1 SAMUELA 7 - Mara Bible RV (BSI)

¹ Kiriaziari khihsawzy cha zu ei ta, Abeipa Byh cha za la ei ta, tlâh liata Abinadâ o liata tlôkhei ei ta. A sawchapawpa Eliaza cha Abeipa Byh mohôhtuhpa châta hlâ ei ta.

² Kiriaziari liata Byh a y tawhta bohpi tlai vaw châ ha ta, kô kih chhôh tlai y ha ta. Izarei chhôhkha zydua cha Abeipa vâpa ta chaphôhtu ei ta.

Samuela Izarei chô liata ryu a reih

³ Samuela ta Izarei chhôhkha zydua hnohta, “Nama pathipalôh tlokhuh ta Abeipa lâ a kuapa nama châ hmeiseih khiahta cha, râh hropa khazoh nata Astarôzy nama hry tawhta thy khai aw ei chi ta, nama palôh Abeipa lâta paheipa ta, ano deita nama chakao awpa a châ. Chatanachata Philistinâ mo ku tawhna heta a cha pachha aw ei,” tah ta.

⁴ Chavâta Izarei sawzy ta Bâlâ nata Astarô khazohzy cha thy khai ei ta, Abeipa deita chakao ha ei ta.

⁵ Samuela ta, “Izarei saw zydua Mizpâ liata a hmaohpakhy khai teh u, Abeipa lâta thlah ei cha chhâpa aw ei,” tah ta.

⁶ Izarei sawzy cha Mizpâ liata a hmaohpakhy ei ta. Ti thaih ei ta, Abeipa hmiakô liata patlai ei ta, cha noh cha kâhvileipa ta y ei ta. Cha su liana tlai chata, “Abeipa chô liata eima vaw molei haw,” tah ei ta. Samuela cha Mizpâ liana chata Izarei sawzy chô liata ryureih ta.

⁷ Izarei sawzy Mizpâ liata amâ hmaohpakhy tahpa Philistinâ mo ta ama thei nahta, Philistinâ beizy cha Izarei a dyuh awpa ta pua ei ta. Cha kyh cha Izarei sawzy ta ama thei nahta, Philistinâ mo cha chi ngaita ei ta.

⁸ Izarei sawzy ta Samuela hnohta, “Philistinâ mo ku tawhta miah pachha awpa ta, Abeipa eima Khazohpa lâta bâh leipa ta thlah miah chhâpa teh,” tah ei ta.

⁹ Samuela ta mietakutaw sâhpi a pazy haipa la ta, a pôhpa dua ta raopa hlâna ta Abeipa lâ hlâ ta. Chatawhcha Samuela ta Izarei châta Abeipa lâ thlahchhâ ta, Abeipa ta a chhy ta.

¹⁰ Samuela ta raopa hlâna a hlâ hai no tlai chata, Philistinâ mo cha Izarei a dyuh awpa ta a vaw hnia ei ta. Châhrasala cha noh liata Abeipa ta Philistinâ mo chô liata tôkalôhpa thata vaw pathuasa ta, âmo cha patypamâ ta, Izarei hmiakô liata panawhpa ta y ha ei ta.

¹¹ Izarei mo cha Mizpâ tawhta pua ei ta, Philistinâ mo cha a chadai ei ta, Bekâ laikathi tlôna taihta thie lymâ ei ta.

¹² Chatawhcha Samuela ta alô la ta, Mizpâ nata Seni likawh liata bô ta, “Abeipa ta he taih he miah a vaw bao haw,” tah ta, a moh ta Ebeneza a bi.

¹³ Chatanachata Philistinâ mo cha pahniepa ta y ha ei ta, Izarei râh siehnao heih khao veih ei. Samuela hro chhôh zydua cha, Abeipa ku ta Philistinâ mo cha â dyuh lymâ.

¹⁴ Philistinâ mo ta Izarei khihpi ama la hapazy kha, Ekaraw tawhta Kâthâ taihta Izarei ku liata y pakhua heih ta, Izarei ta a râh zydua cha Philistinâ mo ku tawhta a la pakhua khai haw. Izarei nata Amawri mo chhao a dyryh kawpa ta ama y lymâ.

¹⁵ Samuela cha a hro chhôh zydua ta Izarei chô liata ryureih ta.

¹⁶ Kô chareih ta Bethel, Kilkal nata Mizpâ zy chahlô ta, cha su zydua liana chata Izarei chô liata ryureih ta.

¹⁷ Cha khihpizy tawhna chata a o yna Râmâ khihpi lâ a lie heih tyh ta, Râmâ liana chhao chata Izarei chô liata ryureituhpa ta y ta. Abeipa maisâh chhao Râmâ khihpi liata a padua.