1 SAMUELA 27 - Mara Bible RV (BSI)

Philistinâ mo hry liata Dâvi a pahrâ

¹ Dâvi ta a palôh liata, “Khati ta ma cha Sawla ku liata ei leidia ualua aw hih. Philistinâ râh lâ a râpa hlâta a pha viapa y thlyu aw vei. Sawla ta Izarei râh liata eina tluapa he a hnabeidy daihti tlô aw ta, chatanachata a ku tawhta ei boh ha aw,” tah ta.

² Dâvi cha thyu ta, a hnohta a ypa chyhsa za charu chhaota Maokâ sawchapawpa, Kâthâ bei Akisâ lâ sie ta.

³ Dâvi nata a chyhsazy cha ama chhôhkhazy chhaota Kâthâ khihpi liata Akisâ hnohta y ei ta. Dâvi lapinô pano, Zezari zuah Ahinô nata Nâbâ panôhmeipa Kâmel zuah Abikai chhao Dâvi hnohta cha liata y hra ei ta.

⁴ Kâthâ lâ Dâvi â râ hapa kyh Sawla ta a pahno nahta, tlua khao leipa ta.

⁵ Dâvi ta Akisâ hnohta, “Na mo ei dy khiahta cha, ei pahrâ nawpa su khitaw miakha eina pie awpa chi ta ei châ haw. Châ chakaotuhpa he khazia ma abei khihpi liata na hnohta ei y ngâ thlâh ha aw?” tah ta.

⁶ Cha noh ta, Akisâ ta Dâvi cha Zikalâ khih pie ta. Chavâta Zikalâ cha tanoh taihta Zudâh beizy eih a châ pâ haw.

⁷ Dâvi cha Philistinâ râh liata kô kha nata thla palih tlai y ta.

⁸ Dâvi nata a chyhsazy cha khy ei ta, Kesuri mo, Kirizi mo nata Amale mozy kaw chho ei ta. Âmo he hlâno tawhta he râh liata a vaw pahrâpa, Izi râh daih lâ Surâ taihta a pahrâpazy ama châ.

⁹ Dâvi ta râh cha a dyuh ta, chanô tlyma, chapaw tlyma, pakha chhao pahlôh leipa ta, mietakuzy, viahchaozy, alâzy, râraoseihpazy, chysiazy la ta, Akisâ lâ a lie ta.

¹⁰ Akisâ ta a hnohta, “Tanoh khataih lâ hrâ na sie?” tahpa ta a hiahri tita, Dâvi ta, “Zudâh chho lâ, Zerami chho lâ, Keni chho lâ,” tahpa zy ta a chhy tyh ta.

¹¹ “Eima thâtih reipa ta, ‘Cha hawh, kha hawhta Dâvi ta a tao’ tahpa ta, Kâthâ lâ thâtih ama tlôkhei pathlei aw,” tahpa a chipa vâta, Dâvi ta chanô tlyma, chapaw tlyma, pakha hmah pahlôh leipa ta a thie khai ha tyhpa ei a châ.

¹² Akisâ ta Dâvi cha ngâ kaw ta, “A chiheih Izarei sawzy ta amâ hao awpa ta anosasyh ta â tao ha hih. Chavâta nâ chakaotuhpa ta chhâzaw ta a y bâ aw,” tahpa ta pachâ ta.