1 SAMUELA 26 - Mara Bible RV (BSI)

Dâvi ta Sawla a pahlôh heih

¹ Zipha mo cha Kibia liata Sawla lâ a vy ei ta, a hnohta, “Dâvi cha Zesimô dady Hâkhilâ tlâh liata â nyu thlâh haw?” tah ei ta.

² Sawla cha thyu ta, Izarei pheisaih pha chaipa sâh thôh a chhipa ta, Dâvi tlua awpa ta Ziphi râhchawhpa lâ zu ta.

³ Sawla cha Zesimô dady ta a ypa Hâkhilâ tlâh lâpi kiah liata riehmo paryh ta. Dâvi deikua cha râhchawhpa liata y thlâh ha ta. Sawla cha ano tlua awpa ta râhchawhpa lâ â vy tahpa a pahno nahta,

⁴ Dâvi ta mohparutuhpazy tuah ta, Sawla cha â vy hmeiseih tlai tahpa pahno ta.

⁵ Dâvi cha thyu ta, Sawla riehmo lâ vawh ta. Sawla nata a pheisaih hyutuhpa Nerâ sawchapawpa Abane aziana kei hmô ta. Sawla cha riehmo liah liata a zia ta, pheisaihzy cha ano chadôpa ta riehmo tao ei ta.

⁶ Dâvi ta Hiti chyhsa Ahimele nata Zôabâ unawhpa Zeru sawchapawpa Abisai hnohta, “Ahy ma Sawla riehmo lâ nâ zu lâh aw?” tah ta. Abisai ta, “Kei ta ei cha zu lâh aw,” tah ta.

⁷ Dâvi nata Abisai cha pheisaihzy yna lâ zâ ta zu ei ta. Sawla cha riehmo chhôh liata a zia ta, â vaw mô thlâh hapa hmô ei ta. A asei cha a luh chô alei liata chalohsa ta. Abane nata pheisaihzy ta ano cha a zia chadô ei ta.

⁸ Abisai ta Dâvi hnohta. “Tanoh he Khazohpa ta na chariahpa na ku liata a cha pie haw. Asei ta alei nata a kei chô pâ ha tua tlai sah, ei kha a chô â daih aw, a chô chanei byuh aw vei,” tah ta.

⁹ Châhrasala Dâvi ta Abisai hnohta, “Pahleipadia khah y, Abeipa sathawthupa chô liata ku pathla ta, thai a châpa ahy ma a y beih?” tah ta.

¹⁰ Dâvi ta, “Abeipa hrona reipa ta ei reih, Abeipa ta a chô liata ku a pathla aw. Cha hawhta a châ leipa chhao ta, a thina noh vaw tlô thei ta, adyuhna lâ sie aw ta a leidia thei hra.

¹¹ Abeipa sathawthupa chô liata ku ei pathla awpa cha Abeipa ta pakhâ mawh sy. A luh chô liata asei nata titheih deikua hao kei la la, sie ha ei suh u,” tah ta.

¹² Chatanachata Dâvi cha Sawla luh chô liata asei nata titheih la ta, sie ha ei ta. Ahy hmahta a hmôpa nata a pahnopa y leipa ei ta, ahy hmahta a hrapa y veih ei. Abeipa ta mokuh pahâh ngaitapa ta a pamôsa hapa vâ ei ta, ama zydua ta amâ mô khai haw.

¹³ Chatawhcha Dâvi cha haosâ lâ kiah ta, lâhlapi liata a ypa tlâh laki liata a duah ta, ama likawh cha a hla kaw ta.

¹⁴ Dâvi ta pheisaihzy nata Nerâ sawchapawpa Abane cha awsao ta, ama hnohta, “Abane, nâ chhy aw va chi ma?” tah ta, Abane ta a chhy ta, “Abei a awsao ngâhpa cha ahy ma na châ tly?” tah ta.

¹⁵ Dâvi ta Abane hnohta, “Chapaw châ va chi ma? Nâ hawhpa he Izarei liata ahy ma a y? Kheihtazieta ma na zibeipa abei cha vaih leipa ta na y thlâh haw? Na zibeipa abei pahleipadia awpa ta chyhsa pakha â vy kha zaw.

¹⁶ Na hmotaopa kha a pha lei ngaita. Abeipa hrona reipa ta ei reih, Abeipa sathawthupa na zibeipa na vaih leipa vâta, a thi tlâh na châ. Abei luh chô liata asei nata titheih kha khataih liata ama y, vaw moh tua,” tah ta.

¹⁷ Sawla ta Dâvi ao a châpa pahno ta, a hnohta, “Cha cha nâma ao ma a châ, ei sawchapawpa Davi,” tah ta. Dâvi ta, “Hy abei y, ei zibeipa y, keima ao na a châ,” tah ta.

¹⁸ Dâvi ta, “Khâpa vâta ma ei zibeipa heta châ chakaotuhpa he â chadai tly? Khâpa hmo ma ei tao ha tly? Khâpa moleina ma ei ku liata a y tly?

¹⁹ Chavâta ei zibeipa abei y, châ chakaotuhpa biezy he tahmâ vaw nathlie tua mah y. Keima nâ dyuh awpa palôh châ pahneisapa he, Abeipa a châ khiahta cha, hmohlâpa a pyh sala, chyhsazy ama châ khiahta deikua cha, Abeipa hmiakô liata chhiesapa ta y mawh sy. ‘Sie la khazoh hropazy kei chakao teh,’ na tah ei ta, Abeipa ryu liata tovyuh ei hnei thei lei nawpa ta, tanoh eina papua ha ei hih.

²⁰ Chavâta ei thisaih cha Abeipa hmô leina alei liata tla khah sy. Chyhsa ta bykheihpa a byhpa ta, tlâh liata râh â khiepa hawhta ma, Izarei bei pi tlai ta ihlih miakha tluapa ta a vaw pua,” tah ta.

²¹ Sawla ta, “Ei vaw molei ha na. Vaw kua ha mah y, ei sawchapawpa Davi. Ei hrona he na mohmô liata tanoh sôh ngaita ta, chavâta kheihta hmahta cha tah khao aw va na. Moh teh, hru kawpa ta hmo vaw tao na ta, ei vaw tao chhei ngaita,” tah ta.

²² Dâvi ta a chhy ta, “Hy abei y, he he na asei a châ hih! Satlia pakha a vy sala, vaw la mawh sy.

²³ Abeipa cha chyhsa to ama siana nata ama ngâchhihna hawhta lymâ a pie tyhpa a châ. Tanoh he Abeipa ta nâma cha ei ku liata na pie ta, châhrasala Abeipa sathawthupa chô liata ku pathla awpa cha khoh va na.

²⁴ Pachâ teh, tanoh ei mohmô liata na hrona ei pasôpa hawhna heta, keima hrona chhao Abeipa mohmô ta pasôpa ta y sala, nôpona zydua tawh­ta na pachha mawh sy,” tah ta.

²⁵ Sawla ta Dâvi hnohta, “Ei sawchapawpa Dâvi y, vânoh topa ta y mah y! Hmo hluhpi tao aw chi ta, na hlao a tloh lymâ aw,” tah ta. Chatawhcha Dâvi cha ano lâpi lâ sie ta, Sawla chhao a yna su lâ a lie ha hra ta.