1 SAMUELA 25 - Mara Bible RV (BSI)

Samuela thina

¹ Samuela cha thi ta. Izarei zydua a hmaohpakhy ei ta, ano châta mâchhiesa ei ta, Râmâ liata a ohmo liata ama pabu haw. Dâvi cha thyu ta, Pârâ râhchawhpa lâ zu ta.

Dâvi nata Abikai

² Maô khihpi liata chyhsa pakha y ta, a raihriana khihpi deikua cha Kâmel a châ. Ano cha chyhsa hneirôh ngaitapa châ ta, mietaku 3,000 nata mie 1,000 a hnei.

³ Cha chyhsa moh cha Nâbâ châ ta, a lapinô moh cha Abikai a châ. Ano cha chanô so ngaitapa nata hmipha ngaitapa châ ta, a vahpa deikua cha nôchhiepa nata chyhsa moleipa a châ. Nâbâ he Kâlebâ pathla a châ.

⁴ Dâvi cha râhchawhpa liata a y nota, Nâbâ ta a mietaku hmi a ngyupa thâtih thei ta.

⁵ Dâvi ta satlia pahrawh tuah ta, satliazy hnohta, “Kâmel lâ khy u la, Nâbâ a kaw hmô u la, ei moh ta namâ kaw naoh aw.

⁶ Keima moh ta a hnohta, ‘Na chô liata thlalôhna y mawh sy! Na o liata thlalôhna y mawh sy! Na hneipa zydua chô liata thlalôhna y mawh sy!

⁷ Mietaku hmi ngyutuhpazy na hnei tahpa ei vaw thei. Na mietaku vaituhpazy eima hnohta y ei ta, kheihta hmahta tah beih leipa pi ta, Kâmel liata ama y chhôh zydua khâpa hmo hmahta pahlei veih ei.

⁸ Na satliazy hiahri la, ama cha chho aw. Chavâta satliazy he vaw ngiachhie mah y. Kyhchhi daihti liata nâ lâ a vypa eima châ hih. Ngiachhiepa ta, châ chakaotuhpazy nata na sawchapawpa Dâvi he, na hnei rypaohpa maih vaw pie mah y,’ tahpa ta nama kaw chho aw,” tah ta.

⁹ Dâvi satliazy cha Nâbâ kô kei tlô ei ta. Bie zydua cha Dâvi moh ta ama chho khai nahta, a chalihpa ta â chhyna hâ ei ta.

¹⁰ Nâbâ ta Dâvi chakaotuhpazy cha a chhy ta, “Dâvi cha ahy ma a châ tly? Zese saw­chapawpa cha ahy ma a châ tly? Tahmâno he sei hluhpi ta ama zibeipazy amâ râsai ngâ kaw.

¹¹ Ei viahchhâ, ei ti nata ei mietaku hmi ngyutuhpazy châta sa ei thiepazy cha, khataih tawhta a vypa chyhsa ma ama châ tahpa chhao ei pahno leipazy hnohta zua ei pie aw ma?” tah ta.

¹² Dâvi satliazy cha kua ei ta, ama yna lâ a lie ei ta, cha bie zydua cha Dâvi chho ei ta.

¹³ Dâvi ta a chyhsazy hnohta, “Chyhsa zydua nama zaozi a pataih khai teh u,” tah ta. Ama zaozi a pataih chyu ei ta, Dâvi chhao a zaozi a pataih hra ta. Chyhsa za palih ta Dâvi cha zi ei ta, hmozy vaih awpa ta chyhsa za no riehmo liata y ei ta.

¹⁴ Satlia pakha ta Nâbâ lapinô Abikai hnohta “Pachâ teh, Dâvi ta râhchawhpa tawhta eima zibeipa a naoh awpa ta chyhsa vaw tuah ta, châhrasala reikah chhiepa ta âmo cha â chhy ha ei.

¹⁵ Chatanachôta chyhsazy cha eima chô liata pha kaw ei ta, kheihta hmahta miah tah veih ei. Lyurâhpa liata hmaohkha ta eima y chhôh zydua khâpa hmah pahlei ma pi.

