1 SAMUELA 15 - Mara Bible RV (BSI)

Abeipa ta Sawla a dytha

¹ Samuela ta Sawla hnohta, “Kei he Abeipa ta a phopi Izarei chô liata bei châta sathaw cha thu awpa ta nâ lâta eina vaw tuapa kha châ na ta, chavâta tahmâ Abeipa bie reipa he nathlie teh.

² Abeipa Atotaotheipa ta hetana heta a tah: ‘Izarei chô liata Amale hmotaopa, Izi râh tawhta a kaw pua nota lâpi liata â vaw byhpa kha ei thei ngâ thlâh ha.

³ Chavâta tahmâ sie la, Amale a kei dyuh la, a hneipa zydua kei pahleipadia khai teh. Khâpa hmah na pahlôh awpa châ vei. Chanô nata chapaw, hawti nata hawsaih, viahchao nata mietaku, râraoseihpa nata alâ zy na thie khai awpa a châ,’” tah ta.

⁴ Sawla cha Telai khihpi liata pheisaihzy awpakhy ta, ama maluh reih ta, alei pheisaih 200,000 y ei ta, Zudâh chi 10,000 ama y.

⁵ Sawla cha Amale khihpi lâ sie ta, saikao liata a byh ta.

⁶ Sawla ta Keni mo hnohta, “Sie u la, Amale mo kha puasai teh u. Chataleipatala ei cha thie pâ pathlei aw ei na. Nâmo la Izarei sawzy Izi râh tawhta ama kaw pua nota, ama zydua chô liata phana a palâsatuhpa châ tlôh ei chi ta,” tah ta. Chatanachata Keni mo cha Amale mo hry tawhta pua ei ta.

⁷ Sawla ta Amale mo cha Havilâ tawhta Izi nochhi lâta Surâ taihta a dyuh ta.

⁸ Amale bei Akâ cha a hrohpa ta patu ta, chyhsa zydua cha zaozi ta chhawhsao ta.

⁹ Sawla nata pheisaihzy ta Akâ cha pahlôh ei ta, mietaku nata viahchao pha chaipazy, viahchaotaw nata mietakutaw thawhpazy, a phapa maih pahlôh ei ta. Chazy cha tlokhuh pahleipadia khai ha awpa pasaih leipa ei ta. A pha leipa nata ama kho leipa maih deikua cha, pahleipadia khai ha ei ta.

¹⁰ Abeipa bie Samuela hnohta vaw tlô ta,

¹¹ “Sawla bei ei vaw taopa he la, ei ngiapachhi kaw na. Kei na pazi leipa ta, hnôh na chhy ta, ei biepiepazy zyh vei,” tah ta. Samuela cha a hiehâh ngaita ta, azozâkhihdei ta Abeipa pado ta.

¹² Samuela cha Sawla a hmô awpa ta mydi kari ta thyu ta, chyhsazy ta Samuela hnohta, “Sawla cha Kâmel lâ sie ta, cha liata ano palyupalihna alô bô ta, kua heih ta, sie lymâ ta, Kilkal lâta a zu haw,” tahpa ta chho ei ta.

¹³ Samuela cha Sawla kô kei tlô ta, Sawla ta a hnohta, “Abeipa ta byhnâ cha pie mawh sy, Abeipa biepiepa cha ei tao haw,” tah ta.

¹⁴ Samuela ta, “Cha mietaku sâpa pyu ei nakhaoh liata a vaw ngiapa nata viahchao a aohpa ei theipa zy cha, khâpa ma a yzie tly?” tah ta.

¹⁵ Sawla ta, “Amale mo eih amâ vaw chhipa a châ. Abeipa na Khazohpa lâta atheihna hlâ nawpa ta pheisaihzy ta mietaku nata viahchao pha chaipazy ama pahlôh. Ahropa zydua cha tlokhuh eima pahleipadia khai haw,” tah ta.

¹⁶ Samuela ta Sawla hnohta, “A chalih teh! Zâhnia ei hnohta Abeipa bie reipa ei cha chho aw,” tah ta. Sawla ta, “Reih teh,” tah ta.

¹⁷ Samuela ta, “Nâma pachâ ta cha, chyhsa chyhpata hawhta a pachâ hra la, Izarei chizy hyutuhpa châ va chi mâ? Abeipa ta Izarei chô liata bei châ awpa ta sathaw a cha thu.

