1 SAMUELA 20 - Mara Bible RV (BSI)

Dâvi nata Zawnathâ

¹ Dâvi cha Râmâ liata Naiô khihpi tawhta a râ ta, Zawnathâ yna lâ pangai ta, a hnohta, “Khâpa ma ei tao ha tly? Khâpa ma ei thaileina tly? Na paw hmiakô liata khâpa moleina tao ha na ta ma, ei hrona he la awpa ta he hawhta eina tei ngâ thlâh ha tly?” tah ta.

² Zawnathâ ta a hnohta, “Châ bao vâ! Thi cheita aw va chi. Moh teh, ei paw heta keima na pahnosa ha tua leipa ta khâpa hmahta, a laipa tlyma, a chyhpa tlyma, tao beih vei. Khazia ei paw ta he hmo he eina phih aw? Na phi cheita aw vei,” tah ta.

³ Dâvi ta bie a taih heih ta, Zawnathâ hnohta, “Eina ngiachhiezie chi he na paw ta pahnopasia ta, chavâta, ‘He hmo he la Zawnathâ ta pahno khah sy, chataleipatala a pachâ a rôh kaw aw na,’ a tahpa vâta a châ aw. Abeipa hrona nata nâma hrona reipa ta ei reih, hmeiseihta ta la, keima nata thina likawh he keih kha deita â hla bâ,” tah ta.

⁴ Zawnathâ ta Dâvi hnohta, “Na reipa maih ei cha taopa aw,” tah ta.

⁵ Dâvi ta Zawna­tha hnohta, “Pachâ teh, mylâ khi thla thiehpa noh châ ta, abei hnohta pati ei dôh nawpa noh a châ. Hânoh zâlâ taihta lyurâhpa liata a nyu awpa ta na pasiesa chy teh.

⁶ Na paw ta ei y leipa a pahno khiahta cha, a hnohta, ‘Davi cha a khih Bethlehe lâ sie awpa ta eina hiah, cha liata ama chhôhkha zydua châta kô chareih ta atheihna hlâ tyhpa tao awpa a châpa vâta,’ na tah aw.

⁷ ‘A pha na!’ a tah khiahta cha, châ chakaotuhpa he thlalôhpa ta y aw na ta, a hie a hâh khiahta deikua cha, hmo pha leipa tao â chhuah tahpa pahno mah y.

⁸ Châ chakaotuhpa he Abeipa biehrai liata a ngiakhei ha chi ta, chavâta châ chakaotuhpa chô liana he ngiachhiena rie palâsa mah y. Thaileichâna ei hnei khiahta deikua cha, nâma tlai ta na thie thlâh ha mah y, khazia na paw lâ cha einâ chhi ngâ kaw aw chi?” tah ta.

⁹ Zawnathâ ta, “Châ bao vâ! Ei paw ta na chô liata hmo pha leipa tao â chhuah khiahta cha, cha chho leipa ta ma ei y aw?” tah ta.

¹⁰ Dâvi ta Zawnathâ hnohta, “Na paw ta a chahrâh kawpa ta châ chhypa vaw châ sala, ahy ma nâ chho aw?” tah ta.

¹¹ Zawnathâ ta Dâvi hnohta, “A vy teh, lyurâhpa lâ hao vawh tua ei si,” tah ta. Ama pano ta lyurâhpa lâ cha vawh ei ta.

¹² Zawnathâ ta Dâvi hnohta, “Zehôvah, Izarei Khazohpa cha pahnokheituhpa châ maw sy! Mylâ he daihti liata tlyma, hânoh tlyma, ei paw palôh phaozie pasia aw na ta, Dâvi chô liata â ly kaw khiahta cha, nâ lâ chyhsa vaw tuah aw na ta, ei cha chho aw.

