1 SAMUELA 31 - Mara Bible RV (BSI)

Sawla nata a sawchapawzy thina

¹ Philistinâ mo ta Izarei a dyuh heih ei ta. Izarei chyhsazy cha Philistinâ mo hmiakô tawhta a râpai ei ta, Kibô Tlâh liata thiepa ta y ei ta.

² Philistinâ mo ta Sawla nata a sawchapawzy cha a chadai lymâ ei ta, Philistinâ mo ta Sawla sawchapawpa Zawnathâ, Abinadâ nata Mekhisua zy cha thie ei ta.

³ Adyuhna cha ru ngaita ta, Sawla cha thata chadie ei ta, likathaipazy ta Sawla cha hmô ei ta, hmah thata paphao ei ta.

⁴ Sawla ta a chariah chhaichhi a chabatuhpa hnohta, “Na zaozi kha phia la, nâ vaw chôsao teh, chataleipatala chopawtaileipa sahlaozy a vy aw ei ta, nâ vaw chôsao aw ei ta, einâ palai thlu pathlei aw ei na,” tah ta. Châhrasala a chariah chhaichhi chabatuhpa cha a chi ngaitapa vâta tao kho leipa ta. Sawla ta ano zaozi la ta, pao thlu ta.

⁵ A chariah chhaichhi chabatuhpa ta Sawla a thipa a hmô nahta, ano chhao ta a zaozi pao thlupa ta, Sawla hnohta thi ha hra ta.

⁶ Chatanachata Sawla, a sawchapawpa pathôh, a chariah chhaichhi a chabatuhpa nata a chyhsa zydua cha, noh kha chhôh ta ama thi khai haw.

⁷ Izarei mo a râpai ei ta, Sawla nata a sawchapawzy ama thi hapa cha, Saikao haosâ lâta Izarei chyhsa a ypazy nata Zawdâh haosâ lâta a ypazy ta ama hmô nahta, ama khihpizy puasaipa ta a râpai khai ha ei ta. Philistinâ mo a vy ei ta, Izarei khihpizy liana cha ama vaw pahrâ haw.

⁸ A mylâ ta Philistinâ mo cha ama chariah thiepazy chysia pahluh awpa ta vawh ei ta. Sawla nata a sawchapawpa pathôhzy cha athipa ta Kibô Tlâh liata kei hmô ei ta.

⁹ Sawla cha a luh tai ei ta, a chariah chhaichhizy pahluh ei ta, ama nothlahpa achhyna ozy liata nata zawpizy hnohta a thâtih phuah awpa ta, Philistinâ râh zydua liata zikyu parâsa ei ta.

¹⁰ A chariah chhaichhizy cha Astarô o liata soh ei ta, a ri deikua cha Besâ thokhy liata chahry pâ ei ta.

¹¹ Philistinâ mo ta Sawla ama taotiazie cha Zabekilia khihsawzy ta ama thei nahta,

¹² pasaipha zydua thyu ei ta, azozâkhihdei ta sie ei ta, Besâ thokhy liata ama chahry pâpa Sawla ri nata a sawchapawzy ri cha la ei ta, Zabe vaw tlôkhei ei ta, cha liata rao ei ta.

¹³ Ama ruzy la ei ta, Zabe liata tamâri kô ry liata pabu ei ta, noh sari chhôh kâhvileipa ta mâchhie ama sa.