1 SAMUELA 8 - Mara Bible RV (BSI)

Izarei ta bei â haw

¹ Samuela cha a vaw machâ nahta, a sawchapawzy cha Izarei chô liata ryureituhpazy ta tao ta.

² A sawchapaw uhtheipa moh cha Zôela châ ta, a pazipa moh cha Abizah a châ. Âmo pano he Besebâ liata ryureituhpazy ama châ.

³ Châhrasala a sawchapawzy ta ano lâpi a chhih leipa ei ta, sôh nata piah a chadai ei ta, panaopapanazy la ei ta, adona tleisaipa ta ryu ama rei tyh.

⁴ Chavâta Izarei machâ zydua a hmaohpakhy ei ta, Râmâ khih liata Samuela yna lâ sie ei ta,

⁵ a hnohta, “Pachâ teh, nâ cha machâ kaw bâ chi ta, na sawchapawzy hra ta nâma lâpizy a chhih tlôh leipa ei ta, chavâta phopi hropa zydua taozie hawhta, tahmâ eima chô liata ryu a reih awpa bei miah raopa teh,” tah ei ta.

⁶ “Eima chô liata ryu a reih awpa bei miah pie teh,” ama tahpa kyh chata Samuela cha palysa lei kaw ta. Samuela cha Abeipa lâ thlahchhâ ta.

⁷ Abeipa ta Samuela hnohta, “Zawpi ao ta na hnohta ama reipa zydua cha nathlie mah y. Nâma ama cha khoh leipa châ leipa ta, ama bei châta kei eina khoh leipa ei tlao a châ.

⁸ Izi râh tawhta ei kaw chhi papua noh tawh ei ta tanoh taihta ama tao tyhpa, keima nâ heihsaipa ta, khazoh hropazy ama chakao tyhpa hawh tlai ta, nâma chô liata chhao ama taopa a châ.

⁹ Chavâta ama ao cha nathlie mah y. Anodeikuacha a sia ngaitapa ta ama hnohta zikyu a râ la, ama chô liata ryu a reih awpa bei hmotaozie awpazy chhao âmo pahnosa chhielie ha mah y,” tah ta.

¹⁰ Samuela ta Abeipa bie zydua cha, a hnohta bei a hiahtuhpa Izarei phopi cha chho ta.

¹¹ Ama hnohta, “Nama chô liata ryu a reih awpa bei taozie awpa cha he hawhna heta a châ aw: Nama sawchapawzy la aw ta, a talailih a haoh awpa ta zy, a arâ a kiah awpa ta zy nata a talailih hmia lâta a râ awpazy ta a rao aw ei.

¹² Âmo cha a pheisaih sâh kha hyutuhpa nata sypangawh hyutuhpazy ta rao aw ta, thokhazy cha ano châta lei palietuhpa châta zy, a sâh hriatuhpa châta zy, a chariah chhaichhi taotuhpa châta nata a talailih chhaichhi taotuhpa châta zy a rao aw ei.

¹³ Nama sawchanôzy chhao ropahâhpa taotuhpa châta zy, beih chhotuhpa châta zy, viahchhâ taotuhpa châta zy a la aw ei.

¹⁴ Nama lyuzy, kre sadôzy nata ôli sadôzy hry liata a pha chaipazy la aw ta, a chakaotuhpazy a pie aw ei.

¹⁵ Nama sâh nata nama kre sadôzy tawhta su hrawh su kha la aw ta, a beimachâzy nata a chakaotuhpazy a pie aw ei.

¹⁶ Nama seichapawzy nata nama seichanôzy, nama satlia pha chaipazy, nama alâzy la aw ta, a rai hriatuhpazy ta a tao aw ei.

¹⁷ Nama mietaku zawzy tawhta su hrawh su kha la aw ta, nâmo tlai chhao ano sei lâta namâ lie aw.

¹⁸ Cha noh liata, nâmo tlai ta nama bei châta namâ tlyhpa vâna chata, thata cha aw ei chi ta, châhrasala cha noh liata cha, Abeipa ta châ chhy khao aw veih ei,” tah ta.

Khazohpa ta Izarei ahawna hlao a patloh

¹⁹ Châhrasala Izarei phopi ta Samuela ao cha nathlie khoh leipa ei ta. A hnohta, “Châ vei, eima chô liata bei a y tlai awpa a châ,

²⁰ chatanachata phopi hropa zydua hawhta vaw châ hra aw pi ta, eima bei ta eima chô liata ryureih aw ta, eima hmia lâta siepa ta, eima chariahzy â dyuh aw,” tah ei ta.

²¹ Samuela ta Izarei phopi bie zydua cha a thei nahta, Abeipa nakhaoh liata chho pachhuah ta.

²² Abeipa ta Samuela hnohta, “Ama ao nathlie la, âmo châta bei cha taopa mah y,” tah ta. Chatawhcha Samuela ta Izarei chyhsazy hnohta, “Chyhsa to nama khih chyu lâta a di teh u,” tah ta.