1 THÂTIHZYRONA 10 - Mara Bible RV (BSI)

Sawla thina nata a sawchapawzy

¹ Philistinâ mo ta Izarei a dyuh ei ta, Izarei mo cha Philistinâ mo hmiakô liata a râpai ei ta, Kibô Tlâh liata thiepa châ ei ta, ama pao haw.

² Philistinâ mo ta Sawla nata a sawchapawzy cha a chadai ei ta, Sawla sawchapawpa Zawnathâ, Abinadâ nata Mekhisua zy thie ei ta.

³ Adyuhna cha ru ngaita ta, Sawla cha thata chadie ei ta, likathaipazy ta Sawla cha hmô ei ta hmah paphao ei ta.

⁴ Sawla ta a chariah chhaichhi a chabatuhpa hnohta, “Na zaozi kha phia la, ei chhitlyuna taihta na vaw dy teh. Chataleipatala chopawtaileipazy a vy aw ei ta, einâ palai thlu pathlei aw ei na,” tah ta. Châhrasala a chariah chhaichhi a chabatuhpa cha a chi ngaitapa vâta tao ngâh leipa ta. Chatanachata Sawla cha a zaozi phia ta, a zaw thlu ta.

⁵ A chariah chhaichhi chabatuhpa ta Sawla cha a thi haw tahpa a hmô nahta, ano chhao a zaozi a zaw thlu ta, thi ha hra ta.

⁶ Cha hawhna chata Sawla nata a sawchapaw pathôhzy cha thi ei ta, ama chhôhkha duata â raohpa ta ama thi khai haw.

⁷ Pheisaihzy a râpai ei ta, Sawla nata a sawchapawzy ama thipa cha, Saikao liata a ypa Izarei chyhsazy ta ama hmô nahta, ama khihpizy puasaipa ta â râpai khai ha ei ta. Philistinâ mo a vy ei ta, Izarei khihpizy liata ama vaw pahrâ haw.

⁸ A mylâ ta, Philistinâ mo cha ama chariah thiepazy chysia pahluh awpa ta vawh ei ta, Kibô Tlâh liata Sawla nata a sawchapawzy ri a zawh thlâh hapa kei hmô ei ta.

⁹ Sawla cha a chysia pahluh ei ta, a luh nata a chariah chhaichhizy la ei ta, thâtih phapa cha ama khazoh nothlahpazy nata chyh­sazy hnohta phuah awpa ta, Philistinâ râh zydua lâta chyhsa tuah ei ta.

¹⁰ Sawla chariah chhaichhizy cha ama khazoh achhyna ozy liata soh ei ta, Dakao achhyna o liata a luh tawh ei ta.

¹¹ Zabekilia khihsaw zydua ta Philistinâ mo ta Sawla chô liata ama hmotaopa zydua ama thei nahta,

¹² pasaipha zydua pua ei ta, Sawla nata a sawchapawzy ri kei la ei ta, Zabe khihpi lâ ama siekhei haw. Ama ruzy cha Zabe khihpi liata ôkâ tho ry liata pabu ei ta, noh sari chhôh kâhvileipa ta y ei ta.

¹³ Sawla cha Abeipa châta ngâ â chhih leipa vâta a thi hapa a châ. Abeipa biepiepa zyh leipa ta, pachaothaipazy tlao a saohiah ta a pachaosa tyh ei.

¹⁴ Abeipa chhihthana tlua vei. Chavâta Abeipa ta Sawla cha thie ta, a khinarâh cha Zese sawchapawpa Dâvi hnohta a pie haw.