1 SAMUELA 16 - Mara Bible RV (BSI)

Samuela Dâvi sathaw a thu

¹ Abeipa ta Samuela hnohta, “Sawla cha Izarei chô liata bei châta ei khoh khao leipa châ ta, ano vâta khachâ ma pachârôhpa ta na y aw? Na saki ôh liata sathaw pabie la, sie teh. Bethlehe khihpa Zese lâta ei cha tuah aw. A sawchapawzy hry liata pakha keima châta bei ta ei rao haw,” tah ta.

² Samuela ta, “Kheihta ma ei sie thei aw? Sawla ta a vaw thei khiahta cha, ei na thie aw mâh tâh,” tah ta. Abeipa ta, “Viahchao zeinô a chhi la, ‘Abeipa lâta atheihna hlâ awpa ta ei vy,’ na tah aw.

³ Atheihna hlâna liata Zese cha aw aw chi ta, na tao awpa ei cha chho aw. A moh ei cha chho awpa cha sathaw eina thupa aw chi,” tah ta.

⁴ Samuela cha Abeipa reipa hawhta tao ta, Bethlehe lâ cha sie ta. Khihpi machâzy ta a chalyuna chôta ano cha vaw dy ei ta, “Thlalôhna bie a vaw phaohpa na châ ma?” tah ei ta.

⁵ Ano ta, “Thlalôhna bie na ei vaw tlôkhei. Abeipa lâta atheihna hlâ awpa ta ei vy. A pathai u la, atheihna hlâna lâ a vy teh u,” tah ta. Zese nata a sawchapawzy cha pathaisa ta, atheihna hlâna liata a hlao awpa ta âmo cha hrua ta.

⁶ Amâ vy nahta, Samuela ta Eliabâ cha kei moh ta, “Abeipa sathawthupa cha, a hmiakô liata a vypa tlai he na a châ,” tah ta.

⁷ Châhrasala Abeipa ta Samuela hnohta, “A hmisâ tlyma, a pôraoh tlyma moh kha, ano kha khoh va na. Abeipa ta la chyhsapa hmôzie hawhta hmô vei. Chyhsapa ta cha khôtho lâ alânazie moh tyh ta, Abeipa deikua cha palôh tlao a moh tyh,” tah ta.

⁸ Chatawhcha Zese ta Abinadâ aw ta, Samuela hmiakô lâ pavawsa ta, Samuela ta, “He chhao he Abeipa ta â tlyhpa châ vei,” tah ta.

⁹ Zese ta Sâmâh pavawsa heih ta. Samuela ta, “He chhao he Abeipa ta â tlypa châ vei,” tah ta.

¹⁰ Zese ta a sawchapawpa pasarizy cha Samuela hmiakô lâ pavawsa ta. Samuela ta Zese hnohta, “Abeipa ta âmo he a tlyh tlâ vei,” tah ta.

¹¹ Samuela ta Zese hnohta, “Na sawchapawpa zydua amâ ki ma?” tah ta. Zese ta, “A seihnai chaipa y ta, châhrasala ano cha mietakuzy vaina liata na a y haw,” tah ta. Samuela ta Zese hnohta, “Kei paawsa teh, a vaw tlô hlâlei a tyuh aw ma pi,” tah ta.

¹² Kei paawsa ta, a vaw chhi ei ta. Sabia panyu kawpa, a mopadei a ngia kawpa nata hmipha ngaitapa châ ta. Abeipa ta Samuela hnohta, “Thyu la, sathawthu teh, kha tlai kha na a châ,” tah ta.

¹³ Samuela ta saki ôh sathaw cha la ta, ano cha a unawhzy hmiakô liata sathawthu ta. Cha noh tawhna chata, Abeipa Thlahpa cha Dâvi chô liata thatlô ngaitapa ta vaw tlô ta. Samuela cha thyu ta Râmâ lâ sie ha ta.

Dâvi ta Sawla a chakao

¹⁴ Abeipa Thlahpa ta Sawla cha puasai ha ta, Abeipa tuapa ahripa ta ano cha patypamâ ta.

¹⁵ Sawla chakaotuhpazy ta a hnohta, “Pachâ teh, Khazohpa tuapa ahripa ta a cha patypamâpa a châ hih.

¹⁶ Eima zibeipa ta na hmiakô liata a ypa châ chakaotuhpazy he totâ tô thaipa tlua awpa ta bie miah pie sala, na chô liata Khazohpa tuapa ahripa a vaw tlôna maihta, totâ tô tyh aw ta, na pha thlâh ha aw,” tah ei ta.

¹⁷ Sawla ta a chakaotuhpazy hnohta, “Totâ tô thaipa cha na pachâpa u la, kei lâ a vaw chhi teh u,” tah ta.

¹⁸ Satlia pakha ta a chhy ta, a hnohta, “Pachâ teh, Bethlehe khihpa Zese sawchapawpa pakha hmô na ta, ano cha totâ tô thai ngaitapa, chyhsa riahphapa, adyuhpa chyhsa, bierei a thai kawpa nata hmipha ngaitapa châ ta, Abeipa ta a ypâpa chyhsa a châ,” tah ta.

¹⁹ Sawla ta Zese lâ chyhsa tuah ta, “Na sawchapawpa Davi, mietaku vaituhpa kha kei lâ a vy mawh sy,” tah ta.

²⁰ Zese ta alâ pô kha la ta, viahchhâ, kresawhti ôh kha nata mietaw zy a chô liata khaih ta, Sawla pie awpa ta a sawchapawpa Dâvi cha paphaosa ta.

²¹ Dâvi cha Sawla kô kei tlô ta, Sawla rai hria awpa ta a ngia ha ta. Sawla ta Dâvi cha khoh kaw ta, a chariah chhaichhi a chabatuhpa ta y ta.

²² Sawla ta Zese lâ chyhsa tuah ta, a hnohta, “Dâvi he ei mo nâ dy kaw ta, ei rai hria pazao awpa ta na pasai awpa ta ei châ haw,” tah ta.

²³ Khazohpa tuapa ahripa Sawla chô liata a vaw tlôna maihta, Dâvi cha totâ la ta, tô tyh ta. Chatanachata Sawla cha vaw tlâhpa ta, pha heih tyh ta, ahripa ta ano cha a puasai ha tyh.