1 THÂTIHZYRONA 12 - Mara Bible RV (BSI)

Dâvi pasaiphazy ama pôh via lymâ

¹ Dâvi cha Kisâ sawchapawpa Sawla vâta puaei thei khao leipa ta a y nota, chyhsazy ta Zikalâ liata ano lâ a vy ei ta. Âmo cha adyuhna liata ano a baotuhpa pasaiphazy hry liata a hlao hrapazy ama châ.

² Libaw a chabapazy châ ei ta, chavei chachâh ta li a ka thaipa nata cheisiah lô a siah thaipazy ama châ. Âmo cha Benzami pathla, Sawla heinawhzy ama châ.

³ Hyutuh chaipa cha Ahieze châ ta, a pazipa cha Zôasâ a châ. Ama pano heta Kibia chyhsa Semâh sawchapawzy ama châ. Ahropazy cha Azamâve sawchapawpa Zezie nata Pele, Berâkâh, Anathô chyhsa Zehu,

⁴ sythôh hry liata pasaipha nata sythôh hyutuhpa Kibia chyhsa Isamai, Zeremiah, Zahâzie, Zôhanâ, Kederâ chyhsa Zôzabâ,

⁵ Eluzai, Zerimô, Bialiah, Semariah, Hâruphi chyhsa Sephatiah,

⁶ Kôrâ chyhsa Elkânâ, Isiah, Azare, Zôze nata Zasôbia,

⁷ Kedaw chyhsa Zerôhâ sawchapawpa Zôelâ nata Zebadiah zy ama châ.

⁸ Kâdâ chi liata pasaipha thatlôpa nata chariah a dyuh thaipazy ta râhchawhpa thokhy liata a ypa Dâvi lâ amâ kei bai hra. Âmo cha vyhphao nata asei a hmâh thaipa châ ei ta, chakeibarôhneipa hmia phaoh ei ta, tlâh sakhihzy hawhta a chatliepa ama châ.

⁹ Ama hyutuhpa cha Eze châ ta, panona Ôbadia, pathôhna Eliabâ,

¹⁰ papalihna Mismânâh, papangawhna Zeremiah,

¹¹ pacharuna Atai, pasarina Elie,

¹² pachariena Zôhanâ, pachakina Elzabâ,

¹³ pahrawhna Zeremiah nata hleikhana Mâkhabânai zy ama châ.

¹⁴ Cha Kâdâ pathlazy cha pheisaih hyutuhpazy châ ei ta, ama hry liata thatlô lei chaipa chhao ta za kha a tlu ta, thatlô chaipa cha sâh kha â tlu.

¹⁵ Cha sahlao cha thla khana liata Zawdâh chavah a kao zydua a bie khai nota haosâ lâ kiah ei ta, saikao liata a pahrâpa zydua nochhi lâ nata notla lâ a parâpaisa khaipazy kha ama châ.

¹⁶ Benzami nata Zudâh chizy hry tawhta chyhsa thokha ta thokhy liata Dâvi lâ vawh ei ta.

¹⁷ Dâvi cha âmo dy awpa ta pua ta, ama hnohta, “Na bao awpa ta adyhna bie rei awpa ta kei lâ a vypa nama châ khiahta cha, ei palôh ta châ pazao aw ei ta, ei ku liata hmo doleipa khâpa hmah y vei tahpa pahno thlâh hana chôta, ei khakhaipazy na patusa namâ chhuah khiahta deikua cha, miah pathlatuhpazy Khazohpa ta cha hmô ei sala, viari cha thô mawh ei sy,” tah ta.

¹⁸ Sythôh chô liata hyutuhpa Amasai chô liata Thlahpa vaw tlô ta, ano chata, “Hy Dâvi y, na chyhsazy châ pi ta, Hy Zese sawchapawpa y, Na chhâh a châpazy eima châ hih! Thlalôhna, na chô liata thlalôhna y sala, Châ baotuhpazy chô liata thlalôhna y mawh sy! Na Khazohpa ta a cha bao lymâ hih,” tah ta. Chatawhcha Dâvi ta âmo cha a ly ta, a pheisaih hyutuhpazy ta a tao ha ei.

¹⁹ Sawla a dyuh awpa ta Philistinâ mo hnohta Dâvi a sie hra nota, Manase chi tawhta pheisaih thokhazy Dâvi lâ a vaw râ ei ta. Châhrasala Dâvi ta Philistinâ mo cha bao khao vei. Philistinâ ryureituhpazy ta reihpahmaoh ei ta, “A zibeipa Sawla chhâh a châpa ta, keimo luh tlao miah a la pathlei aw na,” tah ei ta, Dâvi cha ama pakuasa haw.