¹⁶ Mietakuzy vaih pi ta, ama hnohta eima y chhôh zydua ta, chhô nah zâ ta eima châta thokhy ama châ lymâ tyh.

¹⁷ Chavâta he hmo he tahmâ pahno la, khâpa na tao aw, pakhâta ta pachâ mah y. Eima zibeipa chô liata nata a o liata a ypa zydua chô liata chhiena a vaw tlô ha bâ hih. Eima zibeipa hra he, chyhsa chhiepa, ahy hmahta bie amâ chho thei leipa chyhsa châ tlôh ta,” tah ta.

¹⁸ Abikai cha a para kawpa ta viahchhâ tlâ za no, kresawhti ôh no, thlai chho thei awpa ta tao chiehpa mietaku pô pangawh, sâh pakâhpa saikhua hmo pangawh, kre thei pachawhpa sao za kha, theiku viahchhâ pakâhpa tlâ za no zy la ta, alâ paphaosa ta.

¹⁹ A chakaotuhpa satliazy hnohta, “Ei hmia lâta sie aw ei chi ta, ei cha vaw pazi aw ei,” tah ta. A vahpa Nâbâ deikua cha chho vei.

²⁰ Abikai cha alâ kiah ta, tlâh nohdi liata a sie ngâ nota, moh teh u, Dâvi nata a chyhsazy cha a zu ei ta, ano yna lâ vaw pangai ei ta, âmo cha a tyh ta.

²¹ Dâvi ta, “He chyhsa he, a hneipa zydua miakha hmah a lei lei nawpa ta, a hneipa zydua râhchawhpa liata vaipa tyh na ta, hraoleipa deita a vaw châ he. Hmo phapa cha, hmo chhiepa ta viari eina thô he!

²² Mylâ my khih a pavâ tita, a hneipa zydua liata chapaw pakha chhao ei pahlôh khiahta cha, Khazohpa ta Dâvi chô liata tao sala, cha hlâta pasa viapa chhao ta tao mawh sy,” tah ta.

²³ Abikai ta Dâvi a hmô nahta, alâ tawhta chô para ta, Dâvi hmiakô liata a hmia alei lâ a khupa ta pao ta, a naoh ta.

²⁴ A phei thaby liata â khu lâta pao ta, a hnohta, “Ei zibeipa y, keima ta, keima tlai ta thaileichâna cha ei to aw. Na seichanô he na nah theina liata bie rei awpa ta rie pasaih la, châ chakaotuhnô biezy he ngiachhiepa ta nathlie mah y.

²⁵ Ei zibeipa heta chyhsa chhiepa Nâbâ he pachâ hlei khah sy. A moh hawh tlai heta na a châ. Nâbâ moh a phaopa hawh tlai ta a hru ha hih. Kei, châ chakaotuhnô heta ei zibeipa satlia vaw tuapazy kha vaw hmô va na.

²⁶ Chavâta ei zibeipa y, tahmâ Abeipa hrona nata nâma hrona reipa ta ei reih. Abeipa ta thisaih palo awpa tawhta nata na chariahpazy chô liata nâma ku ta phuh la awpa tawhta cha pakhâ ha ta, chavâta na chariahpazy nata na chô liata hmo pha leipa tao a chhuahpazy cha Nâbâ hawhta châ mawh ei sy.

²⁷ Tahmâ châ chakaotuhnô ta ei zibeipa châta hmosaipa ei vaw cheipa he, ei zibeipa a vaw zipa satliazy he pie awpa ta rie paryhsa mah y.

²⁸ Châ chakaotuhnô paraona cha rie a ngiahthai mah y. Ei zibeipa he Abeipa adyuhnazy châta a dyuhpa na châpa vâta, Abeipa ta ei zibeipa he chipathla a ipa a paduapa tlai aw. Na hro chhôh zydua ta nâma liata moleina rai hmôpa châ aw vei.

²⁹ Nâma a chadai awpa nata na hrona pahlei awpa ta chyhsazy vaw thyu hra ei sala, ei zibeipa hrona cha, Abeipa na Khazohpa mohôhna ry liata, a hrohpazy hry liata pahlaopa châ aw ta, na chariahpazy hrona deikua cha, cheisiah ta siapa hawhta Abeipa ta âmo cha siah aw ta, ama leidia aw.