¹⁸ Abeipa ta raihria awpa ta cha tuah ta, ‘Sie la moleipa sahlao Amale mo cha tlokhuh kei pahleipadia khai la, ama leidia khai hlâlei nâ dyuh aw ei,’ cha tah ta.

¹⁹ Khazia Abeipa ao na nathlie vei? Khazia hraona sôh a zawhnao chi ta, Abeipa mohmô liata hmo pha leipa na tao?” tah ta.

²⁰ Sawla ta Samuela hnohta, “Abeipa ao cha ei nathlie mâh tâh. Abeipa ta raihria awpa ta eina tuana lâ sie na ta, Amale bei Akâ a vaw chhi na ta, Amale mo cha tlokhuh ei pahleipadia khai ha ei mâh tâh.

²¹ Anodeikuacha pheisaihzy ta hraona sôh pahleipadia awpazy hry liata mietaku nata viahchao pha chaipazy la ei ta, Abeipa na Khazohpa lâta Kilkal liata atheihna hlâ nawpa châta amâ vaw chhipa a châ,” tah ta.

²² Samuela ta, “Abeipa ta, Abeipa ao nathliepa â lypa hawhta, Raopa hlânazy nata atheihnazy he â ly ma? Pachâ teh, atheihna hlâta reingiahna pha via ta, Mietaku tôhpa thaw hlâta bie nathliepa a pha via.

²³ Chhoruna cha pachaopa moleina nata a lyu ta, Akhotlâhna chhao nothlah a chhypa thaileichâna hawh a châ. Abeipa bie na khoh leipa vâta, Ano chhao ta bei châta cha khoh khao vei,” tah ta.

²⁴ Sawla ta Samuela hnohta, “Ei vaw molei haw. Zawpi chi na ta, ama ao ei nathliepa vâta, Abeipa biepiepa nata nâma biezy ei vaw parao haw.

²⁵ Tahmâ ei moleina nâ ngiahthai la, Abeipa hmiakô liata ei bôh thei nawpa ta, Kilkal lâ nâ liekhei teh,” tah ta.

²⁶ Samuela ta Sawla hnohta, “Châ liekhei aw va na. Abeipa bie na khoh leipa vâta, Abeipa ta nâ chhao Izarei chô liata bei châta cha khoh khao hra vei,” tah ta.

²⁷ Samuela cha sie awpa ta a palie ta, Sawla ta a viahkao pasipa pai kei patu ta, a hrie ha ta.

²⁸ Samuela ta a hnohta, “Tanoh tawhna heta Abeipa ta Izarei khinarâh cha nâma tawhta la ha ta, nâma hlâta a pha viapa, na opapa hnohta a pie haw.

²⁹ Izarei Rônahna cha haipa bie reih leipa aw ta, a palôh anano hra aw vei. Ano cha chyhsapa hawhta a palôh anano thaipa châ vei,” tah ta.

³⁰ Sawla ta, “Ei vaw molei ha tlai na. Chatahrasala ei châ haw na, ei chiheih machâzy nata Izarei hmiakô liana heta tahmâ na palyupalih la, Abeipa na Khazohpa hmiakô liata ei bôh thei nawpa ta, rie na kuakhei mah y,” tah ta.

³¹ Chatanachata Samuela ta Sawla cha kuakhei ta, Sawla cha Abeipa hmiakô liata a bôh ta.

³² Samuela ta, “Amale bei Akâ kha kei lâ a vaw chhi teh u,” tah ta. Akâ cha ano lâta thathyu kawpa ta vawh ta. “Thina chichhihpa ei khôkhâh ha thlyu aw hih,” tahpa ta pachâ ta.

³³ Samuela ta, “Na zaozi ta chanôzy saw leipa ta a taopa hawhta, Na nô chhao chanôzy hry liata saw leipa a châ aw,” tah ta. Chatanachata Samuela ta Akâ cha, a pôhpa â pachhaih khaina taihta Abeipa hmiakô ta Kilkal liata chhawh ta a thie haw.

³⁴ Cha khai tawhta Samuela cha Râmâ lâ sie ta, Sawla deikua cha Sawla khih Kibia liata ano o lâ khy ta.

³⁵ Cha noh tawhna chata Samuela cha a thi noh taihta Sawla a hmô khao vei. Chatanachôta Samuela cha Sawla vâta a pachâ a rôh ngaita tyh. Abeipa ta Izarei chô liata bei châ awpa ta Sawla a vaw taopa cha â ngiapachhi ngaita.