1 THÂTIHZYRONA 13 - Mara Bible RV (BSI)

Biehrai Byh lana

¹ Dâvi ta hyutuhpa zydua, sâh kha hyutuhpazy nata za kha hyutuhpazy a saohiah ta.

² Dâvi ta Izarei zawpi ahmaohpakhypa zydua hnohta, “Nâmo ta a pha tah u la, Abeipa eima Khazohpa ta pha a tah khiahta cha, Izarei râh zydua liata eima unawh a ypazy nata khihpizy nata si panyuna su a hneipa khichapeihzy liata a ypa theihthaipazy nata Livai mozy lâ chyhsa tuah sih la, keimo lâ a vaw hmaoh awpa ta kei pahruasa ei suh u.

³ Sawla daihti nona khata eima Khazohpa Byh pado leipa pi ta, tahmâ kei la heih ei suh u,” tah ta.

⁴ Pahruana cha zawpizy ta a pha tah ei ta, Khazohpa Byh la awpa cha paryhsa ei ta.

⁵ Dâvi ta Izi chavah Sihô tawhta Lebôhamâ taihta a ypa Izarei saw zydua cha, Kiriaziari khihpi liata a ypa Khazohpa Byh cha kei la awpa ta awpakhy ta.

⁶ Chatanachata Dâvi nata Izarei saw zydua cha, cherubizy luh chô beidyuchhai liata a tyuhpa Abeipa moh ta awpa Khazohpa Byh cha la awpa ta, Kiriaziari ama tahpa Zudâh râh liata Bâlâh khihpi lâ khy ei ta.

⁷ Khazohpa Byh cha Abinadâ o tawhta talailih thiehpa ta siekhei ei ta, Uza nata Ahiô ta talailih cha haoh ei ta.

⁸ Dâvi nata Izarei saw zydua cha hlasapa ta, totâzy, tlaipihzy, khoh chyhpazy, paotlâzy, chiahmiezy tôpa ta Khazohpa hmiakô liata ama theina zydua papuapa ta palyupalihna tao ei ta.

⁹ Kidaw sawhri ama tlô nahta, viahchao tôhpazy amâ chapiapa vâta, Uza ta Byh cha patu a chhuahpa ta a ku kei paza ta,

¹⁰ Abeipa cha Uza chô liata a hiehâh ta, Byh a patupa vâta tusao ta, cha liata Khazohpa hmiakô liata thi ha ta.

¹¹ Abeipa ta Uza chô liata ku a pathlapa vâta, Dâvi cha a hiehâh kaw ta. Chavâta cha su cha tanoh taihta Perezuza tahpa a châ.

¹² Cha noh ta Dâvi ta Khazohpa cha chi ngaita ta, “Kheihta ma Khazohpa Byh he ei o ei tlôkhei thei aw?” tah ta.

¹³ Chavâta Dâvi ta Byh cha Dâvi khihpi lâ tlôkhei khao leipa ta, Kiti chyhsa Ôbededô o lâ tlao a tleikhei haw.

¹⁴ Khazohpa Byh cha Ôbededô o liata a chhôhkha hnohta thla thôh y ta. Abeipa ta Ôbededô chhôhkha nata a hneipa zydua cha byhnâ pie ta.