²⁰ Zikalâ lâ a lie ta, Manase chi tawhta Adanâh, Zôzabâ, Zedia, Mikaila, Zôzabâ, Elihu nata Zilethai zy ta Dâvi cha amâ kei bai. Âmo cha pheisaih sâh kha hyutuhpazy ama châ.

²¹ Dâvi chariah a dyuhpazy amâ dyuhkhei tyh. Ama zydua ta pasaipha riahphapa nata pheisaih hyutuhpazy ama châ.

²² Noh chareih ta Dâvi chhâh a châpa chyhsazy a vy lymâ ei ta, Khazohpa pheisaih hawhta, pheisaih hluh ngaitapa ama vaw châ haw.

Hebraw liata Dâvi pheisaihzy

²³ Abeipa bie hawhta, Sawla khinarâh cha Dâvi hnohta pie awpa ta, hezy he Hebraw liata Dâvi lâ a vypa, adyuhna chhaichhi atobipa pheisaih pyzy ama châ:

²⁴ Zudâh pathla adyuhna chhaichhi atobipa, vyhphao nata asei a chabapa 6,800;

²⁵ Simeôna pathla adyuhna liata pasaipha thatlô riahphapa 7,100;

²⁶ Livai pathla 4,000;

²⁷ Arawna pathla hyutuhpa Zehôdâ nata a hnohta a ypa 3,700;

²⁸ thyutlia pasaipha riahphapa Zadô nata ano pho tawhta pheisaih hyutuhpa pakih nata pano;

²⁹ Benzami pathla, Sawla heinawhpa, Sawla pathla chhâh a vaw châ tyhpazy tawhta 3,000;

³⁰ Epharai pathla, ama phozy liata mohpathâhpa nata pasaipha riahphapa 20,800;

³¹ Manase chi khophie hry tawhta moh liahsa palâsapa ta, Dâvi bei ta tao awpa ta a vypa 18,000;

³² Iskâra pathla, noh nata daihti yzie pahno thai ei ta, Izarei ta a tao awpa a pahnopa hyutuhpa 200 nata ama chhihthana ry liata ama heinawh zydua;

³³ Zebulawna pathla, adyuhna châta chariah chhaichhi pakipa ta a tobipa ta, achhuahna sianopa a hneipa pheisaih hlôpa 50,000;

³⁴ Nâthalai pathla pheisaih hyutuhpa 1,000 nata vyhphao nata asei a chabapa pheisaih 37,000;

³⁵ Dânâ pathla, chariah a dyuh awpa ta a mâ chiehpa 28,600;

³⁶ Asera pathla, a dyuhzie thaipa nata a dyuh awpa ta a mâ chiehpa pheisaih 40,000;

³⁷ Zawdâh haosâ lâta a ypa Rubena chi, Kâdâ chi nata Manase chi khophie zy tawhta adyuhna chhaichhi kipa ta atobipa pheisaih 120,000.

³⁸ Cha pheisaih zydua cha chariah a dyuh thaipa châ ei ta, hrâsie awpa ta a mâ chiehpa ta a ypazy châ ei ta, Dâvi cha Izarei zydua chô liata bei ta tao awpa ta, palôh miakha phaohpa ta Hebraw lâ a siepazy ama châ. Cha hawh pyly ta, Izarei saw hropa zydua chhao ta, Dâvi bei ta tao awpa cha ama palôh â raoh khai.

³⁹ Cha liata Dâvi hnohta niepa nata dopa ta ypa ta noh thôh châh ei ta. Ama unawhzy ta ama nie awpa nata do awpazy amâ vaw chhuahdy khai haw.

⁴⁰ Cha dei châ vei, lâhlapi ta a ypa ama heinawh Iskâra, Zebulawna nata Nâthalai râh tawh zy taihta, ama niedo awpazy cha alâzy, râraoseihpazy, arâzy nata viahchao tôhpazy paphaosapa ta ama vaw hlâ lymâ. Izarei liata thaphana y ta, chatanachata viahdie hluhpi, theiku viahchhâzy, kre sao pachawhpazy, kresawhtizy, sathawzy, viahchaozy nata mietakuzy phaopa ta, Hebraw khihpi lâ ama sie lymâ.