1 SAMUELA 30 - Mara Bible RV (BSI)

Dâvi ta Amale mo a pahnie

¹ A noh thôhna noh liata Dâvi nata a chyhsazy cha Zikalâ tlô ei ta. Amale mo ta Neke nata Zikalâ khihpi chho ei ta. Zikalâ cha pahnie ei ta, mei ta rao ha ei ta.

² Chanôzy nata cha liata a ypa maih a lai a chyh ta sei ta patu ei ta. Pakha hmah thie leipa ta, a chhi ei ta ama siekhei khai haw.

³ Dâvi nata a chyhsazy cha khihpi vaw tlô ei ta, moh teh u, mei ta vaw kâ khai ha ta. Ama lapinôzy nata ama sawchapawzy nata ama sawchanôzy cha sei ta vaw patu ha ei ta.

⁴ Dâvi nata a hnohta a ypa chyhsazy cha ama tha chhâ khai hana taihta aoh tlili ta cha ei ta.

⁵ Dâvi lapinô pano, Zezari zuah Ahinô nata Nâbâ ta a panôhmeipa Kâmel zuah Abikai zy chhao sei ta amâ chhi ha hra.

⁶ Chyhsa to ta ama sawchapawzy nata sawchanôzy vâta palôh pasa ngaitapa ta y ei ta. Chavâta Dâvi cha alô ta vaw awpa kyh reih ei ta. Dâvi cha a nôpo kaw ta. Châhrasala Dâvi cha Abeipa a Khazohpa liata tha a patlô ta.

⁷ Dâvi ta Ahimele sawchapawpa theihthaipa Abiathâ hnohta, “Ephaw na vaw pie teh,” tah ta. Abiathâ ta Ephaw cha Dâvi vaw pie ta.

⁸ Dâvi ta Abeipa a saohiah ta, “Pheisaihzy cha ei chadai aw ei ma? Ei pha aw ei ma?” tah ta. Abeipa ta a chhy ta, “A chadai teh, âmo cha pha cheingei aw chi ta, na chyhsazy na pachha khai heih aw ei,” tah ta.

⁹ Dâvi cha a hnohta a ypa chyhsa za charu chhaota pua ta, Besô chavah tlô ei ta. Zawpi a pha thei leipazy cha, cha liata a ngua ei ta.

¹⁰ Dâvi nata pheisaih za palihzy deikua cha, a chadai lymâ ei ta. Ama tha a chhâ tupa vâta chavah a chaka thei leipa manôh za nozy cha, Besô chavah liata a ngua ha ei ta.

¹¹ Lyurâhpa liata Izi chyhsa pakha hmô ei ta, Dâvi lâ a vaw chhi ei ta. Viahchhâ pie ei ta, nie ta. Ti do awpa pie ei ta,

¹² theiku viahchhâ pakâhpa tlâ kha nata kre pachawhpa sao no pie ei ta. A nie khai nahta, a palôh tha vaw tlô heih ta. Noh thôh nata zâ thôh chhôh viahchhâ nie leipa nata ti do leipa ta a vaw ypa a châ.

¹³ Dâvi ta a hnohta, “Ahy chyhsa ma na châ? Khataih tawhta ma nâ vy?” tah ta. Ano ta, “Izi satlia châ na ta, Amale chyhsa chakaotuhpa ei châ. Ei tlâh leipa vâta noh thôh a khô hapa liana khata ei zibeipa ta eina siesai haw.

¹⁴ Khere mo chho râh, Zudâh râh nata Kâlebâ chho râh zy chho pi ta, Zikalâ chhao mei ta eima rao haw,” tah ta.

¹⁵ Dâvi ta a hnohta, “Cha pheisaihzy yna lâ cha einâ chhi thei aw chi ma?” tah ta. Ano ta, “Na thie lei awpa nata ei zibeipa ku liata na hlâ lei awpa ta, Khazohpa moh ta bie einâ taih khiah chi ta cha, pheisaihzy yna lâ cha ei châ chhi aw,” tah ta.

