1 SAMUELA 4 - Mara Bible RV (BSI)

Philistinâ mo ta Biehrai Byh ama la

¹ Samuela bie cha Izarei râh zydua liata pathâh ta. Izarei sawzy cha Philistinâ mo a dyuh awpa ta pua ei ta. Ebeneza liata riehmo paryh ei ta. Philistinâ mo chhao Aphe liata riehmo paryh hra ei ta.

² Philistinâ mo cha Izarei a dyuh awpa ta a paziah ei ta, thata a dyuh ei ta. Philistinâ mo hmiakô liata Iza­rei cha panawhpa ta y ta, Philistinâ mo ta Izarei chyhsa sâh palih rachhôh adyuhna su liata ama thie haw.

³ Izarei phopi cha riehmo ama tlô nahta, machâzy ta, “Khâpa vâta ma tanoh he Abeipa ta Philistinâ mo hmiakô liata miah a panawh ha tly i? Abeipa Biehrai Byh Silô lâ kei la ei sih la, he lâ vaw cheih ei suh u, chatanachata eima hnohta sie aw ta, eima chariahpazy ku tawhta miah a pachha aw,” tah ei ta.

⁴ Silô lâ cha chyhsa tuah ei ta, cherubizy likawh beidyuchhai liata patyupa Pheisaihzy Abeipa Biehrai Byh cha kei palasa ei ta. Eli sawchapawpa pano, Hôphani nata Phinehâ zy cha Khazohpa Biehrai Byh hnohta sie hra ei ta.

⁵ Abeipa Biehrai Byh cha riehmo a vaw tlô nahta, Izarei zydua cha alei a chalyu ngâna taihta a paro ngaitapa ta awh ei ta.

⁶ Philistinâ mo ta ama awpa pyu cha ama thei nahta, “Hebrai mo riehmo liata awpa pyu a paro ngâpa cha khâpa ma a yzie tly?” tah ei ta. Abeipa Byh riehmo liata a vaw tlôpa a châzie ama pahno nahta,

⁷ Philistinâ mo cha chi ngaita ei ta, “Riehmo lâ khazoh â vy ha chu,” tah ei ta. “Eima hu a po na! He hawhpa hmo he y beih vei.

⁸ Eima hu a po na! Cha khazoh thatlôpa ku tawhta ahy ma miah a pachha thei aw? Cha khazoh cha potlana to ta râhchawhpa liata Izi mo a thietuhpa kha a châ.

⁹ Hy nâmo, Philistinâ mozy saih u, riahphapa ta y u la, chapaw kawpa ta y teh u, chataleipatala nama sei a châ tyhpa Hebrai mo sei ta nama y pathlei aw na. Chapaw kawpa ta y u la, a dyuh teh u,” tah ei ta.

¹⁰ Philistinâ mo ta a vaw dyuh ei ta, Izarei cha pahniepa ta y ha ta, ama poh o chyu lâta a râ ei ta. Izarei mo cha thata thie ei ta, Izarei alei pheisaih 30,000 tlai thiepa ama châ.

¹¹ Khazohpa Byh cha la ei ta, Eli sawchapawpa pano Hôphani nata Phinehâ chhao cha thie pâ ha hra ei ta.

¹² Benzami chyhsa pakha adyuhna su tawhta a vaw râ ta, a chysiazy hriepa ta nata a luh liata dohlei a miapa ta, cha noh lia tlai ta Silô khihpi vaw tlô ta.

¹³ A vaw tlô nota Eli cha lâpi kiah liata dyuchhai liata a tyuh ta, vaw sai thlâh ha ta. Khazohpa Byh vâta a palôh thata a chalyu ta. Cha chyhsa cha khihpi vaw tlô ta, hmo yzie a rei nahta, a khihpi dua ta thata sâh ei ta.

¹⁴ Eli ta ama sâpa pyu cha a thei nahta, “Cha pyury cha khâpa pyury tlyma?” tah ta. Chyhsa cha a parapa ta Eli lâ a râ ta, a hnohta hmo yzie chho ta.

¹⁵ Eli cha kô sychaki nata kô charie uhtheipa châ ha ta, a mo chhao zoh ha ta.

¹⁶ Chyhsa chata Eli hnohta, “Adyuhna su tawhta a vypa ei châ, adyuhna su tawhta tanoh a vaw râpa ei châ,” tah ta. Eli ta, “Ei sawchapawpa, khâpa nama lyu?” tah ta.

¹⁷ Zikyu a vaw râpa ta a chhy ta, “Philistinâ mo hmiakô liata Izarei a râpai ha ta, zawpizy hry liata chyhsa hluhpi thiepa châ ei ta, na sawchapawpa pano, Hôphani nata Phinehâ chhao thi ei ta, Khazohpa Byh chhao Philistinâ mo ta ama la haw,” tah ta.

¹⁸ Cha chyhsa ta Khazohpa Byh kyh a reipa nahta, Eli cha chhikao thaby liata dyuchhai tawhta â die lâta pao ta. Pawpipa châ ta, â hri ngaitapa vâta, a rao thlie ta, thi ha ta. Eli cha Izarei chô liata kô sypalih ryureih ta.

¹⁹ A myuhnô, Phinehâ lapinô cha saw phaoh ta, pih daihmâ ha ta. Khazohpa Byh lapa a châpa nata a parâhpa nata a vahpa ama thipa thâtih a thei nahta, nawh thlai ta a zeih ta, a bôh ta a nawh cha a chhaih ta.

²⁰ A thi chy ta, nawh paytuhpa chanôzy ta a hnohta, “Chi kha, sawchapaw na sa hih,” tah ei ta. Châhrasala a chhy leipa ta, a pachâ chhao pachâ vei.

²¹ Khazohpa Byh lapa a châpa vâta nata a parâhpa nata a vahpa kyh vâta, “Rônahna ta Izarei a puasai haw” tah ta, hawti moh cha Ikhabaw bi ta.

²² “Khazohpa Byh lapa châ ha ta, rônahna ta Izarei a puasai haw,” tah ta.