Byh hmiakô liata chiahmie tôtuhpazy ama châ. Obededô nata Zehiah cha Byh châta chhikao vaituhpazy ama châ.

²⁵ Chatanachata Dâvi nata Izarei machâzy nata pheisaih sâh kha hyutuhpazy ta Ôbededô o liata a ypa Abeipa Biehrai Byh cha la awpa ta, thapha ngaitapa ta zu ei ta.

²⁶ Khazohpa ta a baopa vâ ei ta, Abeipa Biehrai Byh a sytuhpa Livai pathlazy ta viahchao tôhpa pô sari nata mietaku tôhpa pô sari ta atheihna hlâ ei ta.

²⁷ Dâvi cha lini poh rih dipa ta a tobi ta. Byh a sytuhpa Livai pathlazy nata hlasathaipazy nata pyungiapa chhituhpa Khenaniah zy chhao lini poh rih dipa ta a tobi ei ta. Dâvi cha lini ephaw â ky pâ.

²⁸ Izarei saw zydua ta mietaku tôhpa ki, chiahmie nata paotlâ pyuzy chhaota thata rahaona chôta nata tlaipihzy nata totâzy a paro ngaitapa ta tôpa ta, Abeipa Biehrai Byh cha ama khykhei haw.

²⁹ Abeipa Biehrai Byh cha Dâvi khihpi a kaw ngia ta. Sawla sawchanô Mikâli cha opy tawhta vaw sai ta, Bei Dâvi cha thapha ngaitapa ta a lâpa kei hmô ta, a palôh ta zakhei kaw ta.