¹³ Ei paw ta na chô liata hmo pha leipa tao a chhuah sala, cha chho leipa aw sah la, thlalôhpa ta na sie thei nawpa ta ei cha pathlie leipa khiahta cha, Abeipa ta Zawnathâ chô liata a tao awpa cha tao sala, cha hlâta pasa viapa chhao ta tao mawh sy. Ei paw hnohta a Abeipa a y tyhpa hawhta, nâma hnôh chhao ta y hra mawh sy.

¹⁴ Abeipa ta Dâvi chariahpa zydua alei chô tawhta a chhawh pathlah khai tita, ei hro thlâh ha chy khiahta cha, ei thi lei nawpa ta Abeipa ngiachhiena ei chô liata palâsa mah y.

¹⁵ Ei thi ha khiahta deikua cha, na ngiachhiena cha ei chhôhkha chô liata chhâzaw ta chhawh pathlah beih khah y,” tah ta.

¹⁶ Chatawhcha Zawnathâ ta Dâvi chhôhkha chô liata bie hraih ta, “Zawnathâ moh he Dâvi chhôhkha tawhta chhawh pathlahpa ta y leipa sala, Abeipa ta Dâvi chariahzy chô liata phuh la mawh sy,” tah ta.

¹⁷ Zawnathâ ta Dâvi cha, a kyh a pachâna kyh reipa ta, bie pataihsa heih ta. Ano hrona kyh a pachâpa tlu ta, Zawnathâ ta Dâvi cha a kyh a vaw pachâpa a châ.

¹⁸ Zawnathâ ta Dâvi hnohta, “Mylâ khi thla thiehpa kyhchhi noh châ ta, nâ tyuna a rua awpa vâta, na y leipa â lâ aw.

¹⁹ Hânoh ta zu para la, biehraina ei tao tua nota nâ nyuna su lâ kha sie la, alô pathlupa kiah liata vaw y thlâh ha mah y.

²⁰ Châka a nuapa hawhta châtai miathôh a kâ lâ ei vaw ka aw.

²¹ Hawtipa vaw tuah aw na ta, ‘Vawh la, châtaizy kha kei tlua teh,’ ei tah aw. Hawtipa hnohta, ‘Moh tua, châtaizy kha na kâ lâ ama y khaw, la teh,’ ei tah khiahta cha, a vy mah y, Abeipa hrona reipa ta ei reih, na châta thlalôh a chhih ta, chi awpa y vei.

²² Hawtipa hnohta, ‘Moh tua, châtaizy kha na khô lâ ama y khaw,’ ei tah khiahta deikua cha, sie syulyu ha mah y. Abeipa ta a cha pasiesa hapa a châ.

²³ Nâma nata keima likah ta hmo eima rei hapa kyh liana khata cha, pachâ teh, Abeipa cha eima likah liata chhâzaw ta miah pahnokheituhpa a châ,” tah ta.

²⁴ Chatanachata Dâvi cha lyurâhpa liata a nyu ta. Thla a vaw dieh nahta, abei cha pati dôh awpa ta a tyuh ta.

²⁵ Abei cha noh hro ta â tyuna tyhpa, pâhchhô kiapâh liata dyuchhai liata a tyuh ta. Zawnathâ cha ano dady ta a tyuh ta, Abane cha Sawla kâ lâta a tyuh ta, Dâvi su deikua cha aruapa ta y ta.

²⁶ Cha noh cha Sawla ta khâpa hmah reih vei, “A chô liata hmo a tlôpa y ta, a pathaih leipa a châ aw, a pathaih leipa a châ tlai aw,” tahpa ta pachâ ta.

²⁷ A noh nona, thlah thiehpa noh mylâ chhao Dâvi su cha rua ha heih ta. Sawla ta a sawchapawpa Zawnathâ hnohta, “Khazia ma Zese sawchapawpa he zâhnia chhao tanoh chhao pati dôh awpa ta â vy vei?” tah ta.

²⁸ Zawnathâ ta Sawla cha a chhy ta, “Dâvi cha Bethlehe lâ sie awpa ta thata na hiah ta.

