1 SAMUELA 5 - Mara Bible RV (BSI)

Philistinâ mo nata Biehrai Byh

¹ Philistinâ mo ta Khazohpa Byh cha patu ei ta, Ebeneza tawhta Asadô khihpi lâ siekhei ei ta.

² Philistinâ mo ta Khazohpa Byh cha cheih ei ta, Dakao achhyna o liata a ngiakheipa ta, Dakao kiapâh liata soh ei ta.

³ A mylâ mydi kari ta Asadô chyhsazy cha thyu ei ta, Dakao cha Abeipa Byh hmiakô liata â khu lâta vaw pao thlâh ha ta. Dakao cha la ei ta, a yna su liata soh heih ei ta.

⁴ A mylâ heihpa mydi kari ta ama thyu nahta, Dakao cha Abeipa Byh hmiakô liata â khu lâta vaw pao thlâh ha heih ta. Dakao luh nata a kupazah miano â tai pachhôpazy cha chhikao thaby liata a vaw thy thlâh ha ta, Dakao cha a pôhpa deita ta vaw y ta.

⁵ Cha vâna chata Dakao theihthaipazy nata Dakao achhyna o lâ a ngiapazy ta, Asadô liata Dakao chhikao châkeih cha tanoh taihta chakâ ngâh veih ei.

⁶ Abeipa ku ta Asadô chyh­sazy cha vi ta, âmo cha pahleipadia ta, Asadô nata a chheipâh khihzy cha kheihluh ta hrie ta.

⁷ Asadô liata chyhsazy ta hmo yzie ama pahno nahta, “Izarei Khazohpa Byh he eima hnohta a y awpa châ vei, keimo chô liata nata eima khazoh Dakao chô liata ku a pathlapa he a pasa tu haw,” tah ei ta.

⁸ Chyhsa tuah ei ta, Philistinâ bei zydua aw pakhy ei ta, ama hnohta, “Izarei Khazohpa Byh he kheihta ma eima tao aw?” tah ei ta. Âmo ta, “Izarei Khazohpa Byh he Kâthâ khihpi lâ siekheipa châ mawh sy,” tah ei ta. Chatanachata Izarei Khazohpa Byh cha Kâthâ khihpi lâ siekhei ei ta.

⁹ Khihpi ama tlôkhei nahta, Abeipa ta khihpi chô liata a ku pathla ta, khihpi cha thata a tymâ ta, khihpi chyhsazy cha a lai a chyh ta hrie ta, ama keihkhaohzy lâ taihta kheihluh pathlasa ta.

¹⁰ Khazohpa Byh cha Ekaraw lâ paphao heih ei ta. Khazohpa Byh Ekaraw a tlô nahta, Ekaraw khihsawzy ta, “Keimo nata eima phopi thie awpa ta, Izarei Khazohpa Byh he keimo lâ ama vaw cheipa a châ hih,” tahpa ta awh chaimâh ei ta.

¹¹ Chavâta chyhsa tuah ei ta, Philistinâ bei zydua awpakhy ei ta, ama hnohta, “Izarei Khazohpa Byh he pasiesa syulyu ha teh u. Keimo nata eima phopi he miah a thie khao lei nawpa ta, a yna su dopa lâ kua heih mawh sy,” tah ei ta. Khihpi chhôh zydua liata chhiena rarôh ypa tlô ta, Khazohpa ta khihpi chô liata ku a pathlapa cha a hri ngaita ta.

¹² A thi leipazy cha kheihluh ta thla ei ta, khihpi chana pyu cha avâ taihta kaw daih ta.