1 SAMUELA 18 - Mara Bible RV (BSI)

Zawnathâ nata Dâvi aviasana

¹ Dâvi ta Sawla hnohta bie a rei khaipa nahta, Zawnathâ hro cha Dâvi hro nata phie a zao ha ta. Zawnathâ ta ano hrona kyh â pachâpa tlu ta Dâvi cha a kyh pachâ ta.

² Cha noh tawhta Sawla ta Dâvi cha a hnohta paysa pâ ha ta, a paw o lâ â di awpa pasaih khao vei.

³ Zawnathâ ta Dâvi cha ano hrona hawh tlai ta a kyh a pachâpa vâta, a hnohta biehrai tao ta.

⁴ Zawnathâ ta poh â bupa hlai ta, Dâvi pie ta, a chariah chhaichhi, a zaozi, a libaw nata a chaisaih taihta pie ta.

⁵ Sawla ta a tuana lâ maih Dâvi cha sie ta, a hlao a tloh lymâ tyh. Chavâta Sawla ta Dâvi cha pheisaih hyutuhpa ta tao ta. Cha cha chyhsa zydua pachâna liata nata Sawla chakaotuhpazy pachâna liata chhao pha tah ngaita ei ta.

Dâvi chô liata Sawla hiatliana

⁶ Adyuhna tawhta a vaw lie ei ta, Dâvi chhao Philistinâ chyhsa a thie khai tawhta vaw tlô hra ta, Izarei khihpi zydua tawhta chanôzy vaw pua ei ta, hla sapa nata lâna chôta, khohzy, alyna hlazy nata pyungiapa chhaichhizy chhaota bei Sawla cha vaw dy ei ta.

⁷ Chanôzy ta lâna chôta hla ta a palie raihrie ei ta, “Sawla ta a sâh sâh ta thie ta, Dâvi ta a thy thy ta a thie,” tah ei ta.

⁸ Sawla cha a hiehâh ngaita ta, cha hla biezy chata palysa lei kaw ta. “Dâvi cha a thy patosa ei ta, kei cha a sâh deita eina patosa ei, khinarâh tah leipa ta cha, a to awpa hropa khâpa a y khao,” tah ta.

⁹ Cha noh tawhta cha, Sawla ta Dâvi cha mohpahroh ha ta.

¹⁰ A mylâ ta Khazohpa tuapa thlahpa chhiepa cha Sawla chô liata vaw tlô ta, o chhôh liata thata a chiaburâh ta. Dâvi cha noh hro ta a tao tyhpa hawhta, to ta tô heih ta. Sawla cha a ku liata asei a chaba thlâh ha ta.

¹¹ Sawla ta, “Dâvi he pâhchhô liata ei chakhao pâ ha tua aw” tah ta, asei ta kei chakhao ta. Châhrasala Dâvi ta ei no po â kâ sai hmâ haw.

¹² Abeipa ta Sawla siesai ha ta, Dâvi deikua cha a ypâpa vâta, Sawla ta Dâvi cha chi kaw ta.

¹³ Chavâta Dâvi cha Sawla ta ano tawhta pasiesa ta, pheisaih sâh kha hyutuhpa ta tao ta. Chatanachata Dâvi cha pheisaihzy hnohta a pahlaopa ta âmo cha chhihtha ta.

¹⁴ Abeipa a hnohta a ypa vâta, Dâvi cha a hmotaopa maih liata hlaotlohna hmô lymâ ta.

¹⁵ Dâvi hlaotlohna rônahpa cha Sawla ta a hmô nahta, chi ngaita ta.

¹⁶ Châhrasala Dâvi cha ama hnohta a pahlaopa ta âmo a chhihthapa vâ ei ta, Izarei nata Zudâh zydua ta a kyhpachâ ngaita ei ta.

