1 SAMUELA 9 - Mara Bible RV (BSI)

Samuela ta Sawla sathaw a thu

¹ Benzami râh liata Benzami pathla chyhsa pakha, chyhsa thatlôpa nata riahpha ngaitapa, a moh Kisâ ama tahpa y ta. Kisâ cha Abie sawchapawpa châ ta, Abie cha Zerô sawchapawpa châ ta, Zerô cha Bekôrâ sawchapawpa châ ta, Bekôrâ cha Aphia sawchapawpa a châ.

² Kisâ ta sawchapaw hnei ta, a moh cha Sawla a châ. Ano cha satlia pôraoh a tlai ngaitapa châ ta, Izarei sawzy hry liata ano hlâta hmipha viapa rai y leipa ei ta, chyhsa ahy hmahta a ngiatlâh â khopa y veih ei.

³ Noh kha cha Sawla paw Kisâ alâzy lei ta, Kisâ ta a sawchapawpa Sawla hnohta, “Thyu la, chakaotuhpa pakha a chhi la, sie la alâzy kei tlua teh,” tah ta.

⁴ Epharai tlâh râh chahryh ta, Salisâ râh chhao chahryh ta, châhrasala hmô leipa ei ta. Sâli râh chahryh heih ei ta, cha liana chhao cha y leipa ei ta. Chatawhcha Benzami râh chahryh heih ei ta, châhrasala hmô hlei leipa ei ta.

⁵ Zupha râh ama tlô nahta, Sawla ta a hnohta a siepa a chakaotuhpa hnohta, “A vy teh, a lie thlâh ha ei si, chataleipatala ei pâ ta alâzy pachâ khao leipa ta, keimo tlao miah pachâpa ta, a pachâ a rôh ngâ kaw aw na,” tah ta.

⁶ Châhrasala chakaotuhpa ta a hnohta, “Pachâ tua, he khih liana he Khazohpa chyhsa pakha y ta, chyhsa zachhih ngaitapa a châ, a reipa maih a tlô lymâ tyh. Cha lâ cha vawh tua ei si, eima sie nawpa lâpi miah a chho thei ngyu aw,” tah ta.

⁷ Sawla ta a chakaotuhpa hnohta, “Vawh ei sih la, cha chyhsa châta khâpa ma eima cheipa aw? Eima sahriazy liata viahchhâ hra cha y khao tlôh va, Khazohpa chyhsa châta kuhria eima cheipa awpa y vei. Eima hneipa a y rai ma?” tah ta.

⁸ Chakaotuhpa ta Sawla cha a chhy heih ta, a hnohta, “Moh teh, tâkâ saki miakha ei hnei, he he eima siena awpa lâpi miah a chho thei nawpa ta, Khazohpa chyhsa cha ei pie aw,” tah ta.

⁹ Hlâno Izarei râh liata cha, chyhsa ta Khazohpa â saohiah khoh nahta, “A vy teh, hmôtheituhpa lâ vawh ei si,” ama tah tyh. Tanoh ta hrohsopa he hlâno ta cha hmôtheituhpa tahpa ta aw tyhpa a châ.

¹⁰ Sawla ta a chakaotuhpa hnohta, “Na reipa cha a pha na, a vy teh, vawh ei suh u,” tah ta. Chatanachata Khazohpa chyhsa yna khihpi lâ cha sie ei ta.

¹¹ Khihpi lâ khyna lâpi chakhâ ama kia ngâ no ta, ti thai awpa ta a vaw puapa laihsazy a tyh ei ta, ama hnohta, “He liata hmôtheituhpa a y ma?” tah ei ta.

¹² Laihsazy ta a chhy ei ta, ama hnohta, “A y tlaih, nama hmiata liata a sie. A para teh u, tanoh cha su sâhpa liata atheihna hlâna noh a châpa vâta, tahmâ tlai kha khihpi liata a vaw tlô.

¹³ Khihpi namâ ngiapa nahta, su sâhpa liata pati nie awpa ta a khy hlâta, ano cha thlai nama hmô aw. Atheihna châta byhnâ a aw ha tua awpa a byuhpa vâta, ano a tlô hlâlei cha zawpi ta pati nie aw veih ei. Cha khai tawhta hrua eihpazy ama nie tyh. Chavâta khy para u la, thlai nama hmô aw,” tah ei ta.

