1 SAMUELA 17 - Mara Bible RV (BSI)

Dâvi nata Kôliathâ

¹ Philistinâ mo cha chariah a dyuh awpa ta ama pheisaihzy pakhy ei ta. Zudâh râh chhôh liata a ypa Sôkô khihpi liata a hmaohpakhy ei ta. Sôkô nata Azekâ likawh Ephedami liata riehmo paryh ei ta.

² Sawla nata Izarei mo chhao a hmaohpakhy ei ta, Elâ saikao liata riehmo paryh ei ta, Philistinâ mo cha a chykhâhpa ta amâ paziah.

³ Philistinâ mo cha hiakha lâ tlâh liata a duah ei ta, Izarei mo ta âmo riaaipa ta hiakha lâ tlâh liata a duah hra ei ta, ama likawh cha saikao ta padai ta.

⁴ Philistinâ mo riehmo tawhta ama chyhsa thatlô chaipa Kôliathâ, Kâthâ khihpa, dy charu nata kha kha a sâhpa vaw pua ta.

⁵ Dawh lakhu a khu ta, dawh chachôhna vyhphao a ky ta, a chachôhna vyhphao dawh ahrina zie cha sekel 5,000 a châ.

⁶ A ngiahly liata dawh a ky ta, a ky liata asei â tei.

⁷ Asei bih cha thaisana bâtlâh hawhta châ ta, asei luh cha sekel 600 a hripa thua a châ. A vyhphao chabatuhpa cha a hmia lâta sie ta.

⁸ Kôliathâ cha a duah ta, Izarei pheisaihzy cha awsao ta, ama hnohta, “Khazia a dyuh awpa ta namâ vaw paziah ngâ kaw? Kei Philistinâ chyhsa châ na ta, nâmo Sawla chakaotuhpa châ veih ei chi mâ? Nama vyuhpa chyhsa pakha a tlyh u la, kei lâta a zu sa.

⁹ Nâ tu thei sala, eina thie thei khiahta cha, nâmo chakaotuhpa ta y aw pi ta, kei ta pahniepa ta ei thie ha khiahta deikua cha, keimo chakaotuhpa ta y aw ei chi ta, miah nama chakao aw,” tah ta.

¹⁰ Philistinâ chyhsa chata, “Tanoh he Izarei pheisaihzy ei cha pahao ei. Chyhsa pakha vaw papua u la, eimâ tu aw,” tah ta.

¹¹ Sawla nata Izarei pheisaih zydua ta Philistinâ chyhsa biereipa cha ama thei nahta, thlazohpa ta chi ngaita ei ta.

¹² Dâvi cha Zese sawchapawpa châ ta, Zese cha Zudâh râh Bethlehe liata Ephrâthâ chyhsa kha a châ. Zese cha sawchapaw pacharie hnei ta, Sawla â bei daihti liata cha, pawpipa kô uhthei kawpa châ ha ta.

¹³ Zese sawchapaw uhthei viapa pathôhzy cha Sawla hnohta adyuhna lâ sie hra ei ta. A sawchapaw pathôh adyuhna lâta a siepazy moh cha a uhthei chaipa Eliabâ, a pazipa Abinadâ nata a pathôhna Sâmâh zy ama châ.

¹⁴ Dâvi cha a seihnai chaipa châ ta, a uhtheipa pathôhzy cha Sawla hnohta sie ei ta,

¹⁵ Dâvi deikua cha Bethlehe liata a paw mietakuzy vai awpa ta, Sawla lâ vawh heih a vy heih tahpa ta a riahpahlai tyh.

¹⁶ Philistinâ chyhsa chata my nata zâlâ maihta a vaw hnia ta, noh sypalih chhôh â dua tyhna su liata a vaw duah tyh ta.

¹⁷ Zese ta a sawchapawpa Dâvi hnohta, “Sâh pakâhpa kachu hmo kha nata he viahchhâ tlâ hrawh he, na uhtazy châta phaoh la, na uhtazy riehmo lâ vawkhei para mah y.

¹⁸ Sâhpiti kuapa tlo hrawh he, ama py liata pheisaih sâh kha hyutuhpa na phaopa aw. Na uhtazy cha ama pha ma tahpa kei hiahri la, ama thâtih na vaw tlôkhei aw,” tah ta.

¹⁹ Sawla nata Dâvi unawhzy nata Izarei mo zydua cha, Philistinâ mo a dyuhpa ta Elâ saikao liata y ei ta.

²⁰ Dâvi cha mydi ta thyu ta, mietakuzy cha vaituhpa pakha pavaosa ta. A paw Zese ta bie a piepa hawhta niedozy phaopa ta, sie ta. Riehmo kei tlô ta, hrâsie awpa ta a pahô pahâhpa ta pheisaihzy ama pua hai no vaw châ ta.

²¹ Izarei sawzy nata Philistinâ mo cha a dyuh awpa ta ama pheisaihzy paziah ei ta.

²² Dâvi cha niedo mohôhtuhpa ku liata a hmozy soh ta, pheisaihzy yna lâ cha a kei râ ta, a uhtazy cha a kei naoh ta.

