1 THÂTIHZYRONA 14 - Mara Bible RV (BSI)

Tyre bei ta Dâvi a bao

¹ Tyre bei Hirâ ta Dâvi lâ chyhsa tuah ta, a o sa nawpa ta sidy thozy paphao ta. Lô zôthaipa nata tho zôthaipazy chhao tuah ta.

² Dâvi ta Abeipa ta Izarei chô liata bei ta ano cha padua ta, a phopi Izarei vâta a khinarâh chhao thata cheihchalopa ta a y tahpa pahno ta.

Zerusale liata a pihpa Dâvi sawzy

³ Dâvi cha Zerusale liata lapinôzy hnei viapa ta, sawchapawzy nata sawchanôzy hnei via ta.

⁴ Zerusale liata a pihpa a sawzy cha Sâmua, Sôbâ, Nâthâ, Sawlawmaw,

⁵ Ibâ, Elisua, Elpele,

⁶ Nôkâh, Nephe, Zaphia,

⁷ Elisâmâ, Beliadâ nata Eliphele zy ama châ.

Dâvi ta Philistinâ mo a pahnie

⁸ Philistinâ mo ta Dâvi cha Izarei râh zydua chô liata bei châta sathawthupa a châ tahpa ama thei nahta, Philistinâ mo zydua Dâvi tlua awpa ta khy ei ta. Cha thâtih cha Dâvi ta a thei nahta, âmo a dyuh awpa ta pua ta.

⁹ Philistinâ mo cha a vy ei ta, Rephai Saikao vaw chho ei ta.

¹⁰ Dâvi cha Khazohpa a saohiah ta, “Philistinâ mo a dyuh awpa ta ei khy aw ma? Âmo cha ei ku liata eina pie aw chi ma?” tah ta. Abeipa ta a hnohta, “Khy mah y, âmo cha na ku liata ei cha pie aw,” tah ta.

¹¹ Chatanachata Dâvi cha Bâlâperâzi lâ khy ta, cha liata Philistinâ mo cha pahnie ta. Dâvi ta, “Khazohpa ta ei ku hmâpa ta ei chariahzy cha tisaih hawhta a ly ha ei,” tah ta.

¹² Philistinâ mo cha ama khazohzy a râsai ei ta. Dâvi ta biepie ta, khazohzy cha mei ta ama rao khai haw.

¹³ Philistinâ mo ta saikao vaw chho heih ei ta.

¹⁴ Dâvi ta Khazohpa a saohiah heih ta, Khazohpa ta a hnohta, “Na khyhnao awpa ei châ vei. Âmo cha sie chahlô la, malburi thih dady liata na vaw pua thlu aw ei.

¹⁵ Malburi kôzy kithlao liata hrâsiepa pyu na thei nahta, a dyuh awpa ta na pua aw. Philistinâ pheisaihzy a dyuh awpa ta Khazohpa na hmia lâta a sie haw,” tah ta.

¹⁶ Khazohpa ta bie a piepa hawhta Dâvi ta tao ta, Philistinâ pheisaihzy cha Kibiô tawhta Keze taihta thie lymâ ei ta.

¹⁷ Chatanachata Dâvi moh cha râh to liata pathâh ta, Dâvi china cha Abeipa ta phopi zydua chô liata payasa ta.