1 SAMUELA 6 - Mara Bible RV (BSI)

Biehrai By Izarei lâ a kua

¹ Abeipa Byh cha Philistinâ râh liata thla sari y ta.

² Chatawhcha Philistinâ mo ta theihthaipazy nata pachaothaipazy aw ei ta, ama hnohta, “Abeipa Byh he kheihta ma eima tao aw? Khâpa nata ma a yna su lâ eima pasiesa aw tahpa miah chho teh u,” tah ei ta.

³ Âmo ta, “Izarei Khazohpa Byh he nama pasiesa awpa khiahta cha, ku ruapa ta pasiesa cheita khuh vy, thaileichâna atheihna nama hlâ palie thlyu awpa a châ. Chatanachata patlâhpa ta y aw ei chi ta, nâmo tawhta a ku â pasie leina chhâpa nama pahno aw,” tah ei ta.

⁴ Philistinâ mo ta, “Thaileichâna atheihna châta khâpa ma eima hlâ palie aw?” tah ei ta. Theihthaipazy nata pachaothaipazy ta, “Potlana hri miakha ta nama zydua chô liata nata nama beizy chô liata â lyupa ta a cha tla thlu ei. Chavâta Philistinâ bei papangawh vyuhpa ta ngôh kheihluh nothlahpa miapangawh nata ngôh siahloh nothlahpa miapangawh nama hlâ awpa a châ.

⁵ Nama kheihluh nothlahpazy nata nama râh a paraotuhpa siahloh nothlahpa zy tao u la, Izarei Khazohpa cha palyupalih teh u. Cha hawhta nama tao khiahta cha, nâmo chô liata nata nama khazohzy nata nama râh chô liata a ku a pahua thei ngyu aw.

⁶ Izi mo nata Phiraoh ta palôh kuhchhapa ta ama ypa hawhna khata, khazia nama palôh kuh nama pachhasa hra aw? Khazohpa ta Izi mo kha pasa kawpa ta hria ta, cha khai tawhta Izarei sawzy kha pasiesa ei ta, ama pua hapa kha pahno veih ei chi ma?

⁷ Chavâta tahmâ talailih thiehpa a chhuanoh u la, viahchao panô pô no, a taw sâhpi a pazy haipa, raopaky paky beih leipazy a vaw chhi u la, viahchao panôzy cha talailih liata paky teh u. Ama tawzy deikua cha, a panôzy tawhta la aw ei chi ta, o lâ namâ dikhei ha aw.

⁸ Chatawhcha Abeipa Byh cha la aw ei chi ta, talailih chô liata khaih aw ei chi ta, thaileichâna atheihna châta nama hlâ paliepa ngôh hmo sôhpazy cha thobyh liata khôpa ta, a kâ lâta soh aw ei chi ta, talailih cha pathlie aw ei chi ta, a sie nawpa lâpi lâta nama pasiesa aw.

⁹ Moh thlâh ha aw ei chi ta, ano yna su Beseme râh lâ khyna lâpi a chhihpa ta a sie khiahta cha, eima chô liata pasana rarôh y ngaitapa a patlôsapa he ano tlai châ ta, cha lâta a sie vei khiahta deikua cha, ano ku ta miah a hriepa châ leipa ta, hri chareina daihti nata Byh yna daihti â su chhopa vâta a châ tahpa eima pahno aw,” tah ei ta.

¹⁰ Chyhsazy ta cha hawhna chata tao ei ta, viahchao panô a taw sâhpi a pazy haipa pô no a chhi ei ta, talailih cha viahchao panôzy liana cha paky ei ta, ama tawzy deikua cha o liata khô ei ta.

¹¹ Ngôh siahloh nothlahpa nata kheihluh nothlahpa khôna thobyh chhaota Abeipa Byh cha talailih chô liata khaih ei ta.

¹² Viahchao panôzy cha, a aoh pâ lymâna chôta, Beseme lâpi a chhihpa ta â dypa ta sie lymâ ei ta. Chachâh lâ tlyma, chavei lâ tlyma tlei chachei leipa ta lâlai miakha a chhihpa ta sie lymâ ei ta. Philistinâ beizy ta Beseme râhri taihta pazi ei ta.

¹³ Beseme khih mo cha saikao liata sâh vaw hria ngâ kaw ei ta. A kaw heih ei ta, Byh cha hmô ei ta, byh ama hmôpa cha a ly ngaita ei ta.

¹⁴ Talailih cha Beseme khihpa Zawsua lyu liata a ngia ta, lôpanô lai ngaitapa yna liata a duah ta. Talailih tho cha patlaw ei ta, viahchao panôzy cha raopa hlâna ta Abeipa lâ hlâ ei ta.

¹⁵ Livai chizy ta Abeipa Byh cha ngôh hmo sôhpa yna thobyh chhaota la ei ta, lôpanô chô liata soh ei ta. Cha noh lia tlai chata Beseme khih mo cha raopa hlânazy nata atheihnazy Abeipa lâta hlâ ei ta.

¹⁶ Cha hmozy cha Philistinâ bei papangawhpazy ta hmô khai ei ta, cha noh lilaw ta Ekaraw lâ a lie ha ei ta.

¹⁷ Hezy he thaileichâna atheihna hlâna châta Philistinâ mo ta Abeipa lâta ngôh kheihluh nothlahpa ama hlâ paliepazy a châ: Asadô vyuhpa ta miakha, Kâza vyuhpa ta miakha, Askelaw vyuhpa ta miakha, Kâthâ vyuhpa ta miakha, Ekaraw vyuhpa ta miakha.

¹⁸ Philistinâ bei pangawhzy ry liata khih a ypa zydua vyuhpa ta, thokhy hneipa khihpizy nata thokhy hnei leipa khitawzy rei khaipa ta, ngôh siahloh nothlahpazy chhao thaileichâna atheihna châta Abeipa lâ hlâpa a châ hra. Abeipa Byh ama patyuna lôpanô cha pahnokheituhpa châta Beseme khihpa Zawsua lyu liata tanoh taihta a y thlâh haw.

¹⁹ Beseme khihsaw thokhazy deikua cha, Abeipa Byh chhôh lâ ama mopa vâta, Abeipa ta a thie ha ei. Ama hry liata chyhsa sysari tlai thie ta, Abeipa ta thata a thiepa vâ ei ta khihsawzy cha mâchhiesapa ta ama y.

²⁰ Beseme khihsawzy ta, “He Khazohpa pathaihpa Abeipa hmiakô liana he ahy ma a duah thei aw? Keimo tawhna heta ahy lâ ma khy sala a pha aw tly?” tah ei ta.

²¹ Kiriaziari khihpi lâ chyhsa tuah ei ta, ama hnohta, “Abeipa Byh kha Philistinâ mo ta ama vaw soh pakhua haw. A zu u la, nâmo paso awpa ta za la teh u,” tah ei ta.