¹⁶ Izi chyhsa chata Dâvi cha Amale mo yna lâ a chhi ta. Moh teh u, Amale mo cha su to liata a vaw hiezâh hôlô ei ta. Philistia râh nata Zudâh râh tawhta hraona hluhpi ama lapa vâta niedopa nata lâsopa ta y ei ta.

¹⁷ Dâvi ta zâlâ noh hawh khaihpa tawhta a mylâ zâlâ taihta âmo cha thie ta, râraoseihpa kiah ta a râ hapa satlia za palih tah leipa ta cha, chyhsa pakha hmahta a hrohpa y veih ei.

¹⁸ Dâvi ta Amale mo lapa hmo zydua la pakhua khai ta, a lapinô panozy chhao a pachha ha ei.

¹⁹ A lai a chyh, sawchanô sawchapaw, ama hraopa nata ama lapa hmo khâpa hmah a ki leipa y tlâ vei. A zydua ta Dâvi ta a la pakhua khai haw.

²⁰ Dâvi ta mietaku zaw nata viahchao zaw zydua la ta, pheisaihzy ta sahrohzy cha Dâvi hmia lâta haoh laih ei ta, “He he Dâvi hraopa a châ hih,” tah ei ta.

²¹ Ama tha a chhâ kawpa vâta Dâvi zi thei khao leipa ei ta, Besô chavah liata ama siesai hapa chyhsa za nozy yna kha Dâvi ta kei tlô ta. A sie thei khao leipazy chata Dâvi nata a chyhsazy dy awpa ta vaw pua ei ta. Dâvi ta âmo cha a kei hnia ta, a naoh ta.

²² Dâvi hnohta a siepazy hry liata moleipa nata chyhsa chhiepa zydua ta, “Eima hnohta sie hra tlôh leipa ei ta, chavâta hraona sôh eima la pakhuapazy he âmo pie hra aw ma pi, ama lapinô nata sawzy deikua cha a chhi aw ei ta, ama sie thei aw,” tah ei ta.

²³ Dâvi ta, “Ei unawhzy saih u, Abeipa miah piepa hmo he cha hawhta nama tao awpa châ vei. Abeipa ta miah pabohsa ta, pheisaih miah a vaw siehnaopazy eima ku liata miah a pie haw.

²⁴ Ahy ma he kyh liata châ nathlie aw ei? Adyuhna lâ a siepazy topa hawhta, hmobaoh vaih awpa ta a nguapazy chhao he ama to hra aw. Â khopa ta ama to hra awpa a châ,” tah ta.

²⁵ Cha bie cha Izarei châta bieraopa nata biezyhpa ta hmâh ta, cha noh tawhta tanoh taihta hmâ lymâ awpa ta tao ha ta.

²⁶ Dâvi cha Zikalâ a vaw tlô nahta, hraona sôh thokhazy cha a viasa Zudâh machâzy paphao ta, ama hnohta, “He he nâmo châta hmosaipa a châ, Abeipa chariahpazy hraona sôh a châ hih,” tah ta.

²⁷ Cha hmosaipazy cha Bethel liata a ypazy, Ramô chho lâta a ypazy, Zati liata a ypazy,

²⁸ Arôerâ liata a ypazy, Siphamô liata a ypazy, Estemô liata a ypazy,

²⁹ Râkalâ liata a ypazy, Zerameli khihpizy liata a ypazy, Keni khihpizy liata a ypazy,

³⁰ Hômâ liata a ypazy, Bôrasâ liata a ypazy, Athakâ liata a ypazy nata

³¹ Hebraw liata a ypazy hnohta paphao ta. Dâvi nata a chyhsazy a khiekhâ tyhna su zydua liata a ypazy hnohta paphao khaipa a châ.