1 SAMUELA 23 - Mara Bible RV (BSI)

Dâvi ta Keilâh khihpi a pachha

¹ Chyhsazy ta Dâvi hnohta, “Philistinâ mo ta Keilâh khihpi a dyuh ei ta, sawhri liata sâhzy ama lapa khai haw,” tahpa chho ei ta.

² Dâvi cha Abeipa a saohiah ta, “Philistinâ mo cha a dyuh awpa ta ei sie aw ma?” tah ta. Abeipa ta Dâvi hnohta, “Sie la, Philistinâ mo cha a zâ dyu la, Keilâh khih za pachha teh,” tah ta.

³ Châhrasala Dâvi chyhsazy ta a hnohta, “Pachâ teh, Zudâh râh liata eima y thlâh hapa chhao heta chi pi ta, Keilâh lâ zu ta, Philistinâ pheisaihzy a za dyuh awpa cha, khatlu ta ma chi â chhih via vâ tly?” tah ei ta.

⁴ Dâvi ta Abeipa a saohiah heih ta, Abeipa ta a chhy ta, a hnohta, “Thyu la, Keilâh lâ cha zu teh, Philistinâ mo cha na ku liata ei cha pie aw,” tah ta.

⁵ Chatawhcha Dâvi nata a chyhsazy cha Keilâh lâ zu ei ta, Philistinâ mo cha a zâ dyuh ei ta, ama sahrohzy a kaw chhi ta, Philistinâ mo cha thata ama thie. Cha hawhna chata Dâvi ta Keilâh khihsawzy cha a pachha ha ei.

⁶ Ahimele sawchapawpa Abiathâ ta Keilâh khih liata Dâvi lâta â râ no kha, ephaw a phaopa ta zu ta.

⁷ Dâvi cha Keilâh lâ a sie tahpa Sawla chho ei ta. Sawla ta, “Khazohpa ta ei ku liata eina pie ha chu. Chhikao nata ahraina a hneipa thokhy khih liata a ngia ta, cha liata â khawhlôh ha chu,” tah ta.

⁸ Sawla cha adyuhna lâ sie awpa ta pheisaih zydua awpakhy ta. Dâvi nata a chyhsazy za dôhpa ta, Keilâh khih cha zâ dyuh awpa a chhuah ta.

⁹ Sawla ta a chô liata hmo pha leipa tao â chhuahpa cha Dâvi ta pahno ta, theihthaipa Abiathâ hnohta, “Ephaw kha vaw cheih teh,” tah ta.

¹⁰ Dâvi ta, “Hy Abeipa, Izarei Khazohpa y, Sawla cha Keilâh lâ a zupa ta, keima vâta khihpi he parao â chhuahpa kyh châ chakaotuhpa heta ei thei pasia.

¹¹ Keilâh khihsawzy heta a ku liata eina hlâ aw ei ma? Châ chakaotuhpa ta ei theipa hawhna chata, Sawla cha â zu tlai aw ma? Hy Abeipa, Izarei Khazohpa y, ngiachhiepa ta châ chakaotuhpa he chho mah y,” tah ta. Abeipa ta, “Â zu aw,” tah ta.

¹² Dâvi ta, “Keilâ khihsawzy ta kei nata ei chyhsazy he Sawla ku liata miah ama hlâ aw ma?” tah ta. Abeipa ta, “Ama cha hlâ aw,” tah ta.

¹³ Dâvi nata a chyhsazy za charu rachhôhpazy cha thyu ei ta, Keilâh tawhta pua ei ta, siena rypaohpa lâ maih sie ei ta. Dâvi cha Keilâh tawhta â râ haw tahpa Sawla chho ei ta, chavâta hrâsie â chhuahpa cha pathleih ha ta.

¹⁴ Dâvi cha Ziphi râhchawhpa tlâh râh liata thokhy ta dôhpa khihpizy liata y ta. Sawla ta ano cha noh chareih ta tlua ta, châhrasala Khazohpa ta Dâvi cha a ku liata pie leipa ta.

