1 SAMUELA 28 - Mara Bible RV (BSI)

Sawla ta peihthaipa â saohiah

¹ Cha nohzy liata, Philistinâ mo cha Izarei a dyuh awpa ta ama pheisaihzy pahmaoh ei ta. Akisâ ta Dâvi hnohta, “Nâma nata na chyhsazy he pheisaihzy hry liata ei hnohta nama sie hra awpa a châ tahpa pahno mah y,” tah ta.

² Dâvi ta Akisâ hnohta, “A pha na, châ chakaotuhpa hmotaotheizie na pahno aw,” tah ta. Akisâ ta Dâvi hnohta, “A pha na, na hro chhôh zydua nâ vaituhpa ta ei cha tao aw,” tah ta.

³ Samuela cha thi ha ta, Izarei zydua ta ano châta mâchhiesa ei ta, ano khih, Râmâ liata ama pabu hapa kha châ ta. Peihthaipazy nata dyuthaipazy chhao Sawla ta râh tawhta papua khai ha ta.

⁴ Philistinâ mo cha a pahmaohpakhy ei ta, a vy ei ta, Sune liata riehmo paryh ei ta. Sawla ta Izarei mo zydua awpakhy ta, Kibô liata riehmo paryh hra ei ta.

⁵ Sawla cha Philistinâ pheisaihzy a hmô nahta, chi ngaita ta, liathih thata nie ta.

⁶ Abeipa a saohiah ta, châhrasala Abeipa ta mâ lâta tlyma, Uri ta tlyma, hrohsopazy hmâpa ta tlyma a chhy leipa ta.

⁷ Sawla ta a chakaotuhpazy hnohta, “Peihthaipa chanô na tluapa teh u, ano lâ sie aw na ta, ei saohiah aw,” tah ta. A chakaotuhpazy ta a hnohta “Enadaw khih liata peihthaipa chanô a y,” tah ei ta.

⁸ Sawla cha a hmisâ nata â tobizie panano ta, ano nata chyhsa hropa pano chhaota sie ei ta. Chanô yna cha zâ ta kei tlô ei ta. Sawla ta, “Peihpa ta thlahpa nâ saohiahpa la, a moh ei cha chhopa maih na awpa mah y,” tah ta.

⁹ Chanô ta a hnohta, “Pachâ teh, Sawla hmotaopa pahno chi ta, peihthaipa nata dyuthaipazy râh tawhta a pahlei khai hazie na pahno. Khazia ei hrona he khoheih chôkhâhpa ta, ei chô liata thina patlôsa nâ chhuah tly?” tah ta.

¹⁰ Sawla ta Abeipa moh ta a hnohta bie a taih ta, “Abeipa hrona reipa ta ei reih, he hmo vâna heta na chô liata hriena tlô cheita aw vei,” tah ta.

¹¹ Chanô ta, “Ahy ma ei cha awpa aw?” tah ta. Ano ta, “Samuela na awpa teh,” tah ta.

¹² Chanô cha Samuela a hmô nahta, thata sâh ta. Chanô ta Sawla hnohta, “Khazia eina dôvei chi? Sawla na châpa he,” tah ta.

¹³ Abei ta a hnohta, “Chi khah y. Khâpa na hmô?” tah ta. Chanô ta Sawla hnohta, “Alei tawhta khazoh a kaw puapa ei hmô” tah ta.

¹⁴ Sawla ta a hnohta, “Khâpa a lyu?” tah ta. Chanô ta, “Pawpipa kaw pua ta, viahkao pasipa â ky,” tah ta. Sawla ta Samuela a châ tahpa pahno ta, a hmia alei lâ a khupa ta a naoh ta.

¹⁵ Samuela ta Sawla hnohta, “Khazia he hawhta na aw papuapa ta eina patypamâ chi?” tah ta. Sawla ta a chhy ta, “Ei nôpo ngaitapa vâta a châ. Philistinâ mo ta nâ dyuh ei ta, Khazohpa hra cha nâ heihsai ha ta, hrohsopazy hmâpa ta tlyma, mâ lâta tlyma, nâ chhy khao leipa ta. Chavâta ei tao awpa na chho awpa ta ei cha aw papua,” tah ta.

¹⁶ Samuela ta, “Cha hawhta Abeipa ta châ heihsai ha ta, na chariahpa lâta tlao â lie hapa na pahno thlâh tlôh khiahta cha, khazia eina hiahri chi?

¹⁷ Keima hmâpa ta a reipa hawhna khata, Abeipa ta na chô liata a tao ha cha zaw. Abeipa ta khinarâh cha na ku tawhta la ta, na opapa Dâvi a pie haw.

¹⁸ Abeipa ao nathlie leipa chi ta, a hiehâhna ru ngaitapa phuh cha Amale chô liata na patlôsa leipa vâta, Abeipa ta he hmo he tanoh na chô liata a patlôsapa a châ.

¹⁹ Cha dei châ vei, Izarei chhao, nâma chhao, Abeipa ta Philistinâ mo ku liata a cha hlâ aw ei. Mylâ cha nâma nata na sawchapawzy ei hnohta nama y ha aw. Izarei pheisaihzy chhao Abeipa ta Philistinâ mo ku liata a pie aw,” tah ta.

²⁰ Samuela biezy vâta Sawla cha chi ngaita ta, eikhapi ta a tlai ta alei liata pao ta. Noh y kha nata azozâkhihdei khâpa hmah a nie leipa vâta, tha rai hnei khao leipa ta.

²¹ Chanô cha Sawla lâ a vy ta, a chi ngaita tahpa a hmô nahta, a hnohta, “Nathlie teh, châ chakaotuhnô he na rei châ ngiah na ta, ei hnohta bie na reipazy kha ei hrona sokhâhpa ta ei nathliepa a châ.

²² Chavâta tahmâ, nâ chhao ta châ chakaotuhnô ao he ngiachhiepa ta nathlie hra mah y. Na sie tita thatlôna na hnei thei nawpa ta, viahchhâ a chyhta cha vaw taopa aw sah la, nie mah y,” tah ta.

²³ Châhrasala khoh leipa ta, “Nie aw va na,” tah ta. Châhrasala chanô nata ano Sawla chakaotuhpazy ta amâ haw ngâ kawpa vâta, ama biezy cha a pyh ta. Alei tawhta thyu ta, rakhô liata a tyuh ta.

²⁴ Chanô ta viahchaotaw thawhpa a o liata hnei ta, thlai thie ta, viahdie la ta, nyh ta, thinô pahlao leipa viahchhâ tao ta,

²⁵ Sawla nata a chakaotuhpazy hmiakô liata soh ta, nie ei ta. Chatawhcha thyu ei ta, cha zâ liata sie ha ei ta.