1 SAMUELA 24 - Mara Bible RV (BSI)

Dâvi ta Sawla a pahlôh

¹ Sawla cha Philistinâ mo â chadaina tawhta a vaw kua nahta, “Dâvi cha Enkedi râhchawhpa liata a y,” tahpa ta Sawla cha chho ei ta.

² Sawla ta Izarei pheisaih pha chaipazy sâh thôh a chhi ta, Dâvi nata a chyhsazy cha Sathawh Lôkâhpa dady liata tlua awpa ta sie ei ta.

³ Lâpi kiapâh liata mietaku sadô kei tlô ta, cha liata lôpu y ta, Sawla cha lyupâh pua awpa ta a kei ngia ta. Dâvi nata a chyhsazy cha lôpu chhôh chaipa liata a tyuh thlâh ha ei ta.

⁴ Dâvi chyhsazy ta a hnohta, “Moh teh, tanoh he Abeipa ta na hnohta, ‘Na chariahpa cha na ku liata cha pie aw na ta, pha na tahpa hawhta a chô liata na tao aw,’ a tahpa noh kha a châ hih,” tah ei ta. Dâvi cha thyu ta, arulâta Sawla poh pai cha â ta.

⁵ Taviapa ta Dâvi cha Sawla poh pai a kei âpa vâta a chhôh khai kaw ta.

⁶ A chyhsazy hnohta, “Ei zibeipa, Abeipa sathawthupa chô liata, he hmo ei taopa he pha vei. Abeipa sathawthupa a châ tahpa ei pahno thlâh hapa tlai ta, a chô liata ei ku ei pathla thlâh hapa he Abeipa ta khoh vei,” tah ta.

⁷ Cha biezy cha hmâpa ta Dâvi ta a chyhsazy cha pakhâ ta, Sawla chô liata ku pathla awpa ta ama thyu awpa pasaih khao vei. Chatawhcha Sawla cha thyu ta, lôpu cha puasai ta, a sie nawpa lâ sie ha ta.

⁸ A hnôh lâta Dâvi chhao cha thyu ta, lôpu tawhta pua ta, “Abei y, ei zibeipa y!” tahpa ta Sawla cha awsao ta. Sawla cha a hnôh lâ a kei heih ta, Dâvi cha a hmia alei lâ a khupa Sawla cha a naoh ta.

⁹ Dâvi ta Sawla hnohta, “Khazia ma, ‘Dâvi ta na chhiena a tlua,’ châ tahpa chyhsazy bie reipa cha na zo thlâh tly?

¹⁰ Pachâ teh, tanoh lôpu liata Abeipa ta nâ cha ei ku liata na hlâ ta, cha cha na mo tlai ta tanoh na hmô haw. Thokha ta cha thie awpa ta na chho ei ta, châhrasala cha pahro na ta, ‘Ei zibeipa chô liata ei ku rai hy aw va na, Abeipa sathawthupa a châ hih,’ tahpa ta ei chho ei.

¹¹ Ei pâ, moh tua, vaw moh tua rai, na poh pai chhao ei chaba thlâh ha hih. Na poh pai ei tai thei thlâh hapa ta, nâma ei cha thie leipa kha, ei ku liata paraona nata abei adyuhna rai y vei tahpa na hmô awpa nata na pahno awpa ei khopa vâta a châ. Ei hrona la a chhuahpa ta na tlua ngâ hra la, na chô liata molei va na.

¹² Abeipa ta nâma nata keima likah pachia sala, Abeipa ta na chô liata ei phuh tlao la mawh sy. Kei ta la, na chô liata ei ku pathla cheita aw va na.

¹³ Hlâno bieso ta, ‘Moleipa tawhta moleina a pua tyh,’ a tahpa hawhta, kei ta la, na chô liata ei ku pathla beih aw va na.

¹⁴ Izarei bei pi tlai ta ahy ma a vaw puahnao tly? Ahy ma na chadai tly? I thipa ma nâ chadai? Ihlih ma nâ chadai!

¹⁵ Chavâta Abeipa ta nâma nata keima likah pachia sala, bietluna tao mawh sy. Hmo yzie moh sala, ei chhâh a châ sala, na ku tawhta na pachha mawh sy,” tah ta.

¹⁶ Cha biezy cha Dâvi ta Sawla hnohta a rei khai nahta, Sawla ta, “Cha cha nâma ao ma a châ, ei sawchapawpa Davi?” tah ta. Sawla cha aoh tlili ta cha ta.

¹⁷ Dâvi hnohta, “Keima hlâta na sia via syulyu na, nâ cha ei chô liata hmo phapa tao chi ta, kei deikua cha, hmo chhiepa ta viari ei cha thô.

¹⁸ Abeipa ta na ku liata eina so hapa chhao ta, na thie leipa chi ta, ei chô liata na pha ngaitanazie tanoh na palâsa haw.

¹⁹ Chyhsa ta a chariahpa hmô sala, â bohpa ta a pasiesa aw ma? Tanoh ta ei chô liata na hmotaopa vâna heta, Abeipa ta hmo phapa ta cha thô maw sy.

²⁰ Pachâ teh, abei châ tlai aw chi ta, Izarei khinarâh cha nâma ku liata paduapa a châ aw tahpa tahmâ ei pahno haw.

²¹ Chavâta ei pathla vaw y lymâ awpazy cha chhawh pathlah leipa aw chi ta, ei paw pathlazy tawhta ei moh he pahleipadia aw va chi tahpa Abeipa moh ta tahmâ bie nâ taih mah y,” tah ta.

²² Dâvi ta Sawla cha bie a taih ta. Chatawhcha Sawla cha o lâ sie ta, Dâvi nata a chyhsazy deikua cha thokhy lâ khy ha ei ta.