1 SAMUELA 29 - Mara Bible RV (BSI)

Philistinâ mo ta Dâvi ama dytha

¹ Philistinâ mo cha ama pheisaih zydua Aphe liata pahmaoh ei ta. Izarei mo chhao Zezari liata tikhaoh kiapâh liata riehmo paryh ei ta.

² Philistinâ beizy cha a za za ta nata a sâh sâh ta hrâsiena lâ pua ei ta. Dâvi nata a chyhsazy cha Akisâ chhaota hnôh lâ a chhâh ei ta.

³ Philistinâ pheisaih hyutuhpazy ta, “He Hebrai mo he, he liata khâpa ma ama tao?” tah ei ta. Akisâ ta Philistinâ pheisaih hyutuhpazy hnohta, “He he Davi, Izarei bei Sawla chakaotuhpa a châ. Kei lâ â vaw râ tawhta, ei hnohta cha ti kô sy y ha ta, tanoh taihta ano liata adoleina khâpa hmah hmô va na?” tah ta.

⁴ Châhrasala Philistinâ pheisaih hyutuhpazy cha Akisâ chô liata ama hiehâh ta, a hnohta, “He chyhsa he pakuasa la, ano châta su na raopa lâ a lie ha mawh sy. Adyuhna lâ eima hnohta a sie awpa châ vei. Chataleipatala adyuhna liata keimo miah a dyuhtuhpa a châ pathlei aw. He chyhsa heta kheihta ma a zibeipa â ryh heih thei aw? He liata a ypa chyhsazy luh heta a kei ryh heih â chhuahpa châ vei ma?

⁵ Ano he, “‘Sawla ta a sâh a sâh ta thie ta, Dâvi ta a thy a thy ta a thie,’ tahpa ta, lâna chôta a thâtih hla ta amâ paliepa Dâvi kha châ vei ma?” tah ei ta.

⁶ Akisâ ta Dâvi cha aw ta, a hnohta, “Abeipa hrona reipa ta ei reih, chyhsa dopa châ chi ta, chavâta pheisaihzy hry liata ei hnohta na sie tyhpa nata na vaw tlô tyhpa zy he, keima mohmô liata la a pha ngaita. Kei lâ nâ vy noh tawhta tanoh taihta, nâma liata adoleina khâpa hmah hmô va na. Châhrasala beimachâzy heta cha ngâ veih ei.

⁷ Chavâta tahmâ a lie ha la, Philistinâ beimachâzy palysa leipa ta na y lei nawpa ta, palôh tlâh kawpa ta sie ha mah y,” tah ta.

⁸ Dâvi ta Akisâ hnohta, “Khâpa hmo ma ei tao ha tly? Ei zibeipa abei chariahzy adyuhna lâ sie lei awpa ta, na hmiakô liata ei y pathao noh tawhta tanoh taih heta châ chakaotuhpa liana heta khâpa ma na hmô tly?” tah ta.

⁹ Akisâ ta Dâvi cha a chhy ta, a hnohta, “Keima mohmô liata la Khazohpa vâlyuhchâpa hawh tlai ta seina hnei leipa na châ. Châhrasala Philistinâ pheisaih hyutuhpazy ta, ‘Adyuhna lâ eima hnohta a sie awpa châ vei,’ ama tah haw.

¹⁰ Chavâta na hnohta a vaw sie hrapa na zibeipa chakaotuhpazy chhao heta mydi kari ta thyu u la, mydi kari ta pua u la, khih pavâpa nahta sie ha muh vy,” tah ta.

¹¹ Chatanachata Dâvi nata a chyhsazy cha thyu patoh ei ta, Philistinâ râh lâ cha mydi ta a lie ha ei ta. Philistinâ mo deikua cha Zezari lâ khy ei ta.