¹⁴ Khihpi lâ cha khy ei ta. Khihpi amâ ngiapa nahta, su sâhpa lâ khy a chhuahpa Samuela cha a tyh ei ta.

¹⁵ Mylâ Sawla a vaw tlô awpa noh ta, Abeipa ta Samuela hnohta,

¹⁶ “Mylâ, he daihti liana heta, Benzami râh tawhta nâ lâta chyhsa pakha vaw pasiesa aw na ta, ei phopi Izarei chô liata ryureituhpa châta sathaw na thu aw. Ano ta ei phopi cha Philistinâ mo ku tawhta a pachha aw. Ei phopi chapa pyu ta ei kô kaw daih ta, ei phopi pasataona ei hmô haw,” tahpa ta vaw pahnosa chhielie ha ta.

¹⁷ Samuela ta Sawla a hmô nahta, Abeipa ta a hnohta, “Mo teh, kha chyhsa kha a kyh ei cha chhopa chyhsa cha a châ. Ano ta ei phopi chô liata ryu a reih aw,” tah ta.

¹⁸ Sawla ta Samuela cha thokhy chhikao liata a kei hnia ta, a hnohta “Hmôtheituhpa o khataih liata ma a y? Ngiachhiepa ta na chho teh,” tah ta.

¹⁹ Samuela ta Sawla cha a chhy ta, “Kei he hmôtheituhpa cha ei châ. Su sâhpa lâ pangaipa ta ei hmia lâta sie teh, tanoh ei hnohta pati nie aw chi ta, mylâ my ta cha pasiesa aw na ta, na palôh liata a ypa zydua chhao ei cha chho aw.

²⁰ Noh thôh a lei hapa alâzy kyh liata na pachâ chhie khah sy, ama hmô haw. Izarei liata rônahna zydua cha ahy châta ma a châ? Nâ nata na paw chhôhkha zydua châta châ vei mâ?” tah ta.

²¹ Sawla ta a chhy ta, “Kei he Izarei chi hry liata chi chyh chaipa Benzami chi châ va na mâ? Ei pho chhao Benzami chi pho zydua hry liata pho chyh chaipa châ vei mâ? Kheihtazieta he hawhta ei hnohta a reihpa ma na châ tly?” tah ta.

²² Samuela ta Sawla nata a chakaotuhpa cha a chhi ta, ama pano ta chhôhpadâhpa laipa lâ a ngiakhei ta, hrua eihpa chyhsa sythôhzy hlâta â sâh viapa liata âmo cha patyusa ta.

²³ Samuela ta beihchhotuhpa hnohta, “Ânano ta so awpa ta savyuh ei cha piepa kha vaw cheih teh,” tah ta.

²⁴ Beihchhotuhpa ta a byhpi nata a chô lâta a ypa sa cha vaw cheih ta, Sawla hmiakô liata soh ta. Samuela ta, “Moh teh, nâma châta ano eih ta sopa ama cha vaw pie hih. Nie teh, he savyuh he, ‘Chyhsazy ei hrua ei’ ei tah noh tawhta, he daihti a vaw tlô hlâlei cha nâma châta sopa a châ,” tah ta. Cha noh ta, Sawla cha Samuela pati dôh lâh ta.

²⁵ Su sâhpa tawhta khihpi lâ amâ zu nahta, o chô liata Sawla a zia nawpa taopa ei ta. Sawla cha a mô awpa ta a zia ta.

²⁶ Khih a dei nahta, Samuela ta o chô lâta a ypa Sawla cha aw ta, “Thyu teh, ei cha pasiesa bâ aw,” tah ta. Sawla cha thyu ta, ama pano ta pua ei ta, Sawla nata Samuela cha sie khoh ei ta.

²⁷ Khihpi chhâna opâh ama za tlô nahta, Samuela ta Sawla hnohta, “Châ chakaotuhpa he eima hmia lâta pasiesa la, sie lymâ sala, nâ deikua cha buakha a duah chy teh, Khazohpa bietapa ei cha chho aw,” tah ta.