²³ Âmo bie â chho hai nota, Kâthâ khihpa, Philistinâ chyhsa thatlô chaipa, a moh Kôliathâ ama tahpa cha, Philistinâ pheisaihzy hry tawhta vaw pua ta, a bie rei tyhpazy kha vaw reih heih ta, cha biezy cha Dâvi ta thei ta.

²⁴ Izarei pheisaih zydua ta, cha chyhsa cha ama hmô nahta, ano tawhta a râpai ei ta, chi ngaita ei ta.

²⁵ Izarei pheisaihzy ta, “Kha chyhsa a vaw puapa kha nama hmô ma? Izarei pahao awpa ta a vaw pua. Ano a thie theipa cha abei ta sôh nata thih hluhpi piepa ta pahneirôhsa aw ta, a sawchanô pie aw ta, a paw chhôhkha cha râhpaw paeipa ta Izarei râh liata a paysa aw ei,” tah ei ta.

²⁶ Dâvi ta a kiah liata a duahpa pheisaihzy hnohta. “He Philistinâ chyhsa he thiepa ta, Izarei hmiachhie a patlâhtuhpa cha kheihta tao awpa ma a châ? He chopawtaileipa Philistinâ chyhsa he ahy ma châ ta, Khazohpa hrohpa pheisaihzy zua a pahao tly?” tah ta.

²⁷ Pheisaihzy ta, “Ano a thie theipa cha eima reipa hawhna khata taopa a châ aw,” tahpa ta a chhy ei ta.

²⁸ Pheisaihzy hnohta Dâvi biereipa cha, a uhta uhthei chaipa Eliabâ ta vaw thei ta. Eliabâ cha Dâvi chô liata a hie thata hâh ta, a hnohta, “Khazia nâ zu hra? Râhchawhpa liata mietaku a chyhta a ypazy kha ahy na pavaisa? Akhotlâh kawpa nata palôh moleipa a phaohpa na châ tahpa ei pahno. Adyuhna mo awpa ta a zupa na châ hih,” tah ta.

²⁹ Dâvi ta, “Khâpa hmo ma ei parao tly? Bie ei hiahripa tlâ châ ta?” tah ta.

³⁰ Dâvi cha pheisaih hropa lâ a heih ta, a hiahri hmopa pyly hiahri heih ta. Pheisaihzy ta amâ chhy hmopa pyly kha a chhy heih ei ta.

³¹ Dâvi biereipa cha pheisaihzy ta ama thei nahta, Sawla hnohta reih pachhuah ei ta, Sawla ta Dâvi cha paawsa ta.

³² Dâvi ta Sawla hnohta, “Ano vâna hao ta ahy hmahta palôh duapa ta y khah ei sy, châ chakaotuhpa heta Philistinâ chyhsa hao ei kei dyuh aw,” tah ta.

³³ Sawla ta Dâvi hnohta, “Nâ la Philistinâ chyhsa a dyuh awpa ta sie thei aw va chi, thyudyupa deita châ chi ta, ano cha a thyudyu tawhta adyuhpa chyhsa châ ta,” tah ta.

³⁴ Dâvi ta Sawla hnohta, “Châ chakaotuhpa he ei paw mietakuzy vaih tyh na ta, chakeibarôhneipa tlyma, chavyh tlyma a vy ta, mietaku zaw hry tawhta mietakutaw a la nota,

³⁵ a chadai na ta, chhei na ta, a pakah tawhta mietakutaw ei pachha tyh mâ tâh. Eina thyuhnao khiahta cha, a barôh ta patu na ta, tusao na ta, ei thie tyh.

³⁶ Châ chakaotuhpa he chakeibarôhneipa nata chavyh zy vaw thie ha tyh na ta, he chopawtaileipa Philistinâ chyhsa chhao he, Khazohpa hrohpa pheisaihzy a pahaopa vâta, âmo hawh pyly cha a châ hra aw,” tah ta.

³⁷ Dâvi ta, “Chakeibarôhneipa pheipato tawhta nata chavyh pheipato tawhta nâ pachhatuhpa Abeipa ta, he Philistinâ chyhsa ku tawhna heta eina pachha aw,” tah ta. Sawla ta Dâvi hnohta, “Sie mah y, na hnohta Abeipa y mawh sy!” tah ta.

³⁸ Sawla ta Dâvi cha ano chariah chhaichhizy paky ta, dawh lakhu pakhu ta, dawh chachôhna vyhphao paky ta.

³⁹ Dâvi cha a chariah chhaichhi chô liana cha Sawla zaozi nata chaisaihna a pataih ta, sie a chhuah ta. Châhrasala cha hawhta a tao beih leipa vâta, siekhei thei leipa ta. Dâvi ta Sawla hnohta, “Hezy he hmâh beih leipa na ta, chavâta siekhei thei aw va na,” tah ta. Dâvi cha Sawla chariah chhaichhizy cha pahluh ta.

