1 SAMUELA 2 - Mara Bible RV (BSI)

Hânâ thlahchhâna

¹ Chatawhcha Hânâ cha hetana heta thlahchhâ ta, “Abeipa liata ei palôh a ly ta, Abeipa liata ei ki chaluahpa ta a y. Na pachhana liata ei lypa vâta, Ei chariahpazy chô liata ei pakah a kawh thei bâ aw.

² “Abeipa hawhta pathaihpa y veih ei: Nâ leipa ta mohropa y leipa ei ta, Eima Khazohpa hawhpa lôpanô y veih ei.

³ “A palai ngaitapa ta bie reih khao leipa u la, Nama pakah tawhta sâlâna bie pua khao khah sy; Abeipa cha pahnona Khazohpa châ ta, Chyhsa hmotaopazy kho a pathliahtuhpa a châ.

⁴ Thatlôpazy libaw thlie ta, Chiehleipazy tha a patlô tyh.

⁵ Rihbiepazy ta viahchhâ châta hriahlao ei ta, Nodipazy tlao ama nodi khao vei. Chanô chohpa ta pasari sa ta, Saw hluhpi a hneipa nô hmâchhâh yrupa ta a y.

⁶ Abeipa ta thie ta, A pahro heih tyh. Athihkhih lâ pangiasa ta, A pathyu heih tyh.

⁷ Thokha dyhchhiepa ta tao ta, Thokha hneirôhpa ta a tao. Thokha panawhsa ta, Thokha a pasâhsa.

⁸ Dohlei tawhta dyhchhiepa pathyupa ta, Buchâh tawhta phahlapazy chalo ta; Beimachâzy hnohta âmo cha patyusa ta, Palyupalihna beidyuchhai a patosa ei. Alei tôhzy he Abeipa eih châ ta, Alei tôhzy chô liata khizaw he a padua.

⁹ “A chyhsa ngâchhihpazy phei vaih aw ta, Moleipazy deikua cha zohna liata chhawh pathlahpa ama châ aw; Thatlôna vâta chyhsa a duah veih ei.

¹⁰ Abeipa chariahpazy cha a tlawh ta keichheih aw ei ta, Âmo a dyuhpa ta avâ tawhta tôkalôhpa hawhta â thua thlu aw ei. Abeipa ta khizaw kaokih zydua pachia aw ta, Bei a paduapa hnohta thatlôna pie aw ta, A sathawthupa ki cha a cheihchalo aw.”

¹¹ Chatanachata Elkânâ cha Râmâ liata a o lâ a di ta. Hawtipa deikua cha theihthaipa Eli hmiakô liata Abeipa chakao ha ta.

Eli sawchapawzy moleina

¹² Eli sawchapawzy cha dyutlai leipazy châ ei ta, Abeipa pahno veih ei.

¹³ He he Eli sawchapawpa theihthaipazy ta zawpi chô liata ama tao tyhzie a châ: Chyhsa ta atheihna a hlâ tita, sa ama chhopa â tlao ngâ nota, theihthaipa chakaotuhpa cha sa thaona thua kuparo miathôh a hneipa a chabapa ta a vy ta,

¹⁴ beih pakah kawhpa tlyma, keli tlyma, ukâ tlyma, beih tlyma chhôh lâ za dy ta, thua ku ta a thaopa zydua cha theihthaipa ta ano châta â la tyh. Cha hawhna chata Silô lâ a vypa Izarei saw zydua chô liata ama tao lymâ.

¹⁵ Cha dei châ vei, a thaw ama rao hlâta, theihthaipa chakaotuhpa a vy ta, atheihna a hlâ ngâpa hnohta, “Theihthaipa châta rao awpa sa na pie teh. Sa pasyupa cha châ pyhpa aw vei, a heipa a khoh,” a tah tyh.

¹⁶ Chyhsa ta a hnohta, “A thaw rao ha tua ei sala, cha khai tawhta na khopa zie la lah vâ chi,” a tah khiahta cha, ano ta, “Châ vei, tahmâ tlai he na pie teh, eina pie vei khiah chi ta la, ei la raruah pyly aw,” a tah tyh.

¹⁷ He satliazy moleina he Abeipa mohmô liata rarôh y ngaitapa châ ta, he chyhsazy heta Abeipa lâta atheihna hlâpazy khâpasaw ta reih veih ei.

¹⁸ Hawtipa Samuela cha lini ephaw a kypa ta, Abeipa hmiakô liata chakao lymâ ta.

¹⁹ Cha thota a nô ta viahkao pasipa biehpa tyh ta, cha cha kô chareih ta atheihna ama hlâ tyhpa hlâ awpa ta, a vahpa hnohta a khyna maihta a phaopa tyh.

²⁰ Eli ta Elkânâ nata a lapinô cha byhnâ awpa ta, “He chanô ta Abeipa lâ a hlâ hapa vyuhpa ta, ano liana heta Abeipa ta saw hropazy cha pie mawh ei sy,” tah ta. Cha khai tawhta ama o lâ a lie ha ei ta.

