1 SAMUELA 19 - Mara Bible RV (BSI)

Sawla ta Dâvi thie â chhuah

¹ Sawla ta a sawchapawpa Zawnathâ nata a chakaotuhpa zydua cha Dâvi thie awpa ta chho ta. Châhrasala Sawla sawchapawpa Zawnathâ ta Dâvi cha khoh kaw ta.

² Zawnathâ ta Dâvi hnohta, “Ei paw Sawla heta thie châ chhuah ta. Chavâta mylâ my cha a vaih kaw la, su â nyu kawpa liata y la, cha liata a nyu chy mah y.

³ Kei vaw pua aw na ta, na yna kiapâh lyu liata ei paw kiah liata a kei duah aw na ta, na thâtih ei paw ei chho aw. Ei pahnopa a y khiahta cha ei cha chho aw,” tah ta.

⁴ Zawnathâ ta a paw Sawla hnohta Dâvi cha reithai ta, a hnohta, “Bei heta a chakaotuhpa Dâvi chô liata hmo moleipa tao cheita khah sy. Na chô liata moleina tao beih leipa ta, a hmotaopazy ta na châta phana tlao a vaw tlôkhei tyh hri hih.

⁵ A hrona sokhâhpa ta Philistinâ chyhsa kha thie ta, Abeipa ta Izarei zydua châta pachhana rônah ngaitapa a tao. Cha cha nâ chhao ta hmô chi ta, nâ ly ngaitapa kha a châ. Khazia a chhâpa y leipa ta Dâvi cha thie aw chi ta, mosiapa thisaih chô liata moleina na tao aw?” tah ta.

⁶ Sawla ta Zawnathâ bie cha nathlie ta, “Abeipa hrona reipa ta ei reih, ano cha thiepa châ aw vei,” tahpa ta bie a taih ta.

⁷ Zawnathâ ta Dâvi cha aw ta, hmo zydua chho ta. Dâvi cha Sawla lâ a chhi ta, abei hnohta a y tyhpa hawhna khata y heih ta.

⁸ Adyuhna vaw y heih ta. Dâvi cha pua ta, Philistinâ mo cha a kei dyuh ta, thata thie ta, a hmiakô liata a râpai ei ta.

⁹ Sawla cha asei chabapa ta ano o liata â tyu thlâh ha nota, Abeipa tuapa thlahpa chhiepa a chô liata vaw tlô ta. Dâvi cha totâ a tô ngâ nota,

¹⁰ Sawla ta Dâvi cha asei ta pâhchhô liata chakhao pâ a chhuah ta, châhrasala Dâvi ta Sawla cha a kâsai hmâ ha ta, asei cha pâhchhô liata a chaloh thlâh ha ta. Dâvi cha a râ ta, cha zâ cha â boh haw.

¹¹ Sawla ta Dâvi cha my ta thie awpa a chhuah ta, a byh awpa ta a o lâ chyhsazy tuah ta. A lapinô Mikâli ta Dâvi hnohta, “Tazâ he na hrona pabohsa awpa ta nâ râ leipa khiahta la, mylâ cha thiepa na châ aw,” tah ta.

¹² Mikâli ta Dâvi cha opy tawhta pathliah ta, a râ ta, â boh haw.

¹³ Mikâli cha terâfi la ta rakhô liata pazia ta, a luh lâ mie hmi lahuah soh ta, chysia ta khu ta.

¹⁴ Dâvi patu awpa ta Sawla ta chyhsazy a vaw tua nahta, Mikâli ta, “Tlâh vei,” tah ta.

¹⁵ Sawla ta Dâvi kei mo awpa ta chyhsazy tuah ta, “A rakhô dua ta a kaw sy u la, ei thie aw,” tah ta.

¹⁶ A chyhsa tuapazy amâ kei ngia nahta, moh teh u, terâfi tlai cha rakhô liata a vaw zia thlâh ha ta, a luh lâ mie hmi lahuah a huapa ta vaw y ta.

¹⁷ Sawla ta Mikâli hnohta, “Khazia ma na dôvei chi ta, ei chariahpa cha â boh thei nawpa ta na pasiesa,” tah ta. Mikâli ta Sawla cha a chhy ta, “Ano ta, ‘Ei cha thie lei nawpa ta, na pasiesa ha mah y,’ eina tahpa vâta a châ,” tah ta.

¹⁸ Dâvi cha a râ ta, a boh ha ta. Râmâ khih liata Samuela kô kei tlô ta, a chô liata Sawla hmotaopa zydua cha Samuela chho ta. Dâvi nata Samuela cha Naiô lâ sie ei ta, cha liata y ei ta.

¹⁹ Chatawhcha Sawla hnohta, “Moh teh, Dâvi cha Râmâ khih liata Naiô liata a y,” tahpa ta chho ei ta.

²⁰ Dâvi patu awpa ta Sawla ta chyhsazy tuah ta. Hrohsopazy ta hrohsona bie ama phuah ngâpa nata cha liata Samuela cha ama hyutuhpa ta â duapa ama hmô nahta, Sawla chyhsa tuapazy chô liata Khazohpa Thlahpa vaw tlô ta, âmo chhao chata hrohsona bie cha phuah lymâ ha hra ei ta.

²¹ Cha cha Sawla ama chho nahta, mohropa tuah heih ta, âmo chhao ta hrohsona bie phuah ha heih hra ei ta. Sawla ta a ei thôhna ta chyhsazy tuah heih ta, âmo chhao chata hrohsona bie cha phuah ha heih hra ei ta.

²² A chhâna liata ano pôhpa ta Râmâ lâ cha sie ta, Seku liata tikhaoh lai ngaitapa kei tlô ta. “Samuela nata Dâvi khataih liata ama y,” tahpa ta chyhsazy hiahri ta. Chyhsa pakha ta, “Moh teh, Râmâ khih liata Naiô liata ama y,” tah ta.

²³ Râmâ liata Naiô lâ cha sie ta. Khazohpa Thlahpa cha Sawla chô liata chhao vaw tlô ta, a sie pâna chôta Râmâ liata Naiô a tlôna taihta hrohsona bie phuah lymâ ta.

²⁴ Ano chhao a chysiazy pahluhpa ta, Samuela hmiakô liata hrohsona bie phuah lymâ hra ta. Cha noh cha noh y nata zâkhihdei ta thluahruapa ta a zia ta. Cha vâna chata, “Sawla chhao hrohsopazy hry liata a hlao ha hra khiah?” tahpa ta rei tyhpa a châ.