⁴⁰ A ku ta a chôchahrei chaba ta, chavah liata alô mihpa lô pangawh a tlyh ta, mietaku vaina sahria â aopa liata khô ta, a savo cheisiah a chabapa ta, Philistinâ chyhsa cha a kei hnia ta.

⁴¹ Philistinâ chyhsa cha hmialâ vaw pua ta, Dâvi cha a vaw hnia ta, vyhphao chabatuhpa cha a hmialâ ta sie ta.

⁴² Philistinâ chyhsa cha a vaw heih ta, Dâvi a vaw hmô nahta, sabia panyupa nata a mopadei a ngia kawpa thyudyupa dei a châpa vâta mohnao kaw ta.

⁴³ Philistinâ chyhsa ta Dâvi hnohta, “I ma ei châ, chôchahrei ta ei nâ vyhnao chi?” tah ta. Philistinâ chyhsa ta a khazohzy moh reipa ta Dâvi chô liata chhiesa ta.

⁴⁴ Philistinâ chyhsa ta Dâvi hnohta, “A vy teh, na sa kha vâ pavawzy nata râhsazy ei pie aw,” tah ta.

⁴⁵ Dâvi ta Philistinâ chyhsa hnohta, “Nâ cha zaozi nata seipi nata seichhi zy chabapa ta naw puahnao chi ta, kei deikua la, Pheisaihzy Abeipa, Izarei pheisaihzy Khazohpa, na pahaopa moh ta ei vaw pua.

⁴⁶ Tanoh he Abeipa ta nâma kha ei ku liata eina pie aw. Cha thie aw na ta, na luh cha tai aw na ta, Philistinâ pheisaih rizy cha tanoh he vâ pavawzy nata râhsazy ei pie aw ei. Chatanachata khizaw zydua ta Izarei liata Khazohpa a y tahpa ama pahno aw.

⁴⁷ He liata ahmaohpakhypa zydua chhao heta, Abeipa ta zaozi nata asei ta pachha vei tahpa ama pahno aw. Adyuhna he Abeipa eih châ ta, Abeipa ta nâmo he eima ku liata miah a pie aw,” tah ta.

⁴⁸ Philistinâ chyhsa cha thyu ta, Dâvi hmiachhy awpa ta vaw pangai ta. Dâvi chhao ta Philistinâ chyhsa cha a dyuh awpa ta thlai a kei râ ta.

⁴⁹ Dâvi cha a sahria chapao ta, alô miakha thaoh ta, savo cheisiah ta kei siah ta, Philistinâ chyhsa cha a khi liata khai ta, a khi liata alô cha a ngia ta, â khu lâta pao ta.

⁵⁰ Cha hawhna chata Dâvi ta Philistinâ chyhsa cha savo cheisiah nata alô ta a pahnie haw. Philistinâ chyhsa cha alô ta siah ta, a thie haw. Dâvi cha Zaozi rai a chaba vei.

⁵¹ Dâvi cha thlai a kei râ ta, Philistinâ chyhsa chô liata a kei duah ta, Philistinâ chyhsa zaozi cha la ta, a paih tawhta phia ta, cha chata chhawh ta, a luh tai ta. Philistinâ chyhsazy cha ama chyhsa thatlô chaipa a thi haw tahpa ama hmô nahta, a râpai khai ha ei ta.

⁵² Izarei mo nata Zudâh mo cha thyu ei ta, awh ei ta, Philistinâ mo cha Kâthâ taihta nata Ekaraw thokhy ochhi taihta a chadai ei ta. Hmaphaohpa Philistinâ chyhsazy cha Saraimi lâpi tlykha ta pao ei ta, Kâthâ nata Ekaraw taihta thata ama pao.

⁵³ Izarei sawzy cha Philistinâ mo amâ chadaipa tawhta a lie ei ta, Philistinâ mo riehmo hrao ei ta.

⁵⁴ Dâvi ta Philistinâ chyhsa luh cha la ta, Zerusale lâ siekhei ta, Kôliathâ chariah chhaichhi deikua cha ano poh o liata soh ta.

⁵⁵ Dâvi ta Philistinâ chyhsa a thyuhnaopa Sawla ta a hmô nah khata, pheisaih hyutuhpa Abane hnohta, “Abane, hao satliapa hao ahy saw maw?” tah ta. Abane ta, “Na hrona reipa ta ei reih, Hy abei y, pahno cheita va na,” tah ta.

⁵⁶ Abei ta, “Hao hawtipa hao ahy saw ma tahpa patluah mah y,” tah ta.

⁵⁷ Dâvi cha Philistinâ chyhsa a thie khai tawhta â vaw lie heih nahta, Abane ta Sawla lâ a chhi ta, Philistinâ chyhsa luh chabana chôta Sawla lâ cha vawkhei ta.

⁵⁸ Sawla ta a hnohta, “Satliapa, ahy sawchapawpa ma na châ tly?” tah ta. Dâvi ta a chhy ta, “Bethlehe khihpa, châ chakaotuhpa Zese sawchapawpa na ei châ,” tah ta.