²¹ Abeipa ta Hânâ cha za tly ta, saw phaoh ta, sawchapaw pathôh nata sawchanô pano sa ta. Hawtipa Samuela cha Abeipa hmiakô liata laiseih lymâ ta.

Eli ta a sawchapawzy a chhorei ei

²² Eli cha machâ kaw bâ ta, Izarei zydua chô liata a sawchapawzy hmotaopa zydua nata ahmaohna poh o chhikao liata chakaotuhpa chanôzy amâ ziakhei tyhpa kyhzy thei tyh ta.

²³ Ama hnohta, “Khazia cha hawhpa hmozy cha nama tao tly? Moleina hmo nama taopazy cha, he chyhsa zydua tawhna heta ei thei khai haw.

²⁴ Châ bao va, ei sawchapawzy saih u, Abeipa chyhsazy ta nama thâtih ama pathâhsapa ei theipa he thâtih phapa châ vei.

²⁵ Chyhsa ta chyhsa chô liata a molei khiahta cha, Khazohpa ta paryhkhei aw ta, chyhsa ta Abeipa chô liata a molei khiahta cha, ahy ma a paryhkhei khao aw?” tah ta. Châhrasala Abeipa ta âmo cha thie â chhuah hapa vâta, ama paw bie cha nathlie khoh pyly veih ei.

²⁶ Hawtipa Samuela cha laiseih lymâ ta, Khazohpa nata chyhsapa modypa ta y ta.

Khazohpa ta Eli chhôhkha a dytha

²⁷ Khazohpa chyhsa pakha Eli lâ a vy ta, a hnohta, “Abeipa ta hetana heta a tah: Châ pathlatuhpa chizy Izi râh liata Phiraoh sei ta ama y no kha, ama hnohta a siapa ta a phualuah ha va na mâ?

²⁸ Châ pathlatuhpa kha ei theihthaipa châ awpa ta Izarei chi zydua hry tawhta a tlyh na ta, ei maisâh kiah ta, ropahâhpa rao awpa nata ei hmiakô liata ephaw a ky awpa ta ei tlyhpa a châ. Izarei sawzy tawhta mei ta raopa hlâpa zydua chhao châ pathlatuhpa pathlazy hnohta ei pie khai ei

²⁹ Cha hawhta a châ nota, khazia ma ei pahrâna su châta bie ei piepa atheihna nata hmohlâpazy mohnao ei chi ta, kei hlâta na sawchapawzy palyupalih viapa ta, ei phopi Izarei sawzy hmohlâpa to tawhta a pahâh chaipazy cha nâmo a pathawhna châta nama hmâh?

³⁰ Chavâta Abeipa Izarei Khazohpa ta hetana heta a tah: ‘Na chipathlazy nata châ pathlatuhpa chipathlazy cha ei hmiakô liata chhâzaw ta ama y aw,’ tahpa ta bie a vaw taih taraw na ta, tahmâ deikua cha Abeipa ta, ‘Cha hawhta châ khao aw vei, nâ palyupalihpa maih palyupalih aw ei na ta, nâ mohnaopa maih cha ama noh â li lymâ aw.

³¹ Moh teh, nâma bâh nata châ pathlatuhpa chizy bâh ei tai khai nawpa nohzy a vaw tlô hai, na chipathla liata machâpa y khao aw veih ei.

³² Izarei chô liata hneirôna ei tobi awpa zydua cha vâsâhpa nata hiatliapa ta moh aw chi ta, na chipathlazy hry liata machâpa chhâzaw ta y khao aw veih ei.

³³ Ei maisâh tawhta ei chhawh pathlah leipa chyhsa cha, na mo châ pabâ awpa nata na palôh châ pasasa awpa ta pahlôhpa châ aw ta, na chipathla a pôhpazy cha ama locho nota ama thi lymâ aw.

³⁴ Na sawchapaw pano, Hôphani nata Phinehâ chô liata hmo vaw tlô aw ta, cha cha ei reipa maih a vaw tlô khai awpa a châzie nâma châta ngiana a châ aw. Ama pano ta noh kha ta ama thi aw.

³⁵ Chatawhcha ei châta theihthaipa ngâchhihpa padua aw na ta, ano chata ei palôh liata nata ei pachâna liata hmo a ypa hawhta tao aw ta, chipathla a ipa ei paduapa awpa vâta a chi lei leipa aw ta, ei sathawthupa hmiakô liata chhâzaw ta a y aw.

³⁶ Na chipathla a hrohpa maihta tâkâ tlaw kha nata viahchhâ tlâ kha a hia awpa ta ano lâ pangai aw ei ta, a hnohta, “Viahchhâ tlawh kha chhâ nie awpa ei hnei thei nawpa ta, theihthaipa raihria kheihawhpa chhâ ma na pahriasa hra awpa ta ei châ haw,”’ ama tah awh,” tah ta.