1 THÂTIHZYRONA 11 - Mara Bible RV (BSI)

Izarei bei Dâvi

¹ Izarei saw zydua ta Hebraw liata Dâvi hnohta a hmaohpakhy ei ta, “Pachâ teh, na rupa nata na sapazy eima châ hih.

² Sawla â beina daihti liana chhao khata, Izarei puakhei ta a ngiakhei tyhpa cha nâ na châ. Abeipa na Khazohpa ta na hnohta, ‘Ei phopi Izarei vaituhpa châ aw chi ta, ei phopi Izarei chô liata bei ta na y aw,’ a cha tah,” tah ei ta.

³ Chatanachata Izarei machâ zydua cha Hebraw liata abei lâ a vy ei ta. Dâvi ta Hebraw liana cha Abeipa hmiakô liata ama hnohta bie hraih ta. Abeipa ta Samuela hmâpa ta a reipa hawhta, Dâvi cha Izarei bei châta sathawthu ei ta.

Dâvi ta Zerusale a la

⁴ Chatawhcha Dâvi nata Izarei saw zydua cha Zerusale lâ sie ei ta. Zerusale cha Zebu tah tyhpa châ ta, a râh liata a pahrâpa Zebu mo pahrâna khihpi a châ.

⁵ Zebu khihsawzy ta Dâvi hnohta, “He liata a vaw ngia thei aw va chi,” tah ei ta. Chatahrasala Dâvi ta Zaio thokhy cha la ta, cha cha Dâvi khihpi tahpa a vaw châ haw.

⁶ Dâvi ta, “Ahy rai Zebu mo a thie tuachaipa cha pheisaih hyutuh chaipa a châ aw,” tah ta. Zeru sawchapawpa Zôabâ khy tuachai ta, chatanachata ano cha pheisaih hyutuh chaipa ta taopa a châ.

⁷ Dâvi cha thokhy chhôh liata pahrâ ta, chavâta cha khihpi cha Dâvi khihpi tahpa a châ.

⁸ Milô tawhta pathaopa ta khihpi zydua cha thokhy ta dôh ta, khihpi chhôh liata taopathi byuhpa hropazy cha Zôabâ ta taopathi ta.

⁹ Dâvi cha Pheisaihzy Abeipa ta a hnohta a ypa vâta, rônah via lymâ ta.

Dâvi pasaiphazy

¹⁰ Hezy he Dâvi pasaiphazy châ ei ta, Abeipa bie ta Izarei thâtih a vaw reipa hawhta, Izarei zydua a paraohpa ta Dâvi bei ta taotuhpa nata a khinarâh liata thatlô ngaitapa ta baotuhpazy ama châ.

¹¹ He he Dâvi pasaiphazy thâtih a châ: Hâkamôni chyhsa Zasôbia cha pasaipha pathôhzy hry liata hyutuh chaipa châ ta, chyhsa 300 chô liata asei pahieh ta, ei kha ta a thie khai theipa a châ.

¹² Pasaipha pathôhzy hry liata ano a pazipa cha, Ahôh chyhsa Dôdô sawchapawpa Eliaza a châ.

¹³ Ano cha Philistinâ mo ta a dyuh awpa ta amâ hmaohpakhyna su Pâsdâmi liata Dâvi hnohta a ypa kha a châ. Cha liata bâli sâh ta a biepa lyu y ta, Izarei pheisaihzy cha Philistinâ mo tawhta a râpai ei ta.

¹⁴ Eliaza deikua cha, lyu liah liata a duah ta, khâchâ vaih ta, Philistinâ mo cha thie ta, Abeipa ta pahniena rônahpa ta a pachha ei.

¹⁵ Pheisaih hyutuhpa sythôhzy hry liata hyutuh chaipa pathôhzy cha, lôpanô yna Adulâ lôpu liata a ypa Dâvi lâ zu ei ta, Philistinâ pheisaihzy cha Rephai Saikao liata riehmo paryh ei ta.

¹⁶ Cha nota Dâvi cha thokhy chhôh liata y ta, Philistinâ pheisaihzy cha Bethlehe liata y ei ta.

¹⁷ Dâvi cha a dâhphi kaw ta, “Aw, Bethlehe liata tikhaoh ti, thokhy chhikao kiapâh liatapa kha doh awpa ta nâ piepa ama y mawh sala ei tah kaw dia!” tah ta.

