1 SAMUELA 21 - Mara Bible RV (BSI)

Dâvi nata viahchhâ pathaihpa

¹ Dâvi cha Nôbâ khih liata theihthaipa Ahimele yna kei tlô ta. Ahimele cha a chalyuna chôta Dâvi vaw dy ta, a hnohta, “Khazia nâma dei ta dua, sielâhpa pakha hmah hnei chi va?” tah ta.

² Dâvi ta theihthaipa Ahimele hnohta, “Abei ta hmo na pataosa ta, ei hnohta, ‘Hmo ei cha pataosapa nata bie ei cha piepa zy he ahy hmahta pahno khah ei sy,’ khâchâ tah ha ta. Su raopazy liata a tyh awpa ta satliazy ei chho ha ei.

³ Nie awpa khâpa ma na hnei? Viahchhâ tlâh pangawh na pie teh, a y vei khiah, a ypa maih na pie teh,” tah ta.

⁴ Theihthaipa ta Dâvi cha a chhy ta, “Viahchhâ thlâhthlipa hnei va na, viahchhâ pathaihpa deita ei hnei. Satliazy cha chanô liata ama pathaih khiahta cha, nama nie thei aw,” tah ta.

⁵ Dâvi ta theihthaipa cha a chhy ta, a hnohta, “Adyuhna lâ ei sie nota ei tao tyhpa hawhta, chanô liata eima pathaih tahpa â ipa ta ei rei ngâh. Khitlyna peimawh hropa ta khi eima tly nota chhao, satliazy hmobaoh cha pathaisa khai hapa a châ tyh. Tanoh hawhpa liata chhochhi cha, ama hmobaoh a pathaih via pachai mâh tâh” tah ta.

⁶ Theihthaipa ta viahchhâ pathaihpa cha Dâvi pie ta. Ypâna viahchhâ Abeipa lâta hlâpa la pakhua noh ta viahchhâ lalôhpa ta ri tyhpa châ ta, cha noh liata deikua cha, Abeipa hmiakô tawhta lapa viahchhâ pathaihpa dei leipa ta viahchhâ hropa a y leipa vâta a châ.

⁷ Cha noh ta, cha liata Sawla chakaotuhpa hry liata chyhsa pakha cha Abeipa hmiakô liata patupa châ ta. A moh Dôe châ ta, ano cha Edômâ chyhsa, Sawla sahroh vaituhpazy hyutuhpa a châ.

⁸ Dâvi ta Ahimele hnohta, “Asei tlyma, zaozi tlyma, he liata nâ sopa a y ma? Abei rai hria awpa â para ngaitapa vâta, ei zaozi nata ei chaihrai khâpa hmah a vaw chei hmâ va na,” tah ta.

⁹ Theihthaipa ta, “Philistinâ chyhsa Kôliathâ, Elâ saikao liata na thiepa, kha chyhsa zaozi kha, moh teh, poh ta pahlypa ta, ephaw yna khôta liana hao ta a y thlâh ha. Nâ la khoh khiahta cha, a kei la teh. Cha leipa cha a hropa y vei,” tah ta. Dâvi ta, “Cha hleikhô cha! Na vaw pie teh,” tah ta.

Kâthâ lâ Dâvi â râ

¹⁰ Dâvi cha thyu ta, cha noh ta Sawla riahchipa ta a râ ta, Kâthâ bei Akisâ lâ sie ta.

¹¹ Akisâ chakaotuhpazy ta a hnohta, “He chyhsa he, ama râh bei Dâvi kha châ vei ma? ‘Sawla ta a sâh sâh ta thie ta, Dâvi ta a thy thy ta a thie,’ tahpa ta, lâna chôta a thâtih hla ta amâ palie ngâpa kha châ vei ma?” tah ei ta.

¹² Cha biezy cha Dâvi ta a palôh liata paveih thlâh ha ta, chavâta Kâthâ bei Akisâ cha chi ngaita ta.

¹³ Ama hmiakô liata a yzie panano ta, ama ku liata a pahrusa ta, thokhy chhikaozy chaphy ta, a kâhhmi liata a pachih pathlaoh ta.

¹⁴ Akisâ ta a chakaotuhpazy hnohta, “Mo tua u, ahrupa a châpa pahno thlâh ha ei chi ta, khazia kei lâ namâ vaw chhi?

¹⁵ Ahrupa ei phahlapa vâta ma he chyhsa he a hruzie palâsa awpa ta ei hmiakô liata namâ vaw chhi? He hawhpa chyhsa he ei o liata â vaw ngia aw ma?” tah ta.