³⁰ Chatanachata Abeipa ta nâma kyh liata hmo phapa â taihpa zydua hawhta ei zibeipa chô liata taopa ta, Izarei bei ta a cha padua tita,

³¹ a chhâpa y leipa ta thisaih palopa vâta tlyma, phuh lapa vâta tlyma, pachârôhna nata palôh tymâna ei zibeipa liata y aw vei. Abeipa ta ei zibeipa chô liata a phapa ta a tao tita, châ chakaotuhnô he rie a thei mah y,” tah ta.

³² Dâvi ta Abikai hnohta, “Tanoh na vaw dy awpa ta châ vaw tuahtuhpa Abeipa, Izarei Khazohpa cha reithaipa ta y mawh sy!

³³ Hmo na pahno thaina he thlaochhina châ sala, thisaih palopa thaileichâna tawhta nata keima ku ta phuh la awpa tawhta nâ pabohsatuhpa nâma chhao vânoh topa ta y mah y!

³⁴ Abeipa, Izarei Khazohpa, nâma cha pasasa awpa tawhta nâ pakhâ hapa hrona reipa ta ei reih. Na vaw dy para leipa vaw châ la cha, mylâ khih a pavâ nahta, Nâbâ hnohta a ypa chapaw pakha hmahta y khao aw veih ei,” tah ta.

³⁵ Dâvi ta Abikai vaw cheipa hmozy cha a ku tawhta a hlâh ta, a hnohta, “Thlalôhpa ta na o lâ a di mah y. Na ao thei na ta, na hiapa hlao ei cha patloh haw,” tah ta.

³⁶ Chatawhcha Abikai cha Nâbâ lâ vawh ta, moh tua u, Nâbâ cha a o liata kyhchhi vaw tao ta, abei kyhchhipa hawhta kyh vaw chhih ta. Nâbâ cha a pari hapa vâta a ly kawpa ta vaw y ta. Chavâta a mylâ khih pavâ hlâlei cha, Abikai ta khâpa hmah chho leipa ta.

³⁷ Mydi ta, Nâbâ cha Kresawhti a paripa a pai nahta, a lapinô ta hmo yziezy chho ta, a châh-ao a chalihpa ta, alô hawhta vaw y ha ta.

³⁸ Noh hrawh khai tawhta, Abeipa ta Nâbâ chô liata a ku pathla ta, thi ha ta.

³⁹ Dâvi ta Nâbâ a thi haw tahpa a thei nahta, “Nâbâ ku liata pasipasawh ei tyhpa viari nâ thôpatuhpa nata ano a chakaotuhpa heta hmo pha leipa ei tao ha awpa tawhta nâ pakhâpa Abeipa cha reithaipa ta y mawh sy. Nâbâ molei paraona cha Abeipa ta ano luh chô liata a patlasa haw,” tah ta. Chatawhcha Dâvi ta a chakaotuhpazy tuah ta, Abikai cha a lapinô châta za pahiasa ta.

⁴⁰ Dâvi chakaotuhpazy cha Kâmel liata Abikai kô ama kei tlô nahta, a hnohta, “Dâvi ta a lapinô châta châ chhi awpa ta nâma lâ miah a za tuah,” tah ei ta.

⁴¹ Abikai cha thyu ta, a hmia alei lâ a khupa ta âmo cha a naoh ta, ama hnohta, “Châ chakaotuhnô he, ei zibeipa chakaotuhpazy phei a pasi awpa chakaotuhpa ei châ,” tah ta.

⁴² Abikai cha thlai thyu ta, alâ kiah ta, laihsa papangawh ta ano cha zi ei ta. Dâvi chyhsa tuapazy hnohta sie ta, a lapinô ta y ha ta.

⁴³ Dâvi cha Zezari zuah Ahinô vaw hnei ha ta, chavâta ama pano ta lapinô ta a hnei ei.

⁴⁴ Dâvi lapinô Mikâli, Sawla sawchanô deikua cha, Sawla ta Kâli khihpa Laisâh sawchapawpa Pâti a pie haw.