¹⁸ Pasaipha pathôhzy ta Philistinâ pheisaihzy riehmo siepahliepa ta, thokhy chhikao kiapâh liata Bethlehe tikhaoh ti cha kei thaih ei ta, Dâvi lâ vaw cheih ei ta. Châhrasala doh ngâh khao leipa ta. Abeipa châta tlao patlai ta,

¹⁹ Dâvi ta, “He ti he ei Khazohpa hmiakô liata doh cheita aw va na. He chyhsazy heta ama hrona sokhâhpa ta he ti he kei thaih ei ta, ama hrona thisaih cha ei doh aw ma?” tah ta. Chavâta ti cha doh khao vei. Cha hmozy cha pasaipha pathôhzy ta ama tao.

²⁰ Zôabâ unawhpa Abisai cha pasaipha sythôh hry liata hyutuh chaipa châ ta, chyhsa 300 asei pahieh thlu ta, a thie khai hapa a châ. Chavâta pasaipha pathôhzy moh pha tona liata â hlao hra.

²¹ Pasaipha pathôh hry liata pahlaopa a châ leipa chhao ta, âmo hlâta palyupalih tlâh viapa châ ta, Sythôh hry liata palyupalih tlâh chaipa châ ta, chavâta ama hyutuhpa ta ama tao.

²² Zehôdâ sawchapawpa Benai cha Kâbaze chyhsa riahphapa châ ta, hmo rônahpazy a taotuhpa a châ. Môabâ chyhsa riahphapa pano thie ta, dâhaw tla daihti liata zu ta, khaohtlô liata chakeibarôhneipa a thiepa a châ.

²³ Izi chyhsa pôh pahreihpa, dy pangawh a sâhpa chhao a thie haw. Izi chyhsa cha asei laipa, thaiphia hawhpa a chaba ta, Benai ta chôchahrei a chabapa ta za pangai ta, Izi chyhsa asei chabapa cha chhu ta, Izi chyhsa cha ano asei ta a dysao haw.

²⁴ Cha hmozy cha Zehôdâ sawchapaw­pa Benai ta tao ta, chavâta pasaipha pathôhzy hawhta moh phana a to hra.

²⁵ Sythôhpazy hry liata cha palyupalih tlâh chaipa châ ta, châhrasala pasaipha pathôhzy hry liata deikua rei pâpa châ vei. Dâvi ta Benai cha abei vaituhpazy hyutuhpa ta a rao.

²⁶ Dâvi pasaiphazy cha Zôabâ unawhpa Asahe, Bethlehe khihpa Dôdô sawchapawpa Ehânâ,

²⁷ Hârôri chyhsa Sâmô, Pelôni chyhsa Helezi,

²⁸ Tekô khihpa Ike sawchapawpa Irâ, Anathô chyhsa Abieze,

²⁹ Husâ chyhsa Sibekai, Ahôh chyhsa Ilai,

³⁰ Netôpha chyhsa Mâharai, Netôpha chyhsa Bânâ sawchapawpa Heledâ,

³¹ Benzami pathla Kibia khihpa Ribai sawchapawpa Ithai, Pirathô chyhsa Benai,

³² Kâsi vahtiepa liata Hurai, Abâthi chyhsa Abie,

³³ Bâharu chyhsa Azamâve, Salbôni chyhsa Eliabâ,

³⁴ Kizô chyhsa Hâse, Hârâ chyhsa Saki sawchapawpa Zawnathâ,

³⁵ Hârâ chyhsa Sâkhâ sawchapawpa Ahiama, Ur sawchapawpa Eliphâ,

³⁶ Mekherâ chyhsa Hepha, Pelôni chyhsa Ahiza,

³⁷ Kâmel chyhsa Hezrô, Ezbai sawchapawpa Nârai,

³⁸ Nâthâ unawhpa Zôela, Hâkari sawchapawpa Mibâ,

³⁹ Amawna chyhsa Zele, Zeru sawchapawpa Zôabâ chariah chhaichhi chabatuhpa Berô chyhsa Nâharai,

⁴⁰ Ithari chyhsa Irâ, Ithari chyhsa Kâre,

⁴¹ Hiti chyhsa Uria, Ahlai sawchapawpa Zabâ,

⁴² Rubena chyhsa Siza sawchapawpa Adinâ, Rubena chi hyutuhpa pakha nata a hnohta a ypa chyhsa sythôh,

⁴³ Mâkâ sawchapawpa Hâna, Mithani chyhsa Zôsaphâ,

⁴⁴ Asterâ chyhsa Uzia, Arôerâ chyhsa Hôthâ sawchapawpa Sâmâ nata Zeili,

⁴⁵ Simri sawchapawpa Zedia nata a unawhpa Tizi chyhsa Zôha,

⁴⁶ Mâhavi chyhsa Elie, Elnâ sawchapawpa Zeribai nata Zôsaviah, Môabâ chyhsa Ithamâh,

⁴⁷ Mezôbâ chyhsa Elie, Ôbedâ nata Zasie zy ama châ.