²⁹ ‘Bâh na pasiesa teh, eima chhôhkha ta khihpi liata atheihna hlâna hnei aw ei ta, cha liata y hra awpa ta ei uhta ta bie eina vaw pie. Chavâta eina ngiachhie thei chi khiahta cha, rie na pasiesa la, ei unawhzy cha ei kei hmô aw ei,’ tahpa ta eina chho. Cha vâna chata bei tlâhkhai lâ he â vy leipa a châ,” tah ta.

³⁰ Sawla cha Zawnathâ chô liata a pathi thata ia ta, a hnohta, “Nâ, chanô chochhiepa nata chhorupa sawchapawpa, nâma maophyuh nawpa nata na nô thluahruana pamaophyuhsa awpa ta, Zese sawchapawpa he nâ tlyhpa a châ tahpa ei pahno leipa ma a châ?

³¹ Zese sawchapawpa he alei liata a hro chhôh zydua cha, a duah thei aw va chi. Nâ beinarâh chhao a duah thei aw vei. Chavâta tahmâ chyhsa tuah la, kei lâta a vaw chhi teh, a thi thlyu awpa a châ,” tah ta.

³² Zawna­thâ ta a paw Sawla cha a chhy ta, a hnohta, “Khazia ma Dâvi cha thie awpa a châ tly? Khâpa ma a tao haw?” tah ta.

³³ Sawla ta Zawnathâ cha chakhao a chhuahpa ta a asei chalo ta, moai ta. A paw ta Dâvi cha thie â chhuah tlai tahpa Zawnathâ ta pahno ha ta.

³⁴ Zawnathâ cha tlâhkhai tawhta hiehâh ngaitapa ta thyu ta, thla thiehpa noh nona noh cha pati rai nie vei. A paw ta Dâvi a pamaophyuhsa ngaitapa vâta, Dâvi cha a pachâ thata a rôhkhei.

³⁵ My ta Zawnathâ cha hawtipa a chhi ta, Dâvi nata a hmô nawpa su ama raopa lyurâhpa lâ cha sie ta.

³⁶ Hawtipa â chhipa hnohta, “A râ la, châtai ei kapazy kei tlua teh,” tah ta. Hawtipa cha â râ hai no ta, ano khô lâ châtai kei ka ta.

³⁷ Hawtipa ta Zawnathâ châtai kapa tlana su a kei tlô nahta, Zawnathâ ta hawtipa cha awsao ta, a hnohta, “Châtai kha na khô lâ y vei ma?” tah ta.

³⁸ Zawnathâ ta hawtipa cha aw ta, “A para la, chatlie teh, kha liata y thlâh ha kha,” tah ta. Zawnathâ hawtipa cha châtaizy pakhy ta, a zibeipa lâ a vy ta.

³⁹ Hawtipa cha khâpa hmah pahno leipa ta. Zawnathâ nata Dâvi deita ta hmo yzie cha ama pahno.

⁴⁰ Zawnathâ ta hawtipa cha a chaihraizy pie ta, a hnohta “Sie la, khihpi lâ phaoh teh,” tah ta.

⁴¹ Hawtipa a siepata nahta, Dâvi cha alô pachopa chho lâ chhâh tawhta vaw pua ta, a hmia alei liata a khupa ta ei thôh a bôh ta. A pahnâ raihriepa ta, a chakhei raihrie ei ta, Dâvi cha a cha via pachai.

⁴² Zawnathâ ta Dâvi hnohta, “Thlalôhpa ta sie mah y, ‘Abeipa cha keima nata nâma likah nata ei pathlazy nata na pathlazy likah liata chhâzaw ta y mawh sy,’ tahpa ta Abeipa moh ta bie liahsa eimâ taih raihrie ha khaw,” tah ta. Chatanachata Dâvi cha thyu ta, sie ha ta. Zawnathâ chhao khihpi lâ a lie ha hra ta.