Dâvi ta Sawla sawchanô a hnei

¹⁷ Chatawhcha Sawla ta Dâvi hnohta, “Moh teh, he he ei sawchanô uhtheipa Merâbi a châ hih. Ano he lapinô ta ei cha pahneisa aw. Keima châta riahpha ngaitapa ta y la, Abeipa adyuhnazy cha a dyuh mah y,” tah ta. Sawla ta, “Kei ta Dâvi chô liata ku pathla leipa aw sah la, Philistinâ mo ta a chô liata ku tlao pathla lah vâ ei,” tahpa ta pachâna a hneipa vâta, cha hawhta a taopa a châ.

¹⁸ Dâvi ta Sawla hnohta, “Ahy ma châ na ta, ei sanawh rinô nata ei paw pho zy he Izarei liata ahyzy châ ei ta ma, abei piahpa cha ei châ aw?” tah ta.

¹⁹ Sawla sawchanô Merâbi cha Dâvi lâ pakia nawpa daihti a vaw tlô nahta, Mehôlâ chyhsa Adari a pahneisa haw.

²⁰ Sawla sawchanô Mikâli ta Dâvi cha khoh ta. Sawla chho ei ta, cha hmo chata Sawla cha palysa kaw ta.

²¹ Sawla ta, “Mikâli he Dâvi pie aw na ta, ano châta a aona khoheih châ aw ta, cha cha Philistinâ mo ta a chô liata ku ama pathla theina a châ aw,” tahpa ta pachâ ta. Chavâta Sawla ta Dâvi hnohta, “Tanoh he ei piahpa châ nawpa ryhpaohna na hnei chanei heih,” tah ta.

²² Sawla ta a chakaotuhpazy biepie ta, “Arulâta Dâvi chho u la, ‘Pachâ teh, abei ta na chô liata a ly kaw ta, a chakaotuhpa zydua chhao ta ama cha khoh kaw sai. Chavâta tahmâ abei piahpa châ mah y,’ nama tah aw,” tah ta.

²³ Cha biezy cha Sawla chakaotuhpazy ta Dâvi nah theina liata reih ei ta. Dâvi ta, “Abei piahpa châpa he hmo chynawhpa hawhta a pachâpa dua nama lyu thlâh haw? Keima hawhpa dyhchhiepa nata mohnao chhihpa chyhsa châta cha, hmo naopa naikawh ma châ vâ,” tah ta.

²⁴ Sawla chakaotuhpazy ta, “Dâvi ta cha hawhta a tah,” tahpa ta Sawla cha chho ei ta.

²⁵ Sawla ta, “Dâvi hnohta hetana heta reih teh u, ‘Abei ta a chariahpazy chô liata phuh la a khohpa vâta, nômâ châta Philistinâ mo chopaw vo za kha haw ta, cha leipa cha abei ta nômâ hropa khâpa hmah haw a chhuah vei,’ nama tah aw,” tah ta. Cha cha Philistinâ mo ku liata Dâvi a thi thei nawpa ta Sawla ryhraona a châ.

²⁶ Cha biezy cha Sawla chakaotuhpazy ta Dâvi ama chho nahta, abei piahpa a châ awpa kyh chata Dâvi cha palysa kaw ta. A daihti taihpa a khô hlâta,

²⁷ Dâvi nata a chyhsazy cha thyu ei ta, sie ei ta, Philistinâ mo za no kei thie ei ta. Dâvi ta ama chopaw vozy cha vaw cheih ta, abei piahpa a cha thei nawpa ta, abei hnohta a zydua ta pie khai ta. Chatanachata Sawla ta a sawchanô­ Mikâli cha a lapinô ta pahneisa ta.

²⁸ Abeipa cha Dâvi hnohta y ta, a sawchanônô Mikâli chhao ta Dâvi kyh a pachâ ngaita tahpa Sawla ta hmô ta, pahno pasia ha ta.

²⁹ Chavâta Sawla cha Dâvi chi via rili ta. Chatanachata Sawla cha Dâvi khakhaipa châ lymâ ha ta.

³⁰ Philistinâ pheisaih hyutuhpazy ta a dyuh awpa ta vaw pua tyh ei ta, ama vaw puana maihta Dâvi cha Sawla chakaotuhpa zydua hlâta a hlaotloh via lymâ ta, chavâta a moh pathâh ngaita ta.