1 SAMUELA 22 - Mara Bible RV (BSI)

Dâvi Adulâ lôpu liata â nyu

¹ Dâvi cha Kâthâ tawhta pua ta, Adulâ lôpu lâ a râ ta. Cha kyh cha a unawhzy nata a paw chhôhkha zydua ta ama thei nahta, a yna lâ cha zu ei ta.

² Nôpona a hneipa, leibâh a hneipa nata palôh pasana a hneipa maihta ano liata a hmaohpakhy ei ta, ama hyutuhpa ta y ta. A hnohta chyhsa 400 tlai ama y.

³ Dâvi cha cha tawhta Môabâ râh liata Mizpâ lâ sie ta. Môabâ bei hnohta, “Khazohpa ta hmo eina taopa awpa ei pahno hlâlei cha, ei nô nata ei paw he na hnohta rie paysa chy mah y,” tah ta.

⁴ Dâvi ta a nô nata a paw cha Môabâ bei lâ a chhi ta, thokhy chhôh liata Dâvi a y chhôh zydua cha Môabâ bei hnohta y ei ta.

⁵ Chatawhcha hrohsopa Kâdâ ta Dâvi hnohta, “Thokhy chhôh liata y ngâ thlâh ha leipa la, pua la, Zudâh râh lâ sie teh,” tah ta. Dâvi cha pua ta, Heretâ râhmâhpa liata a ngia ta.

Sawla ta Nôbâ theihthaipazy a thie

⁶ Sawla ta Dâvi nata a hnohta a ypazy yna cha ama pahno haw tahpa thei ta. Sawla cha a asei chabapa ta Kibia khih tamâri tho ry liata a tyuh ta. A chakaotuhpa zydua a kiapâh liata a duah ei ta.

⁷ Sawla ta a kiapâh liata â duahpa a chakaotuhpazy hnohta, “Nâmo Benzami mozy saih u, nathlie teh u. Zese sawchapawpa heta nama zydua ta lyuzy nata kre sadôzy a cha pie aw ei ma, a pheisaih sâh kha hyutuhpa ta zy nata za kha hyutuhpa zy ta a cha tao khai aw ei ma?

⁸ Khazia nama zydua ta eina tei ei chi? Ei sawchapawpa ta Zese sawchapawpa hnohta biehrai a taopa ahy hmahta na chho tlâ veih ei chi. Pachâ nâ rôhkheipa rai y veih ei chi. Nâ chakaotuhpa heta keima nâ dyuhpa ta, tanoh hawhna heta nâ byh awpa ta, ei sawchapawpa ta a pasyupa kyh chhao, nâ chhopa y tlâ veih ei chi,” tah ta.

⁹ Sawla chakaotuhpazy kiapâh liata a duahpa Edômâ chyhsa Dôe ta a chhy ta, “Zese sawchapawpa Nôbâ khih liata Ahitu sawchapawpa Ahimele lâ â vypa ei hmô.

¹⁰ Ano châta Ahimele ta Abeipa a saohiahpa ta, niedozy pie ta, Philistinâ chyhsa Kôliathâ zaozi kha a pie,” tah ta.

¹¹ Abei chata chyhsa tuah ta, Ahitu sawchapawpa theihthaipa Ahimele nata Nôbâ khih liata theihthaipa a ypa a paw chhôhkha zydua paawsa ta. Ama zydua ta abei lâ a vy ei ta.

¹² Sawla ta, “Nâ Ahitu sawchapawpa, nathlie teh,” tah ta. Ano ta, “Ei zibeipa, he liata ei y,” tah ta.

¹³ Sawla ta a hnohta, “Khazia nâ nata Zese sawchapawpa heta eina tei ei chi? Viahchhâ nata zaozi zy vaw pie chi ta, Abeipa nâ vaw saohiahpa bao! Chavâta tanoh ta a taopa hawhna tlai heta nâ dyuh ta, einâ byhpa a châ hih,” tah ta.

¹⁴ Ahimele ta abei cha a chhy ta, “Châ chakaotuhpa zydua hry liata, abei piahpa Dâvi hawhta ngâchhihpa chyhsa he ahy ma a y? Ano cha na pheisaih hyutuhpa châ ta, na o liata chyhsazy ta ama za ngaitapa châ vei ma?

¹⁵ Tanoh he ma ano châta Khazohpa ei saohiah tua noh a châ? Châ bao va! Abei ta a chakaotuhpa tlyma, ei paw chhôhkha zydua tlyma, bai cheita khah sy. Châ chakaotuhpa heta he kyh zydua he, a hluhpi tlyma, a chyhta tlyma, ei pahnopa y vei,” tah ta.

¹⁶ Abei ta, “Ahimele, na thi tlai awpa a châ, nâ nata na paw chhôhkha zydua nama thi awpa a châ,” tah ta.

¹⁷ Abei ta a kiapâh liata a duahpa pheisaihzy hnohta, “A vaw palie u la, Abeipa theihthaipazy he thie teh u, âmo chhao he Dâvi chhâh a châhpa ama châ hih. A râpa a châ tahpa ama pahno thlâh hapa ta na chho veih ei,” tah ta. Châhrasala abei chakaotuhpazy ta Abeipa theihthaipazy thie awpa ta ama ku hy khoh leipa ei ta.

¹⁸ Abei ta Dôe hnohta, “A vaw palie la, theihthaipazy he thie teh,” tah ta. Edômâ chyhsa Dôe cha a vaw palie ta, theihthaipazy cha thie ta. Cha noh ta, Edômâ chyhsa Dôe ta pala rih dipa ephaw a kypa theihthaipa sycharie nata papangawh a thie ei.

¹⁹ Chatawhcha Sawla ta theihthaipazy yna Nôbâ khihpi cha zaozi ta a dyuh ta, chanô nata chapaw, hawti nata sâhpi a ngiehpa, viahchao, alâ nata mietaku zy chhao zaozi ta a chhawhsao khai ha ei.

²⁰ Ahitu sawchapawpa Ahimele sawchapawzy hry liata pakha, a moh Abiathâ deikua cha a râ papua ta, Dâvi â kei pahlyh haw.

²¹ Sawla ta Abeipa theihthaipazy a thie khai hapa kyh cha Abiathâ ta Dâvi chho ta.

²² Dâvi ta Abiathâ hnohta, “Kha noh kha, a su liata Edômâ chyhsa Dôe kha y ta, Sawla a chho thlyu aw tahpa ei pangiasapa rai na a châ. Na paw chhôhkha manôh zydua keima vâta a thipa ama châ.

²³ Ei hnohta y ha mah y. Chi khah y, keima thie nâ chhuahpa heta nâ chhao thie a châ chhuah hra. Keima hnohta la â bohpa ta na y aw,” tah ta.