Sawla ta Dâvi â chadai

¹⁵ Dâvi ta a hrona la awpa ta Sawla a vaw puapa cha hmô ta. Dâvi cha Ziphi râhchawhpa Hôresâ liata y ta.

¹⁶ Sawla sawchapawpa Zawnathâ cha thyu ta, Hôresâ liata Dâvi yna lâ sie ta, Zawnathâ ta Dâvi cha Khazohpa liata a ku thapatlô ta.

¹⁷ A hnohta, “Chi khah y, ei paw Sawla ku ta cha hmô aw vei. Izarei bei vaw châ aw chi ta, kei cha nâma châ pazipa ei châ aw. Ei paw Sawla chhao ta, cha cha a pahno,” tah ta.

¹⁸ Ama pano ta Abeipa hmiakô liata bie hraih ei ta. Dâvi cha Hôresâ liata a ngua ta, Zawnathâ cha o lâ sie ha ta.

¹⁹ Zipha mo ta Kibia liata a ypa Sawla lâ khy ei ta, a hnohta, “Dâvi cha Zesimô chho lâ, Hâkhilâ tlâh, Hôresâ thokhy liata eima hnohta â nyu thlâh haw.

²⁰ Chavâta Hy abei y, a zu la, na palôh khopa zydua hawh tlai khata a zu mah y. Keimo eima vaw tao hra awpa cha, abei ku liata Dâvi eima cha hlâ awpa cha a châ,” tah ei ta.

²¹ Sawla ta, “Abeipa ta byhnâ cha pie mawh ei sy. Nâmo la eina ngiachhie ngaita ei chi na.

²² Sie u la, kei pasia via heih tua teh u. A hniehnôh chathô u la, ahy ma Dâvi cha cha liata a hmô tahpa kei pasia via heih tua teh u. Ano cha so piehpie ngaitapa a châ tahpa chyhsazy ta eina chho ei.

²³ Chavâta chyhsa â nyukhâhna su zydua pahno a chhuah u la, keima lâ a vy heih u la, bie siapa na vaw chho aw ei chi ta, nama hnohta ei vaw sie hra aw. He râh liata a y tlai khiahta cha, Zudâh chyhsa sâh hluhpi hry tawhta tluapapua aw na ta, ei hmô thlyu aw,” tah ta.

²⁴ Ziphi mo cha thyu ei ta, Sawla hmia lâta Zipha lâ cha a lie ei ta. Dâvi nata a chyhsazy cha Zesimô chho lâ, Arabâ liata Maô râhchawhpa liata y ei ta.

²⁵ Sawla nata a chyhsazy cha ano tlua awpa ta sie ei ta. Cha kyh cha Dâvi chho ei ta. Dâvi cha lôkâhpa lâ zu ta, Maô râhchawhpa liata za y ta. Cha cha Sawla ta a thei nahta, Dâvi cha Maô râhchawhpa liana cha a chadai lymâ ta.

²⁶ Sawla cha tlâh hiakha lâ chhâh ta sie ta, Dâvi nata a chyhsazy cha tlâh hiakha lâ chhâh ta sie ei ta. Dâvi cha Sawla riah chipa ta a para ngaitapa ta a râ ta. Sawla nata a chyhsazy cha Dâvi nata a chyhsazy patu a chhuahpa ta a vaw hnia via lymâ ei ta.

²⁷ Cha nota, zikyu a râpa vaw tlô ta, Sawla hnohta, “A chatliepa ta a vy teh, Philistinâ mo ta râh ama vaw chho,” tah ta.

²⁸ Chavâta Sawla cha Dâvi â chadaipa cha kuasai ta, Philistinâ mo a dyuh awpa ta sie ha ta. Chavâta cha su cha Abohna Lôkâhpa tahpa ta bipa a châ.

²⁹ Cha su tawhta Dâvi cha khy ta, Enkedi thokhy khihpi liata pahrâ ta.