1 SAMUELA 3 - Mara Bible RV (BSI)

Abeipa ta Samuela a aw

¹ Hawtipa Samuela cha Eli hmiakô liata Abeipa chakao lymâ ta. Cha daihtizy liata cha, Abeipa bie sôh kaw ta, aluahna chhao y tu leipa ta.

² Cha daihti liata, Eli cha a yna su liata a zia thlâh ha ta. A mo a zoh pathao hapa vâta a phathipa ta hmô thei khao leipa ta.

³ Khazohpa meiôh thi mâh leipa ta. Samuela cha Khazohpa byh yna Abeipa Achhyna o liata a zia thlâh ha ta.

⁴ Abeipa ta Samuela cha aw ta, Samuela ta, “He liata ei y” tah ta,

⁵ Eli lâ a kei râ ta, a hnohta, “He liata ei y, na aw chi ta,” tah ta. Eli ta, “Cha aw va na, vâ zia heih teh,” tah ta. Vawh ta, a kei zia heih ta.

⁶ Abeipa ta “Samuela!” tahpa ta aw heih ta, Samuela cha thyu ta, Eli lâ vawh ta, “He liata ei y, na aw chi ta,” tah ta. Eli ta a chhy ta, “Cha aw va na, ei sawchapawpa y, a kei zia heih teh,” tah ta.

⁷ Cha daihti liata Samuela cha Abeipa pahno mâh leipa ta, Abeipa bie chhao a hnohta phuahpa châ mâh vei.

⁸ Abeipa ta Samuela cha a ei thôhna ta aw heih ta. Thyu ta, Eli lâ vawh ta, a hnohta, “He liata ei y, na aw chi ta,” tah ta. Hawtipa cha Abeipa ta a aw tahpa Eli ta pahno ha ta.

⁹ Chavâta Eli ta Samuela hnohta, “Vawh la, a kei zia la, a cha aw heih khiahta cha, ‘Abeipa y, bie reih teh, châ chakaotuhpa ta a nathlie,’ tah mah y,” tah ta. Chatawhcha Samuela cha vawh ta, a yna liata a kei zia ta.

¹⁰ Abeipa cha a vy ta, a vaw duah ta, a aw tua notapa hawhna khata, “Samuela, Samuela!” tahpa ta aw heih ta. Samuela ta, “Reih mah y, châ chakaotuhpa ta a nathlie na,” tah ta.

¹¹ Abeipa ta Samuela hnohta, “Moh teh, Izarei liata hmo miakha tao aw na ta, a theipa maihta ama nah kârano ta a khai aw.

¹² Eli pathlazy kyh ei reipa zydua kha, cha noh liata âthaona tawhta achhâna taihta a chô liata ei patlôsa aw.

¹³ A sawchapawzy ta reipachhie tlâhpa ta âmosasyh ta â tao ei ta, cha cha a pahno thlâh hana chôta a pakhâ leipa vâta, a pathlazy cha chhâzaw ta ei hrie aw ei tahpa chho ha na ta.

¹⁴ Chavâta Eli pathlazy moleina cha atheihna ta tlyma, hmohlâpa ta tlyma, khati ta hmahta pathaisa theipa châ khao aw vei, tahpa ta Eli pathlazy hnohta bie ei vaw taih haw,” tah ta.

¹⁵ Samuela cha my taihta a zia ta, chatawhcha Abeipa o ochhizy cha pahy ta. Samuela ta aluahna a hmôpa cha Eli pahnosa awpa chi kaw ta.

¹⁶ Châhrasala Eli ta Samuela cha aw ta, a hnohta, “Samuela, ei sawchapawpa,” tah ta. Samuela ta, “He liata ei y,” tah ta.

¹⁷ Eli ta, “Khâpa hmo ma Abeipa ta a cha chho tly? Keima liata khâpa hmah phih khah y. A cha chhopa zydua keima liata phihpa na hnei khiahta cha, Khazohpa ta na chô liata a tao awpa hawhta tao sala, cha hlâta pasa viapa chhao ta tao mawh sy,” tah ta.

¹⁸ Chatanachata Samuela ta Eli cha hmo to chho khai ta, ano liata phihpa khâpa hmah hnei vei. Eli ta, “Cha cha Abeipa a châ chu, ano ta pha a tahpa hawhta tao mawh sy,” tah ta.

¹⁹ Samuela cha laiseih lymâ ta, a hnohta Abeipa y ta, a bie reipazy leilô liata a pailyupa y vei.

²⁰ Dânâ tawhta Besebâ taihta Izarei zydua ta Samuela cha Abeipa hrohsopa châta paduapa a châ tahpa pahno ha ei ta.

²¹ Abeipa cha Silô liata a luah heih ta, Abeipa bie hmâpa ta Samuela hnohta anosasyh ta a phualuah ta.